- Tal kosa yok ya! - Alisa en-shwo ira-nem, bat Shapnik e Marto-Tuza fai: "Shsh! Shsh!" - e Somnimaus glumem remarki:
- Si yu bu janmog suluki hao, fini ba sey historia pa selfa.
- Non, non, bi karim, fai for! - Alisa shwo ga namrem. - Me bu ve interrupti yu. Me bu jan sertem, mogbi koylok ye un tal kwan.
- Un! Ha! - Somnimaus shwo indignem, yedoh konsenti fai for. - Also tri sista-ki, li lerni rasmi e cherpi...
- Cherpi inspira ku? - Alisa kwesti fogeti-yen suy wada.
- Melasa, - Somnimaus shwo, pa sey ves sin dumi.
- Me treba klin tasa, - Shapnik interrupti. - Nu muvi ba pa un plasa.
Ta shanji plasa duran shwo, Somnimaus sekwi ta; Marto-Tuza okupi plasa de Somnimaus, e Alisa, ga sin yao, majbur okupi Marto-Tuza-ney-la. Sol Shapnik pai avantaja por plasa-shanja, e Alisa-ney situasion es nau mucho pyu buhao bikos Marto-Tuza yus he lasi lwo milka-kruga inu suy pyata.
Alisa bu yao ofensi Somnimaus snova, also en-shwo muy chaukem:
- Bat me bu samaji. Fon wo li cherpi melasa?
- Oni mog cherpi akwa aus akwa-kwan, - Shapnik shwo, - also oni mog cherpi melasa aus melasa-kwan, bu ver? Stupida ya...
- Bat li es ya inen kwan! - Alisa shwo a Somnimaus al preferi bu atenti laste remarka.
- Naturalem, - Somnimaus shwo, - inen kwanto treba.
Sey jawaba konfusi Alisa tanto ke ela lasi Somnimaus shwo for fo kelke taim sin interrupti ta.
- Li lerni rasmi, - Somnimaus kontinu al guapi e froti okos, bikos ta fa-somnaful, - e li rasmi oli kosa kel begin pa M...
- Way M? - Alisa kwesti.
- Way non? - Marto-Tuza shwo.
Alisa silensi.
Somnimaus he yo klosi okos e zai en-somni, bat al senti pinsa de Shapnik ta ek-krai e snova en-jagi. Also ta fai for:
- ...kel begin bay M: maus-kaptika, mar, memoria, menga... Oni shwo ya "menga de koysa", bat ob yu gwo vidi rasma de menga selfa?
- Pa fakta, sikom yu kwesti, - Alisa shwo, ga konfusi-ney, - me bu dumi...
- Dan bu gai shwo, - Shapnik interrupti.
Sey karkitaa es tro fo Alisa. Ela en-stan, gro-vexi-ney, e go wek. Somnimaus en-somni tuy, e ambi otra fai nul atenta om ke ela go, obwol ela kan bak para ves al haf-nadi ke li voki ela bak. Pa laste ves ke ela vidi li, li zai trai pon Somnimaus inu chaydan.
- Me bu ve go adar snova, pa nul dao! - Alisa shwo trapasi-yen shulin. - Es ya zuy stupide chayvating ke me gwo partisipi in tote may jiva!
Yus al shwo se ela merki ke in un baum ye dwar kel dukti rek inu.
- Es ya kuriose! - ela dumi. - Yedoh olo es kuriose sedey. Me dumi ke me mog ya go inu tuy.
E ela zin.
Snova ela findi swa in longe sala bli syao glas-tabla.
- Wel, pa sey ves me pai duyfu pyu hao, - ela shwo a swa e un-nem pren syao golda-klef e ofni dwar kel dukti inu garden. Poy ela kusi-chi funga (ela kipi un pes in posh) til bi do sirke un fut gao. Poy ela pedi tra syao pasaja, ewalaa pa fin ela loki inen jamile garden, miden yarke florkyar e lengish fontan.
Pa Regina-ney kroket-maidan
Bli garden-zinsa ye un gran rosa-baum; ti zai kresi on it na rosas es blan, bat ye tri gardenyuan kel zai mangi pinti li rude. Alisa dumi ke es ya muy kuriose dela e lai pyu blisem fo kan. Yus al lai ela audi ke un de li shwo:
- Chauki ba, Petka! Bye pleski-pleski pinta an me tak!
- To bin sin yao, - Petka shwo glumem. - Semka he ek-pushi may kuda!
Al se Semka lifti kapa e shwo:
- Ver ya, Petka! Sempre kulpisi otres!
- Pyu hao yu hi bye shwo! - Petka ek-krai. - Me he audi ke Regina shwo yus yeri ke oni gai dekapisi yu!
- Por kwo? - un-ney wan shwo.
- Bu es yur dela, Dwaka! - Semka shwo.
- Doh, es ya suy hi dela! - Petka shwo. - E me ve expliki: es por bringi tulipa-bulba inplas luk.
Semka mah-lwo brash.
- Wel, fon oli nojustika es ya zuy... – ta en-shwo bat stopi al ek-vidi Alisa kel zai stan kan li. Otre-las toshi turni swa, e li oli ek-pokloni gro.
