По сем же вскоре прииде отецъ его и богомолец Иев патриархъ и со освященнымь собором, и царю и великому князю Федору Ивановичю всеа Русии достойное поклонение сотворше и благословение подастъ. Боляре же возвестиша патриарху царьское видение и глагол его, еже сказуя о мужи, предстоящим одра его. Патриархъ же начат вопрошати его: «О великий государь царь и великий князь Федор Иванович всеа Русии! Возвести ми, бомолцу своему, и не утаи мя явления сего, отца твоего, яко да мною, нищимъ, и всемъ будет явлено Божие великое человеколюбие и твое царьское добродетелное к Богу исправление». Царь же и великий князь Федор Иванович всеа Русии нача патриарху глаголати: «Се прежде вмале пришествия твоего бе у меня мужь светелъ в ризах святителских и повелеваяй ми итти с собою»; и поведа ему вся подробну, яко и боляром преже сказоваше.
Патриархъ же, слышав сия ото устъ благочестиваго царя, зело удивися о бывшем чюдеси и благодарив Бога, глаголя: «Благодарю тя, Владыко человеколюбче Господи, яко неизреченнаго ради своего милосердия излиял еси на ны превеликого своего человекалюбия пучину, и не остави от нас прещедрыя твоея милости; якоже и древним святым царемъ избраннымъ твоимъ анггелы посылая имъ явления, показуя к нам образъ твоего человекалюбия, сице и сему рабу твоему благочестивому царю послал еси анггела твоего свята, мирна хранителя и всему благочестивому его царьствию. Молим же и о семъ великое твое благоутробие, да послеши к нам богатую твою милость отъ святаго жилища твоего и славы, и да подаси сему благочестивому царю, верному слузе твоему, душевное спасение и телесное здравие; и воздвигни его, премилостивый Боже, от одра многовременныя болезни и умножи, Господи, лета его, якоже древле Езекея[91] царя Израилева! И призри, Господи, на молитву моего смирения и сотвори с нами великую милость твоего человеколюбия: зриши бо, Владыко, яко днесь оставляемся сиры и без заступления. Ты бо реклъ еси, Владыко, пророкомъ твоимъ: „Призови мя в день печали твоея и избавлю тя";[92] и ныне, Владыко Боже Пресвятый, удиви на нас милость твоего смотрения, яко да прославимъ святое и покланяемое имя твое, яко благословен еси во веки; аминь».
И по семъ благочестивый царь повеле патриарху святити себе маслом. Патриарх же со всем освященным собором вскоре облекся во вся священныя одежда, начен же освящение масла, и по совершении божественнаго пения помазуют благочестиваго царя святым маслом во имя Отца и Сына и Святаго Духа. Царю же болезни зело належащи, и к часу ужь исходному начат приближатися, повелеваетъ благочестивый царь патриарху себе исповедати и причастити Пречистых Таин, предстоящимъ же у одра его повелевает вон изыти всемъ. Патриархъ же вскоре, исповедав благочестиваго царя, и причащает Пречистых и Животворящих Таин тела и крови Христа Бога нашего. И в девятый час тоя жь нощи благочестивый царь и великий князь Федор Иванович всеа Русии ко Господу отиде; тогда убо просветися лице его, яко солнце.
Слышасте, братие, повесть страшну, слышасте ли вещь, всякие печали и сетования исполнь сущу, яко всех Владыко и Господь вернаго своего слугу и блаженнаго раба святую душу с миром приемлет? Толико убо мирно успе, елико ни единому от сущих предстоящих одру его разумети святое преставление его; якоже убо всегда звезда предваряетъ солнце и неразлучна пребывает, сице сего благочестиваго царя святая душа словом изыде и никакоже потрепета ни единем удъ телеси его, но якоже некоимъ сладкимъ сномь успе. О таковых убо глаголет пророкъ: «В мире вкупе усну и почию, яко ты, Господи, единаго на упование вселил мя еси».[93] Сей убо благочестивый царь, по пророку, в мире предастъ святую свою душу Господеви и проиде в место крова дивъна даждь до дому Божия, почиет во веки в недрах Авраамовех со всеми святыми, иже во благочестии просиявшими цари.
Отселе убо что реку и что возглаголю? Слез настоящее время, а не словес; плача, а не речи; молитвы, а не бесед. Или откуду начну произносити слово плачевнаго повествования? Кое ли преставлю начало слезнаго излития? Како ли возвещу время скорбнаго рыдания? Како же и коснуся делу преисполнену уныния? Како ли возмогу подробну сказати случившуюся скорбь в земли благочестивыя Руския державы? Хотех убо словомъ изрещи, но грубость разума запинает ми и язык утерпевает и души уныния наносит; хотех же и писанию предати, но руку скорбь удержевает ми. Аще ли же начну словомъ поведати, кто возможет послушати? Которое ли слово по достоинству сказати возможет? Или кий язык дерзнет глаголати? Или который слух вонметъ послушати преисполненаго плача времени начало? Зде убо пророческая вещания слово на нас яве совершися: «Кто дастъ главе моей премногую воду и очесемъ моим источник слез?»,[94] яко да плачю доволно настоящую скорбь сию. О сем же инъ пророкъ глаголетъ: «Весь день сетуя хождах».[95] Мы же не дневное время сетованием провожаемъ, но настоящее время скорби нашея печалию все исполняемъ.
91