Архиепископъ же приим чюдную ту икону Пречистые Богородицы, со кресты и со инеми чюдотворными иконами, изыде отъ царствующаго града в пятокъ и стены градные окрестъ обхожаше и молебная совершающе. По сем же приносят чюдную ту икону Пречистые Богородицы в преждереченный град обозъ и поставляютъ во церкви чюдотворца Сергия, идеже царское христолюбивое воинство пребываше, и тамо непрестаныя молитвы къ Богородицы возсылают. Назаутрия же отшествия Царицыны чюдные иконы, в день суботный, благочестивый царь и великий князь Федор Ивановичь всеа Русии отпусти против нечестивых варвар изрядного своего правителя Бориса Федоровича и с нимъ послал многих бояр своего царского синклита и многа воинства; самъ же паче на молитву подвигся и всехъ сущих своих укрепляя и на молитву подвизая. И скоро быти пременению от злых возвещает, яко не боятися ополчения беззаконного оного царя. Якоже убо и древле великий боговидец Моисей избранное израилтеское воинство изооруживъ и отпусти на нечестиваго Аммалика,[85] самъ же, на гору возшед, молитвы и моления возношаше всехъ Содетелю и Владыце о спасении всех людех моляшеся; такоже сей великий самодержецъ непрестанныя к Богу молитвы и моления возсылая, да в мире и в тишине сохранитъ богохранимую державу царствия его непоколебимую, и о избавлении града от нашествия неверных пророчествуя, глаголя: «Аще ли убо сей окоянный царь и со тщанием прииде на мое достояние, но помощию Божиею и заступлением Пречистые Богородицы и великихъ чюдотворцов со срамом паки и с велицемъ студом во своя возвратится»; еже и збыстьсяпо словеси его.
Великий же и изрядный воевода Борис Федоровичь и со всею сущею с ним ратию изыде от царствующего града яко поприщь пять и ста на реце, на Котле, тако зомово, ожидая оного окоянного царя пришествие. И своим бодроопасным разсужениемъ самъ окрестъ воинства непрестанно обходитъ и полки изрядно устрояетъ и к бранному ополчению всехъ поощряетъ и не отпадати надежда повелеваетъ и на подвиг всехъ укрепляет. И егда беззаконный царь достиже близ царствующего града Москвы, тогда убо и он изрядный благочестиваго царя достохвалный воевода Борис Федоровичь от полка своего посылаетъ избранных воин противъ нечестиваго оного царя.
Бе же убо тогда лето 7099-го месяца июля въ 4 день, в день неделный; полцы рустии брань поставиша с нечестивыми немалу и весь день той на розличных местех окрестъ царствующего града Москвы бьяхуся непрестанно. Сам же изрядный правитель, непобедимый воин Борис Федоровичь с протчими воинскими силами и со многим огнебранным оружиемъ в той день стояща в прежереченнем граде обозе, идеже икона Пречистые Богородицы, молящеся непрестанно и помощи на сопротивных просяще. Весь же день той и нощь со всех стен градных из великиихъ огнедыхающихъ пушекъ непрестанно стреляху и изо всехъ обителей, иже близ царьствующего града Москвы, такоже непрестанно стреляюще и многих от поганых побивающе.
Безбожный же царь в той день к вечеру прииде в царское село, нарицаемое Воробьево. Бе же то Воробьево близ царьствующего града яко поприща три, тамо же бе горы велики, зело превысоки. Оттуду же узре окаянный царь красоту и величества всего царьствующего града и великие каменоградные стены и златом покровенные и пречюдно украшенныя божественныя церкви и царския великия досточюдные двоекровные и трикровные полаты; паче же слышавъ великий тресновенный гром и неизреченный гласовом звук, иже бысть от великого во граде и изо обитель пушечного стреляния. Видевъ же окоянный царь благочестивых сопротивное ополчение, зело убоявъся, и ужас велий нападе нань, и вскоре возвратися со всем своим злочестивым воинством и побеже с велицем страхом, ниже от пути в нощъ мало почити хотяще. И на бегство устремишася,[86] тыл къ Русе показающе, и все, еже в плене взятое окрестъ царствующего града, все на пути оставляюще. Гоними убо невидими быша гневом Божиимъ и заступлениемъ великия и непостыдныя нашея предстателницы Пречистые Богородицы и молитвами великих чюдотворцов руских вскоре вси посрамишася; яко и самый окоянного оного царя возокъ на пути в реце обретоша рустии полцы оставленъ, и многия вещи на пути повержены лежаще: се же убо все окоянныи они мечюще, себе облегчающе суетнаго ради скорого бегъства своего.
85
86