- Plis, ob yu wud mog expliki a me, - Alisa shwo idyen timidem, - way yu zai pinti sey rosas?
Petka e Semka shwo nixa, yedoh kan an Dwaka. Dwaka en-shwo kyetem:
- Wel, pa fakta, yu samaji ku, mis, sey baum mus-te bi rude hi rosa-baum, bat nu he galti-planti blan-la. Si Regina en-jan, oni ve dekapisi nu oli, es ver ya. Also yu vidi ya, mis, nu eforti gro bifoo ke ela lai...
Pa sey momenta Petka kel zai kan nokalmem tra garden, krai: "Regina! Regina!" e tri gardenyuan tuy mah swa lwo platem on arda al fas nich. Ye gro-ney stepa-suon, e Alisa turni swa kun jigyas: ela yao vidi Regina.
Avanen zai go da shi soldata kun koy sorta de piki-arma; oli do same forma kom tri gardenyuan, rektangule e plate, do handas e pedas pa angulas. Poy ye shi kortayuan; ley klaida hev ornamenta do kwadras, e li go po dwa, kom soldata. Sekwem ye rega-kinda: shi wan kel lai al salti-salti alegrem; li go pa para al teni handas de mutu, e oli hev ornamenta do kordia. Poy ye gastas, maiste de li es Rego o Regina. Miden li den Blan Kunila Alisa rekoni: ta zai shwo hasti-shem e nerva-nem al smaili a oli, e go pas sin merki ela. Poy lai Valet do Kordia, kel zai porti Rego-ney krona on yarke-rude kushen do bahmal. E pa fin de ol gran prosesion ye REGO E REGINA DO KORDIA.
Alisa en-hesiti: mogbi ela toshi gai en-lagi on arda al fas nich, kom tri gardenyuan? Bat ela semblem bu gwo audi om tal regula al prosesion.
- E krome to, do kwel utilitaa prosesion wud bi, - ela dumi, - si oli mus lagi al fas nich e bu mog vidi nixa?
Also ela sim resti stan, weiti-yen.
Wen prosesion blisifi a Alisa, li oli stopi e kan ela, e Regina shwo saktem:
- Hu es sey-la? - Ela he adresi valet do Kordia, bat ta sol pokloni e smaili kom jawaba.
- Idiota! - Regina shwo al ek-sheiki kapa nosabrem. Poy ela turni swa a Alisa, shwo:
- Komo yu nami, kinda?
- Me nami Alisa, yur Mahantaa, - Alisa shwo muy latifem; bat adi a swa: "Wel, li es ya sol pleikarta-seta. Bu treba fobi li!"
- E hu es sey-las? - Regina shwo al indiki tri gardenyuan kel zai lagi sirkum rosa-baum. Sikom li zai lagi al fas nich e al bey uupar, e sikom bey-ornamenta es same she oli in seta, ela bu mog samaji ob li es gardenyuan oda soldata oda kortayuan oda tri de elay prope kinda.
- Way me hi gai jan? - Alisa shwo a fa-surprisi por swa-ney kuraja. - Bu es may dela.
Regina fa-yarke-rude por furia, kan ela fixem kom savaje bestia duran kelke taim, poy en-krai gro:
- Haki los elay kapa! Haki los...
- Absurdika! - Alisa shwo muy lautem e desidi-nem, ewalaa Regina silensi.
Rego pon handa on elay plecha, shwo timidem:
- Atenti ba, kara: ela es sim kinda!
Regina ira-nem wekturni swa fon ta e shwo a Valet:
- Turni li sirkum!
Valet obedi e turni li muy kuydem, bay un peda.
- En-stan ba! - Regina skwili-shwo lautem, e tri gardenyuan tuy ek-salti-stan e begin pokloni a Rego, Regina, rega-kinda e oli otre.
- Kwiti ba se! - Regina krai. - Me fai vertiga por yu.
Poy ela turni a rosa-baum, shwo:
- Kwo yu zwo-te hir?
- Oo, Yur Mahantaa, - Dwaka shwo muy namrem al genui pa un gamba, - nu trai-te...
- Me samaji, - Regina shwo: ela he examini rosas pa intertaim. - Haki los ley kapas!
E prosesion en-muvi for, al ke tri soldata resti fo morta-puni gardenyuanes to nofortunnik, kel tuy lopi a Alisa fo gei protekti.
- Yur kapas bu ve bi haken los! - Alisa shwo e pon li inu bli-ney gran flordan. Tri soldata shuki-wandi duran para minuta e poy en-marshi afte prosesion.
- Ob ley kapas es los? - Regina krai-kwesti.
- Ley kapas es wek, Yur Mahantaa! - soldatas krai-jawabi.
- Es ya hao! - Regina krai. - Ob yu janmog plei kroket?
Soldatas silensi e kan Alisa, sikom evidentem den ela Regina he adresi.
- Ya! - Alisa krai.
- Dan kamon! - brai-krai da Regina, e Alisa hunti a prosesion al trai gesi kwo eventi sekwem.
- Es .. es ya muy hao dey! - koy timide vos fa-audi bli: Blan Kunila zai go flanken al kan-kan elay fas nokalmem.