Благоверный же царь государь и великий князь и сынове его повелеша на том месте церковь поставити, идеже обретеся чюдотворная икона. И монастырь девъ повеле устроити, и келии поставити, и ограду монастырю оградити, и милостыню доволну повеле дати из своей царские казны священному собору и игуменье, и 40 сестрам урок летний, — еже и бысть. И церковь поставиша во имя святыя Богородицы честнаго ея Одегитрия древяну, и ограду монастырю сотвориша.
Честную же ону и чюдотворную икону Пресвятыя Богородица отнесоша в монастырь с молебным пением, со кресты, архиепискуп и боляре со всемъ народом проводиша честно. Предиреченную же девицу Матрену постригоша в том же монастыри, и наречено бысть имя ей Мавра во иноких. Не по мнозе же времени пострижеся и мати тоя девицы.
Поставиша же и другую церковь — теплую, с трапезою, во имя Рожества Пречистыя Богородица. И абие нача являти Богородица чюдеса своя.
Человекъ некто из Свияжскаго града[40] люте болезнию одержим бе, и приведен бысть к пречистому и чюдотворному образу з женою своею, и молящеся с теплою верою Богородицы — и не отпаде прошения своего: получи здравие, и отыде в дом свой радуяся.
Некогда убо отроча материю своею принесено в церковь слепо очима. Мати же его стояше пред образом Богородицы, с плачем моляшеся о прозрении отрочате. Отроча же внезапу нача рукама осязати по лицу матерь свою. Народи же убо вси моляшеся Пречистыя образу, архиепископъ же стояше на месте своем, зряше на отроча и виде сие, яко отроча матерь свою рукама осязаше. И повеле принести яблоко красно и показати отрочати. Отроча же и яблоко нача хватати, и вси истину увидевше, яко прозре отроча, и славу воздаша Христу Богу и Пречистой его Матери Владычицы нашей Богородицы, творяще дивная чюдеса.
Некто же сынъ боярский,[41] именем Ивашка, тако нарицаем, прослутием же Кузминской, у него же бе жена болна ногами; не можаше ими нимало двигнути, болезнь бо велми одержаше ю, и ничим же себе не можаше помощи, но паче труднее бываше. И абие повеле себе принести к чюдотворному образу Пречистей Богородицы; и молебная отпевъ, со многою верою и со слезами моляшеся, милости прося, — и абие получи здравие, и отойде в дом свой радуяся.
Бысть же убо в веси сына боярскаго Василия Рагозина: некоего поселянина жене явися Святая Богородица, и веляше ити ей к Пречистыя образу, иже есть в Казани, и поведати мужу своему, дабы шед молился чюдотворному образу. Она же не внят речемъ Ея и мужу не сказа. Явижеся убо и второе сама Владычице: и абие некая Божественая сила взя руку ея и удари ю по лицу ея, и бысть рука ея суха. Жена же прииде во град и поведа все по ряду архиепископу случшаяся ей. И прииде к чюдотворному образу — и получи здравие, и абие «утвердися рука ея, якоже и другая»,[42] и отиде в дом свой радуяся.
Человекъ некто во граде Казани, именем Исак, прореклом Бык, некоторыя вдовы сынъ, именем Улиты, верны сущей, боящейся Бога, на посаде проскурни[43] верховных апостолъ Петра и Павла, и бысть в раслаблении полтретия годы. Болезнь же его бе всем знаема живущим окрестъ: неможаше велми ногами, и до полу.
И посла матерь свою к чюдотворному образу Пречистыя Богородицы молебная пети. Сам же убо в дому своем на одре лежаще, и начат со слезами предо образомъ плакати и молитися Пресвятей Богородицы, дабы ему самому видети чюдотворный Богородицын образ. И в том часе виде себе мало легчайши от болезни; и абие, милостию Пречистые Богородицы, востав о собе на ногах и начат помалу поступати. И вземъ два посоха, и абие, подпираяся ими, поиде в монастырь к чюдотворному всемилостивому Богородицы образу.
О великих ти чюдес, Богородице! Матери со слезами о сыну молящися, сынъ же ненадежно и самъ в монастырь прииде! Мати же его виде и изумися, и едва во ум прииде, и нечаемое известно уведе. И приложиша к слезам слезы, молящеся Богородицы о исцелении, и тако до конца получи здравие. И воздаша хвалу и славу Господу Богу и Пречистей Богородицы, месяца апреля въ 30 день, отойдоша во свой дом, хваляще и славяще Бога, творящего дивная и преславная чюдеса.
Жена некоего пришелца Полоцкаго, попа Григория, живяше в селе в Тагашеве (тако бо звашеся место то), именем Елена, бысть же болна очима три лета. И абие убо от многия тоя болезни и зрак отъяся, яко уже не видети ей нимало. И услыша убо многая и преславная чюдеса от иконы Пречистые Богородицы во граде Казани, и пойде во град к чюдотворному образу милости просити. И еще убо ей не дошедши града Казани яко седми поприщ,[44] и абие внезапу узре свет очима, и мнетися ей, яко николиже ими болна бе. И пришед в монастырь к чюдотворному образу, хвалу воздаде Господу Богу и Пречистой Богородицы.
40