Ублажим убо добродетелнаго сего мужа и того житие всем поведаем. И вспомянем о рождении его и о возрасте, и о мирском того пребывании, и о отвержении мира, и како доиде во Святую гору и потрудися тамо, и прият благословение от святогорскихъ старцевъ и от игумена Иоанна Святыя горы, иконою Пресвятыя Богородица бысть благословенъ, и оттуду благословениемъ отецъ в Великей Новъград прииде, и от архиепископа Иоанна на сограждение обители благословение испроси, и како из Великаго Новаграда к северным странам отъиде, и в Корельстей земли на велицем езере Нево[293] тако нарицаемо, в Коневский отокъ вселися, и со иконою, иже име от Святыя горы, юже и доныне в своей обители благодатию Божиею целу и невредиму снабде, еще же и Уставъ иноческаго жительства от Святыя горы с собою принесе, и како пребысть на отоце скитским житиемъ тригодищное время. И потом благоизволением и милостию человеколюбца Бога, помощию же и заступлением и молитвами Святыя горы игумена Иоанна и иже тамо отецъ, такоже благословением и молитвами архиепископа Иоанна, и иже о нем священнаго собора, своими же посты и подвиги, и труды, и ученикъ его и братьи, иже в то время сошедшихся сожительствовати ему, чюден и честенъ храм воздвиже во имя Пресвятыя и Всенепорочныя Владычица нашея Богородица и Приснодевы Мария, честнаго и славнаго ея Рожества, и киновь велик согради, и братии множество совокупи, и тем законъ по древних святых отецъ уставу предастъ, паче и яко же во Афонстей горе виде, тако же и сам с ними добре постничествова, и Богу по премногу угоди.
Его же добродетелное житие написати потщахомся не самоизволением обьяти бывше, но обители его отцемъ повелению повинувшеся, паче же верою и любовию к тому святому отцу влекоми и от того вперяеми. Аще и несмы на се доволни, но человеколюбца и даров подателя Исуса Христа Бога нашего на помощъ призывающе и слова во отверзение устъ просяще, и молитвамъ преподобнаго отца споспешьствовати нам надеющеся, по сицевое дело коснухомся. Той бо святый отецъ добродетелным си житием Богу угоди и бысть небесными добротами утворенъ, и в добродетелех свершенъ. Стецемся убо, о любимицы, того душевных доброт созерцати. Управим же очеса разума нашего быстреиша, да некако что от того доброт видения отчюждимся. Того убо чюдное житие Богъ возлюби и прият, и аггели удивишася и похвалиша, и имя его написано есть на небесехъ. Темже потщимся духовне вси и в честней его памяти торжествуим светло, начальствующеи убо — яко началнику боголюбну, ученицы — яко учителю премудру, чада — яко отцу чадолюбцу, ликъ составльше и подобную честь воздающе.
И откуду убо сей толикий и таковый муж возсия, еда от Иерусалима ли от Синая? Несть убо, несть от Иерусалима, ни от Синая, но славная Росийская страна и Великий Новград того произведе и возрасти, и во благочестии укорени, и в смирении насади, и в воздержании укрепи, и в чистоте воспита, и во благоговеиньстве житие его створи, и милостыни прилежати научи, и в любви сверши, и во святыни содержа, и страх Божий в сердце его всади, и душу его в любовь Божию распали, и во иноческое жительство того препусти, и от мирскаго мятежа отведе, и постническому лику причета, и заповедей хранениемъ Господеви присвои.
Времяни же лет рождения его и звания мирскаго, и родитель, иже по плоти его родиста и святым крещением просветиста, именования обрести не возмогохомъ, прехождения ради многих лет. Но обаче отца имяста всех создателя, к немуже все возложеся, монастырь же — вышний Сион, егоже постигнути потщася, сродники же — лики святых, ихже житию и стопам последова блаженный преподобный отецъ Арсение, о немже ныне повести воспоминания и слова сказания нам предлежит. век
<Глава 1>. Начало житию блаженнаго
Сей убо преподобный и блаженный отецъ нашъ Арсений родися в славном Великом Новеграде от благоверну и христолюбиву родителю. Воспитан же бысть в добре наказании и учении и во всяком благоговеиньстве и чистоте. Пребываше же в страсе Господни и день от дне преспевая в делех Божиих, игры же и смехотворная словеса, якоже обычай есть юным, ненавидяше и гнушашеся. И сладких брашен не ядяше, но паче воздержание любяше и того лобзаше, и всех тленных мира сего отнюдь не возлюби, но измлада изволи единому Богу работати. Тем и ко святым церквам часто приходя и Божественых словес со вниманием послушаше, и сих прочитанием услаждаем бываше.
По сем же вданъ бысть родителема своима на учение ремественому делу. Мастеру же повелевающу ему делу касатися, отрок же со усердием повеленая ему творяше и тако вскоре изучися сему делу, и бысть медный ковачь. Вдасть же ся многому труду и подвигу, и деле своем прилежаще, и в тех дни своя провождая, и нищим милостыню от труда своего со тщанием подаваше, бе бо зело милостивъ и любя выну молитися Богови со тщанием, и весьма в Божиих пребываше. Темже Божественою любовию разгоревся, изволи отрещися мира, и поработати Богови в безмолвии, еже благодати Божии поспешествующи сотвори. Оставль бо родителя своя и имения, и стяжания, и всех житийских отвергъся, и иде во един от монастырь, зовомый Лисья гора,[294] и восприят на ся святый аггельский образ. Вкупе же со отъятием влас и всяко мудрование плотское отрезает, и в жесточайшее вдастъся житие, и во всяко послушание в службах монастырьских выну работая, не дая себе покоя. Уста же его николиже праздна бываху от молитвы Исусовы, но присно моляшеся Богу. И вся узаконеная иноком со многим тщанием творяше, во всякой добродетели тщаливно трудяся, и желаше болших подвигъ и свершеныя добродетели, помышляше, како обрести наставника блага у како удобно есть ему спастися. Но не лишит Господь жадающих полезных, но желание их ко благому исполнит.
294