Мне же мнимо есть, по божественыхъ отець писанию, онеи же ясно сказаша: не есть се убо звезда, но сила некаа невидимаа претворишася. Внегда бо онемь стати, и она с ними стояше, егда имъ ступати — и та с ними идяше. Вся бо звезды обычныа к западу грядуть, си же чрезъ естество на полудние идяше. Солнцю востекшю, обычныа звезды покрывахуся и невидими бываху, си же звезда солнечныа покрываше луча. И шедше ста, идеже Иродъ царствуеть.
Волсви же, во градъ вшедше, вопрошаху с расмотрениемь, глаголющи ми: «Где есть родивыйся царь Июдеискый? Видехомь бо звезду его на востоце, восиавши ей во звездахъ, омрачахуся иныа звезды и не светяхуся, и „приидохомь поклонитися ему".[140] Они же, удивльшеся от страшных глаголъ, отвещаша, глаголюще: „Несть зде, егоже вы глаголете. Иродъ царствуеть во стране сей, и сынъ у него единъ есть, и давно убо родился есть, и нестъ (еще) приимникъ царству его, а егоже вы глаголете, не вемы". Они же паки вопрошаху, глаголюще: „Мы убо о не Ироде вопрошаемь васъ, ни о сыну его, но о рождьшемся цари, егоже звезда восиала есть. Тому поклонитися приидохомъ, якоже рече: «Изыдеть звезда от Иакова, и востанеть человекь от Израиля, и сокрушить начатки Моавля, и пленить всюду»"».[141] Ту видевше звезду, волсви, приидоша со востока во Иерусалимь, глаголюще: «Где есть родивыйся царь Июдейский?»
И промчеся слово то до Ирода, иже ему возвестиша и глаголаху: «Мы убо, царю, слышахомь от пришедшихъ влъхвовъ, иже возвестиша намъ о рождьшемся Цари небеснемь, егоже, глаголють, царствию несть конца». Ирод же слышавъ и возмутися яростию скоро, и весь Иерусалимъ с нимь смятеся. И повеле слугамь призвати волхвы. Слуги же Иродовы шедше, возвестиша, глаголюще: «Царь вы зоветь к собе». Они же слышавше, идоша к нему, чающе возвещениа от него рождьшемся цари. Абие сташа пред Иродомь, и рече имъ царь: «Где есть, егоже вы глаголете рождьшагося царя во странахъ наших, егоже царствию несть конца? Аще известно весте, скажите намъ, где есть родивыйся». Волсви же отвещаша ко Ироду, глаголюще: «Мы убо сынове есме Перскыа области. Отечьство наше есть все предела земля тоя, ты же вопрошаеши насъ, где есть родивыися царь. Не сведетели есмы стране твоей. Мы убо имамы звезду, водящю насъ, дондеже та уставить течение — да увемы рождьшагося царя на спасение земнымъ». Иродъ же се слышавъ от влъхвовъ и возьярися зракомь, и смутися умомь, и глаголаше: «Да почто не известно уведевше и возмутили есте страну?» Они же рекоша ему: «Мы убо николиже соблазнихомся даже до ныне, зряще на преходы звездныа. Се звездное знамение известно свемы, в коей убо стране приключшагося, якоже отцы наши даша намъ учениа хитрости, приимше от еллинь же и халдей, мы же с техь добре умеюща звезднаа течениа. Мы же о семь пытаеми, не соблажняемся, ты же вопрошаеши нас о рождьшемся цари, где есть. Известно видехомь звезду его на востоце превелику, во звездах восиающю, еже есть знамение небеснаго царя. Сии есть наставница намъ, с неюже грядемь, дондеже уставити течение, ту поклонимся превечному царю».
Слышав же се Ирод от влъхвовъ, смятеся, и весь Иерусалимъ с нимъ. И лестию хотя от влъхвовъ увидети и известно яже о отрочяти, кротко к нимь отвещаеть, глаголя: «То аще поистине грядете поклонитися рождьшемуся царю на земли, возвестите намь разумно, да и азъ поклонюся ему». И посылаеть с ними послы своя, глаголя: «Аще где обрящете таковаго, возвратившеся, поведите ми, да шедъ поклонюся ему». Шедше же предъ врата граднаа и вси слугы Иродовы, яко начаша начинати шествие пути, абие водящиа звезда мужа Перскыа скрыся. Посланыа же слугы воспять возвратишася ко Ироду, глаголюще: «Мы убо, царю, сице сматряемь вещь сию разумеюще, яко же сии мужие волшества своего промышлениемь уставиша таковое знамение — звезда водящиа, да размыслить о сихъ твоя держава». Ирод же распалився, лютою яростию наполнися, яко аспида гневомь дышуща, и повеле волхвы возвратити, и воврещи ихъ в темницю, и стражемь повеле блюсти я.
И представи мужа единого, языкъ умеюща перский, рече ему царь: «Разумееши ты, что глаголють сами к себе волсви, и ты нам возвести. А к нимь не обиавляйся». Якоже слышавь, тако сътвориши. Онем же, седящимь в темницы, и скорбию одержими и печалию, глаголаху сами к себе: «Да не соблазнимся о бывшем знамении, ни убо, но Иродова ради злаго возбешениа и посланных его слугъ скрыся от насъ таковое знамение. Мы же и доселе, на звезды смотряше, не соблазнихомся, яко отцы наши, добре разумеюще, намь предаша. Да возвестимь убо Ироду: да аще отпустить насъ единехь, и шедше ищемь обрящемь его, и поклонившеся превечному царю, и пакы возвратившеся ко Ироду, возвестимь ему». Поведаша же слугы царю вся глаголаниа ихъ. И абие радъ бысть, чаа возвещениа о рождьшемся. И призвавь их, глаголя: «Почто доброродство, о мужи, ищете и не глаголете намь о рождьшемся цари, да чести сподоблени будете от нашего царства и истинни глаголници наречетеся». Волсви же единако глаголаху: «Мы убо, царю, знамениа смотримь, дондеже уставится звезда, ту абие видимь рождьшагося царя, и поклоншеся ему безвестно видевше, возвратимся к тебе». Он же рече к нимь: «Колико имате время шествия вашего пути, отнележе проявися знамение се?» Отвещаша же, глаголюще ему: «Се уже два лета». Иродъ же, разумевь глаголаниа от влъхвовъ, и отпусти их с миромъ, глаголя: «Аще где обрящете и, возвратившеся возвестите ми, да и азъ шедъ поклонюся ему». Лестно бо, а не истинно глаголаше, хотя одолети неодолеемаго Бога, егоже бесплотнии на небесе, зряще, дивляхуся, глаголюще: «Дивна ныне видиж и преславна: Егоже небо не вмести, ныне же во чрево Девыа вместися, и бысть плоть, хотя исполнити божественый стогъ». И на сего Иродъ готовится, и хощет мечю предати, разоряюще советы языкомь, отметаеть же мысль людии! Ныне бо исполнитися имать реченное пророкомь глаголющимь Давыдомъ: «Падуть от страны твоея тысуща, и тма к тебе не приступить одесную», — на младенца наводить, избиены Христа ради.
141