Темже убо и намъ откуду, празднолюбци, светлый сей и преславный новейший празникъ Покрова Владычици и Спасителницы граду же и людемь многою любовию почитати и достойную честь, яко Царици и Владычици, воздаати, не яко она отъ насъ похвалъ и славы требующи, но паче да мы тою прославимся. Священници и царие и вся племена человечьскаа, богатии и нищии и вси людие, похвалу праздничную да воспоим, и да прославимь яко матерь Божию и нашю помощницу. Кождо благодарная да приносить: ово — смерение со благоговением, и инъ постъ и молитву да дарствуеть Владычици, и другый да простирает рукы к раздаянию нищим, и ово гневное брату да отпустить, и, тако творяще, Богородицю возвеличим. Такова бо приношениа празничнаа требуеть, а не в тимьпанех и гуслехь, и питиих, якоже еллиньстии отроци празнують, но в молитвахъ Богородителници пение, поновлению жизни нашей благодарная, яко длъгъ воздадимъ, благодати не тающе, но заступление исповедающе. Чистотою бо та и яко царьскою багряницею украшена, со царемь яко мати царствующи. «Честнейшиа херувимь и славнейшю серафим»[69] воспоем, аще же реку вышшюю небесе и земли, и всех бывших тварей иже от Адама честнейшая, сиа глаголя — не погрешю. Егоже бо херувими и серафими зрети не могуть, но со страхомъ и трисвятое пение приносять, сего Чистаа и Пречистаа Мати своими чистыми и честными рукама сподобися держати; и егоже небеса не возмогають вместити, богоприятная же тоя ложесна нетесно вмести, и безъ истлениа проиде Вседетель: якоже деву обрете чистую, тако деву чистую и по рожестве соблюде, яко да не порочно будет девьство. Понеже аще и некыа от девъ от великаго воздержаниа и целомудриа и чистоту соблюдааху, а не еже от естьства, сиа Пречистаа и Приснодева Мариа не от воздержаниа некоего чистоту девьства имяше, но от самого тоя естьства, и бес труда чистота велия бяше, понеже тако подобаше Царици и Владычици, деве ие и матери Сына Божиа преславна о ней быти, понеже бо преже всехъ тварей и векъ Богови преславное вселение пронаречена бывши, о ней же глаголаше пророкъ: «Преславнаа глаголашеся о тебе, граде Божий»;[70] и паки: «Помяну имя твое во всяком роде и роде».[71] Но и сама та Владычица и Богородица пророчьски глаголеть: «Се бо ныне блажать мя вси роде».[72] Вси роди родовъ ту ублажають. Что же глаголю о земленых, но паче въ пренебесныих и самы аггели и архаггели, яко Царици и Матери тех сотворшаго, со страхомъ преже стоять, пение приносяще. Мы же, грешнии, которыми устнами языкъ къ похвале Чистыа отверземь, якоже длъжно ту достойными хвалами величиа Приснодевы Богоматери почесть приносити? Аще бо и умъ аггельский не постизает достойными хвалами ту воспевати, но елико темь достойно, юже и сам небесный Отець похвали, и Духъ Пресвятый осени, и Сынъ Божий от нея безъ истлени проиде, и вся паче естьства и выше человечьскаго и аггельская разума о ней таиньства сбышася.
Но что много глаголю? Не испытанна постигнути немощно, но день нынешняго празника празнична же глаголются. Кто бо исповесть величиа, еже ныне бывшее преславное Владычици чюдо и явление своимь угодникомь, и молитьвеное и милостивное еже ко Сыну своему и Богу о согрешающих моление? Что воздааниа противу тоя благодеяниа воздадимъ? Точию оное архаггельское слово, яко достойно радости, глаголемь: «Радуйся, обрадованнаа, Господь с тобою,[73] и тебе ради — со человеки! Радуйся, словесный раю, в немже божественое древо насаждено бысть, Христосъ, а не оно древо, и Адама умершвлей, но паче всемъ бесмертие и животъ дарующее![74] Радуйся, божественый киоте, небеснаго бисера в себе носящи, Христа, и источниче живыа воды, животъ намъ источившиа! Радуйся, архаггельское ликование и аггельское веселие, и земленородныхъ обновление! Радуйся, Моисиовъ жезле,[75] море разделившее и фараона мучителя силою сына твоего потопльшее, и изрядны люди в землю обетованиа наставльшиа! Радуйся, купно царский и священничьский Аароновъ жезле,[76] от негоже прекрасный цветъ, Христос, процвете, и ис тебе безъ истлениа родися! Радуйся, светило невечерняго света, всю тварь освещающи и еретичьскую мглу далече негде отгонящи! Радуйся и ты, блаженне и преблаженне Андрее, отче нашь, и со блаженым учеником Епифаниемь, иже неизреченных видений таинникь и зритель известны бывша! Радуйся и ты, блаженней Епифание, сподобивыйся такова учителя ученикь преизрядный нарещися! Блажени же и вси людие, иже пречестный твой праздникъ почитающе, Владычице: тебе бо ради нашь град и вся вселенная от льсти диавольскиа избавися, и крестом Сына твоего всеродный Адамъ в райскую породу паки возвращается; и тебе ради, Владычице, страсти от человекь отгонятся, и здравие душевное и телесное приемлемь. Ты бо еси печалным милостивное утешение, обрадование, ты бо — Мати истиннаго живота; аще и прииде от земля ко небесныимь, но с плотию жива сущи, темже и тамо съ Царемь и Сыномъ присно соцарствуеши вь небесныих. Темже молимся тебе, яко милостивой и милостиваго Бога рождеши сродствиа нашего: аще и согрешихом, помощию не отступай, но присно предваряа от бедъ и скорбей избавляа насъ. Ты бо, Владычице, православнымь людемъ прибежище и град твердый от лица вражиа, и твоего заступлениа и помощи требуемь, и твоею надеждею крепимся, и силою Сына твоего противныа полци побеждаются. Темже, Богородителнице, якоже тогда милостивно о людехъ, тебе чтущих Царицю, промышляше полезнаа, тако и ныне не престай своимъ честным покровом покрывающи и советы варварьскыа, иже ратующих, низложи, и всехъ, иже въ честный храмъ твой приходящих и молитвы и молениа тебе приносящих, спасай. Яко да твоими молитвами настоящую жизнь сию немятежно прейдемь и вечных благъ сподобимся о томь самом Владыце и Господе нашем Исусе Христе, емуже слава и держава, честь и поклоняние со безначалным Отцемь и Пресвятым, и Благым, и Животворящимь Духомъ и ныне и присно, и въ векы векомь. Аминь».
69
73
74
75
76