Dabe ta jui pepa toy
Ke sempre me apliki."
REFRENA
"Wul! Wul! Wul!"
- Walaa! Yu darfi luli ta idyen si yu yao! - Dukina shwo a Alisa al shwai bebi a ela. - Me mus go tayari swa fo plei kroket kun Regina.
Ewalaa ta hasti lopi aus shamba. Kuker lansi fraier afte ta, bat bu trefi.
Alisa kapti bebi yedoh to bu es fasile sikom ta es syao kreatura do ajibe forma: suy gambas e brachas ragi aus a oli taraf. - "Yus kom marstara," - Alisa dumi. Sey syao wan farfari kom vapormashina e oltaim pligi e depligi swa, also Alisa majbur eforti gro iven fo sim teni ta.
Tuy afte ke ela pai findi prave dao fo luli ta (kel es tu torsi ta inu noda-si e gro-teni suy desne aur e lefte peda bli mutu fo preventi detorsa), ela porti ta aus dom.
- Si me bu ve pren sey kinda kun swa, - Alisa dumi, - li sertem ve kili ta afte para dey. Tu lyu ta hir wud maini kili ta.
Ela shwo sey laste worda lautem, e syao wan fai grugru to jawaba (ta he kwiti chihi al sey taim).
- Bye fai grugru, - Alisa shwo, - to bu es prave dao fo expresi swa.
Bebi grugru snova e Alisa nokalmem kan suy fas fo samaji kwo ye. Sin duba ta hev muy uuparpligi-ney nos kel simili musla pyu kem den reale nos. Yoshi suy okos es nopinchanem syao fo bebi. Pa tota Alisa ga bu pri suy aspekta.
- Bat mogbi es sim por plaki, - ela dumi e ek-kan inu suy okos fo vidi ob haishi ye larma.
Non, larma yok.
- Si yu sal transformi inu swina, may kare, - Alisa shwo seriosem, - me ga bu ve fai dela kun yu. Remembi ba!
Povre syao wan snova fai ek-plaka (o ek-grugru, oni bu mog shwo exaktem), e li go for al silensi duran koy taim.
Alisa yus begin dumi: "Wel, kwo me gai zwo kun sey kreatura al he bringi ta a dom?" - wen ta grugru snova, tanto lautem ke Alisa kan an suy fas alarmi-nem. Pa sey ves duba ga yok: ta es swina hi. Ewalaa ela samaji ke es aika absurde tu porti ta for.
Also ela lasi syao kreatura nich, e senti levifa al vidi ke ta kway troti wek inu shulin.
- Al fa-gran, - ela shwo a swa, - ta wud bi gro-kurupe kinda; bat kom swina ta es ya aika jamile, segun may opina.
E ela en-mediti om otre ti ela koni na kindas kel wud mog bikam ga hao swina.
- Oni sol treba jan prave dao fo transformi li... - ela begin shwo a swa bat turan ek-fobi-ki por vidi Chesher-kota kel zai sidi on baum-brancha pa kelke stepa fon ela.
Kota en-smaili al vidi Alisa. Semblem ta sta pa hao muda, ela dumi; yedoh ta hev muy longe nakas e gro-menga denta, also ela senti ke gai trati ta kun respekta.
- Chesher-Koti, - ela begin, aika timidem, sikom ela ga bu jan ob ta ve pri tal nam. Yedoh ta sim en-smaili idyen pyu chaurem.
- Wel, ta es haishi santush. - Alisa dumi e shwo for: - Plis, bi karim fo shwo a me, pa kwel kamina me gai go fon hir?
- Se dependi aika gro fon to, a wo yu yao lai, - Kota shwo.
- Fo me es aika egale... - Alisa jawabi.
- Dan es egale pa kwel kamina yu ve go, - Kota shwo.
- ...si me sol pai lai a koylok, - Alisa adi kom explika.
- Oo, yu sertem ve pai, - Kota repliki, - si yu pedi basta longem.
Alisa senti ke oni bu mog negi se, e probi fai otre kwesta:
- Kwel jenta habiti hir?
- Pa toy taraf, - Kota shwo al mavi desne pata, - Shapnik jivi. E pa toy taraf, - al mavi otre pata, - Marto-Tuza. Yu mog visiti den kwel yu yao: li ambi es pagale.
- Bat me bu yao komuniki kun pagale jenta, - Alisa remarki.
- Oo, yu sim bu mog eviti se, - Kota shwo. - Nu oli es pagale hir. Me es pagale. Yu es pagale.
- Komo yu jan ke me es pagale? - Alisa kwesti.
- Yu sertem es, - Kota shwo, - otrekas yu bu wud lai ahir.
Alisa bu opini ke se pruvi enisa. Yedoh ela shwo for:
- E komo yu jan ke yu es pagale?
