Наутрия же бранного ополчения великий изрядный воевода Борис Федоровичь, видевъ нечестиваго оного царя отшествие и все его съ нимъ богомерского воинства возвращения и уведевъ известно, яко помощию Божиею и Пречистые Богородицы и великих чюдотворцовъ руских заступлением отидоша противнии посрамлении и на бегъство вси устремишася, посылает вскоре в царствующий град к благочестивому самодержцу, возвещая ему нечестиваго царя и сущих с ним возвращение. Слышавъ же великий самодержецъ, яко беззаконный царь со всемъ своим богомерским воинством посрамлении оттойдоша вскоре, приходит в соборню церковъ Пречистые Богородицы с великою радостию, благодарныя песни Богови возсылающе и того Пренепорочной Матери, Владычице нашей Богородицы, неложной заступницы, истиной християнской предстателнице, хвалу благодарение преносяще, молебная совершающе. Возвещаетъ же о семъ отцу своему богомолцу Иеву патриарху и всему освященному собору; они же, слышавше сия, руце на небо воздевше, благодарно Богови вопияху, со слезами глаголюще: «Десница твоя, Господи, прославись в крепости, десная твоя рука, Господи, сокруши враги, и множеством славы твоея стерль еси супостаты наша».[87]
Благочестивый же царь и великий князь Федор Ивановичь всеа Русии падаетъ пред иконою Пречистые Богородицы, иже нарицается Владимерская, и, от многия радости источники слез от очию своею изливая, глаголаще: «Благодарю тя, о Пресвятая Госпоже Дево, Владычице Богородице, християнская непостыдная заступница, яко великое свое милосердие днесь показала еси на нас! Якоже и древле самый царствующий Констянтинград избавила еси предстателнымъ заступлением от нахождения прегордаго перскаго воеводы Хоздроя[88] или якоже и древле, Владычице, сохранила еси жребий достояния твоего, сей нашъ царствующий град в нахождение злосквернаго царя Темир-Аксака пришествием пречистые иконы твоея, тако и ныне, Владычице, явила еси на нас превеликие своея милости пучину и щедроты и человеколюбия бездну преславно и паче надежди избавила еси насъ и град нашъ от нахождения окоянного варвара, сего злочестиваго варвара царя и сущих с ним. И всегда, Владычице, неотступно буди, спасая стадо свое ото всякого обстояния и невредны сохраняя нас и все отечество наше Росиския державы, яко да непрестанно величаем заступление твое, Владычице!» По семъ же великий самодержецъ приходитъ к целбоносным и многочюдесным мощемъ великихъ чюдотворцовъ руских Петра и Алексея и Ионы, такоже припадая, моляся прилежно, благодарение приносяще: «О велицы святителие и заступницы и хранителие царствию нашему и о нас к Богу неусыпни молитвеницы! Вашим предстателством ныне царьствующий град нашъ сохранен и невредимъ бысть от нашествия окоянного сего злочестиваго царя; и что имам воздати вам, велицыи чюдотворцы, противу толикому вашему милосердию и заступлению?» Великий же достохвалный воевода Борис Федоровичь, пришед в царствующий град и благочестивому царю и великому князю Федору Ивановичю всеа Русии достойное поклоняние сотворивъ, возвещает ему вся по ряду, како Божиею милостию и Пречистые Богородицы заступлением и великих чюдотворцовъ молением и его царскимъ счастиемъ окаянный царь крымский устрашися, побеже и все свое богомерзское воинъство с собою отведе; к сему же возвещаетъ похваляя и христолюбиваго царского его воинства супротив ратных храброе ополчение.
Великий же самодержец, слышав сия, зело возрадовася и от радости многи слезы испусти и к Богу велие благодарение изрече, яко не браннымъ ополчениемъ, ниже острием меча супротивнии победишася, но Божиим неизреченным человеколюбиемъ и Пречистые Богородицы заступлениемъ нечестивии постыдешася и во своя с великимъ студом возвратишася. Царь же великий князь Федоръ Иванович всеа Русии благодарив Бога и Пречистую Богородицу и сотвори брак великъ в царских палатах своих и трапезу многоядну устрои, на ней же самъ зело веселящеся, о избавлении града от безбожных варвар неизреченною радостию радовашеся, изрядного жь своего правителя Бориса Федоровича зело почтивъ и всему своему царьскому сигклиту и всему христолюбивому воинству велие учрежьжение творяше на трапезе в полатах своих. Тогда жь благочестивый самодержец по совершении царьского стола своего приемлет от своея царьския выя златокованную чепъ, еяже ношаше в почесть великого своего самодержавънаго царьствия, и возлагает на выю достохвалному своему воеводе Борису Федоровичю, достойную честь победе его воздая и симъ паки на немъ прообразуя царского своего достояния по себе восприятия и всего превеликого царьствия Русийскаго скифетродержателства правление, еже последи Божиимъ смотрениемъ не по мнозех летех царьское его на семъ пророчество совершися. Бояром же своим и всему христолюбивому воинству такоже свое царское великое милосердие и жалованья неоскудно ко всем простирая.
88