И молитъ Истванъ онехъ купцевъ, дабы за его прошение отписали во град Еневъ къ Викентию, чтобы во Александрию скоро пришелъ, яко: «Вси твои залоги в руце твои возвратятся, и печаль твоя на радость преложится, и взыдетъ печаль на главу оскорбившему тя. Ты же безо всякаго сомнения подщися приити не мешкавъ. О семъ бо твоемъ пришествии вси поручаемся, яко не водще твое пришествие будетъ во град Александрию». Оныя же купцы по прошению Иствана писаша во градъ Еневъ ко оному купцу Викентию и за поручениемъ своимъ с великою верностию. И по семъ Истванъ моли оных купцевъ, чтобы то его моление к нимъ тайно было и никто бы того отнюдъ не ведалъ, дондеже Господь Богъ по своей праведной воли что сотворитъ. Купцы же Иствану сие сотвориша за велиею клятвою, яко ни единъ разве ихъ может ведати, доколе Викентий во Александрию приидет.
И послаша к Викентию верна человека сь епистолиею. Викеньтий же епистолию прочетъ и недоумеваяся, дивяся бывшему, глаголя в себе: «Господи Боже мой, ты вся веси! Что сие бысть? И кто может толикую печаль от сердца моего отъяти, иже мя в конецъ сокруши? Но обаче[341] буди воля твоя надо мною, Боже и Творче мой, Создателю и Избавителю, твори, еже благоволиши». И тако упование свое возложи на Господа Бога Вседержителя, глаголя: «Буди имя Господне благословенно отныне и до века, аминь». И тако пойде в путь свой. В пути же его помогая ему во всемъ Господь Богъ. И скоро приплове во град Александрию.
Истванъ же реченный, жена Викентиева, зело соблюдаше лукаваго Амбросия и надзираше его, дабы не ушелъ из града Александрии. И часто его к себе емлюще, и всячески его угостевая и любовь к нему яко ко присному другу показоваше, и самъ его посещаше всегда, чимъ бы его удержати до Викентия. И единою[342] того Амбросия Истванъ приведе пред лице салтаново и первее упокоивши его всякими питии с великою честию. И похвалися Истванъ пред салтаномъ милостию оного Амбросия, яко драгими вещми одари его. И положи Истванъ пред салтаномъ оныя драгия вещи, клейноты и поясъ, и перстень драгоценный. Салтанъ же видевъ тыя драгия вещи, зело дивися и начатъ Амбросия вопрошати: «Како и откуду таковыя драгия вещы в руку твоею приидоша?» Амбросий же, не чая себе ничего злаго, поведа салтану всю истинну, яко похваляяся или величание себе в том творяше. Салтанъ же удивляяся, а Истванъ, слушая, от великия болезни сердечныя воздохнувъ, обаче яко некое новое благополучие обрете — очима плачася, сердцемъ же велми радуяся.
И услыша Истванъ от онехъ купцевъ, яко Викентий во Александрию прииде. И начатъ Истванъ молити царя салтана, да повелитъ пред себе купцевъ представити, Викентия от града Еневы да Амбросия, иже от града Пляцентии. Салтанъ же для моления вернаго и любимаго своего слуги Иствана повеле к себе боляръ своих и думных созвати и седе с ними на судище, и онехъ купцевъ вскоре повеле пред собою представити. Викентий же и Амбросий сташа пред царемъ. И абие Истванъ принесе оныя драгия вещи, клейноты и поясъ, и перстень драгоценный, и положи на столъ пред царемъ и пред всеми боляры. И паде пред царемъ Истванъ и начатъ со слезами у царя просити милости: «Прошю тя и молю, вседержавнейши и великий царю, сотвори судъ между нами праведный. Сия драгия клейноты и поясъ, и перстень, еже за твою царскую ко мне милость даровалъ ми есть сий онъ купецъ Амбросий. Изволи, великий царю, вопросити его при всехъ предстоящихъ и приседящихъ твоему царскому сигклиту, где онъ, Амбросий, и какимъ промысломъ сия драгия вещы досталъ, дабы онъ при твоей царской милости и пред всемъ твоимъ честнымъ сигклитомъ истинну поведал». Царь же салтанъ тако рекъ: «Зело бо азъ имею в памяти прежнее Амбросиево о сихъ вещехъ поведание, но токмо сигклитомъ и всемъ боляром о семъ истину поведай». И рекъ Амбросию: «Повеждь ми при всехъ самую истинну и не погреши ни в чемъ. Не убойся мене, ниже кого постыдися. Аще будетъ сия вина, но обаче явенъ грехъ малу вину творитъ. Слышахъ бо азъ про сего купца Викентия, яко былъ есть зело благославенъ в куплехъ своихъ, но како в толикое убожество прииде, не весть бо зде никто же, токмо ты, Амбросие. Поведай правду сигклитом моим. А азъ от тебе прежнее поведание добре в памяти своей вемъ. Поведай ныне истинну свою явъ, да вси слышащии уведят».