- Fo beginsa, doga bu es pagale, - Kota shwo. - Ob yu konsenti?
- Me admiti se, - Alisa shwo.
- Wel, dan, - Kota fai for, - yu samaji ya ke doga grauli al iri e mavi kauda al sta santush. Ewalaa me grauli al sta santush e mavi kauda al iri. Also me es pagale.
- Me wud shwo ke yu urli, bu grauli, - Alisa shwo.
- Yu mog nami se kom yu yao, - Kota shwo. - Ob yu sal plei kroket kun Regina sedey?
- Me wud yao gro, - Alisa shwo, - bat me bu es inviten.
- Yu ve vidi me dar, - Kota shwo e desapari.
Alisa bu surprisi gro por se, sikom ela zai abyasi ya a ke ajibe kosa eventi. Duran ke ela haishi kan plasa wo ta he bi, ta apari snova, ga turan.
- Apropoo, kwo eventi a toy bebi? - Kota shwo. - Me hampi fogeti kwesti om se.
- Ta he transformi inu swina, - Alisa jawabi muy kalmem kom si Kota lai bak pa ga pinchan dao.
- Me dumi-te tak hi, - Kota shwo e fa-wek snova.
Alisa weiti idyen al haf-expekti vidi ta snova, bat ta bu apari, also afte para minuta Alisa en-pedi a ti Marto-Tuza muka jivi na direksion.
- Me gwo vidi koy shapnik bifooen, - ela shwo a swa. - Marto-Tuza semblem ve bi pyu interes-ney. Sikom es mey, mogbi ta bu es yo gro-pagale; amini bu tanto pagale kom pa marto.
Al shwo se ela ek-kan uupar, ewalaa Kota snova zai sidi pa baum-brancha.
- Ob yu he shwo ‘swina’ o ‘pina’? - Kota shwo.
- Me he shwo ‘swina’, - Alisa jawabi, - e me fai magari om ke yu bu apari e desapari oltaim tanto turan-nem: oni ya pai vertiga!
- Hao, - Kota shwo. Pa sey ves ta desapari aika lentem, begin-yen bay kauda-nok e fini-yen bay smaila kel resti in aira fo kelke taim afte ke olo otre yo yok.
- Wel, me oftem gwo vidi kota sin smaila, - Alisa dumi, - bat smaila hi sin kota! Es ya zuy kuriose kosa ke me gwo vidi duran may tote jiva!
Ela en-pedi snova e sun vidi dom de Marto-Tuza. Ela dumi ke musbi es toy hi dom, bikos fumtubas hev forma de aur e ruf es kovren bay farwa. Sey dom es tanto gran ke ela bu osi blisifi til kusi-chi idyen de desne-handa-ney funga-pes e mah swa sirke dwa fut gao. E iven afte se ela go versu it aika timidem al shwo a swa:
- Yedoh, kwo si ta es gro-pagale hi? Magari-si me he go visiti Shapnik!
Pagale chayvating
Bifoo dom sub baum ye bepon-ney tabla, e Marto-Tuza e Shapnik zai chayvati pa it; Somnimaus zai sidi inter li al haf-somni. Ambi otra zai yusi ta kom kushen: li apogi kudas on ta e zai toki sobre ta-ney kapa.
- Musbi es muy nobyen fo Somnimaus, - Alisa dumi. - "Yedoh ta somni e shayad bu atenti.
Tabla es aika gran, bat li tri zai sidi pa hunta pa un angula.
- Plasa yok! Plasa yok! - li krai al vidi ke Alisa zai lai.
- Ye menga plasa! - Alisa shwo indignem e en-sidi inu gran brachastula pa un de tabla-fin.
- Pi ba idyen vino, - Marto-Tuza shwo to kurajisi.
Alisa kan olo on tabla, bat ye nixa krome chay.
- Me bu vidi vino, - ela remarki.
- It ga yok, - Marto-Tuza shwo.
- Dan bu es muy latif ke yu ofri it, - Alisa shwo ira-nem.
- Bu es muy latif ke yu en-sidi pa tabla sin ke oni inviti yu, - Marto-Tuza jawabi.
- Me bu jan-te ke es tabla sol fo yu, - Alisa shwo. - Ye bartan fo mucho pyu kem tri wan.
- Yu treba kati har, - Shapnik shwo. Ta he kan Alisa duran kelke taim gro-jigyas-nem e se es suy un-ney worda.
- Yu gai lerni bu fai remarka om persona de kunshwoer, - Alisa shwo idyen saktem. - Es muy karke.
Al audi se, Shapnik ofni okos ga chaurem, bat bu repliki. Olo ke ta shwo es:
- Way korva simili skribitabla?