Si ela fai sey dela for,
fon yu resulti kwo?
Me dai-te dwa, lu dai-te tri,
yu dai-te char o pyu.
Obwol me hi posesi li,
li snova lai a yu.
Si oni tiri nu koygrad
inu sey dela, dan
a yu konfidi lu, shayad,
librisi oli wan.
Me ya samaji ke bifoo
ke ela fai japat,
yu es obstakla gro-ney fo
i lu i nu. Dashat.
Ya, ela pri-te toy hi man,
bat bye shwo to a lu.
Den to hay neva jan nulwan
exepte me e yu.
- Es zuy muhim gavaha ke nu he audi til nau, - Rego shwo al froti handas, - also nau hay juri...
- Si koywan expliki sey versa, - Alisa shwo (duran kelke laste minuta ela he fa-gran tanto ke ela ga bu fobi interrupti ta), - me ve dai a ta haf-shiling. Me bu kredi ke ye vaika sensuinka in it.
Oli juriyuan skribi on tabulas "Ela bu kredi ke ye vaika sensuinka in it", bat nulwan probi expliki versa.
- Si sensu yok, - Rego shwo, - tem pyu hao: nu bu treba shuki it. Yedoh me haishi bu es serte...
Ta extendi papir-lif on swa-ney genu e kan it bay un oko.
- Semblem me vidi hi koy sensu in it, - ta fai for. - "...bat swimi ga bu mog". Yu bu mog swimi, bu ver? - ta kwesti Valet.
Valet tristem sheiki kapa.
- Ob me aspekti kom swimnik? - ta shwo. (Naturalem, ta bu aspekti kom swimnik, ta es ya aus karton.)
- Muy hao, - Rego shwo e for-murmuri versa a swa. - "E jenta jan ya to"... Sertem es om juri... "Si ela fai sey dela for"... Musbi es Regina... "Fon yu resulti kwo?".. Ver, kwo hi?.. "Me dai-te dwa, lu dai-te tri"... Ahaa, es om kek!
- Bat poy ye worda "Li snova lai a yu", - Alisa shwo.
- Es ya ver, walaa li! - Rego shwo triumfi-shem e indiki pyata kun kek. - Enisa pyu klare yok ya! Poy sey worda: "Bifoo ke ela fai japat"...
Ta turni a Regina:
- Yu ya neva fai japat, kara, bu ver?
- Neva! - Regina shwo furia-nem e lansi tintadan an Lizarda. (Povre syao Bil he kwiti skribi on suy tabula bay finga, sikom ta deskovri ke it bu lyu trasa; bat nau ta hastem en-skribi snova, yusi-yen ti flui-ki nich fas na tinta.)
- Also toy worda es skriben al japat de tuhmat, - Rego shwo al smaili e kan sirkum sala. Ye komplete silensa.
- Es worda-pleisa! - Rego krai ira-nem.
Oli ridi.
- Hay juri bedumi desida, - Rego shwo, pa sirke dwashi-ney ves duran toy dey.
- Non, non! - Regina shwo. - Un-nem kondamna, desida poy.