Текст издается полностью. Пропущены лишь ошибочно повторенные в списке слова и словосочетания, реже — испорченные чтения, не поддающиеся истолкованию. Во всех этих случаях пропуск обозначается многоточием в скобках.
При переводе неясных по смыслу мест учитывались чтения армянской версии «Повести об Акире»; все эти случаи оговорены в примечаниях.
ДЕВГЕНИЕВО ДЕЯНИЕ
Подготовка текста, перевод и комментарии О. В. Творогова
ОРИГИНАЛ
Бе некая вдова царска роду и предала себя ко спасению, от церкви николиже отхождаше. И бысть у нея три сыны велелепны и велеозарны, молитвою же матери своея деюще храбрость о делех своих. У той же въдовы бысть дщерь велелепна и велеозарна красотою лица своего. И услыша о красоте девицы тоя Амир, царь Аравитские земли,[37] и собра войска своего множество много и поиде пакости творити в Греческой земле, для ради красоты девицы тоя. И прииде в домъ вдовы тоя и восхитив прекрасную девицу Амир царь мудростию своею и невидимъ бысть никимже въ Греческой земле, но токмо виде единая жена стара дому того; а мати ея в то время бысть у церкви Божии, а сынове во иной стране на ловле.
И прииде же вдова та от церкви Божии, и не обрете прекрасной своей дщери, и нача вопрошати в дому своем от раб своих и рабынь о прекрасной своей дщери, и рекоша ей вси рабы дому ея: «Не ведаем, госпожа, дщери твоей прекрасной». Но токмо едина жена стара дому того видела и сказала госпоже своей вдове: «Прииде, госпожа, Аравитцкие земли Амир царь, и исхитив дщерь твою, а нашу госпожу, мудростию своею, и невидимъ бысть въ земли нашей».
И слышав же то вдова от рабы своея и нача терзати власы главы своея и лице, и нача плакати о прекрасной своей дщери и рече: «Увы мне, окаянной вдовице, аще бы были чада моя дома, да, шедъ бы, угонили Амира царя и отняли бы сестру свою». По мале же времяни приидоша в домъ чада ея и видевше плачь матери своея, и начаша вопрошати матери своея: «Скажи намъ, мати наша, кто тя обидил, царь ли или князь града сего? Токмо нас не будетъ в животе, то же ты обидима будешь». Рече жь имъ мати их: «Чада моя милая, никимже не обижена града сего, развее имели есте у ся вы едину сестру, и та ныне исхищена руками Амира, царя Аравитцкие земли, и урва ми сердечное корение и унзе мя, яко бездушную трость. А ныне заклинаю вы, чада моя возлюбленная, да не преслушати вамъ заповеди моея: идите вы, и угоните Амира царя и отоймите сестрицу свою прекрасную. Аще сестры своея не возмете, и вы и сами тамо главы своя положите за сестрицу свою, и я оплачу всех вас, яко безчадна есмь». И рекоша же сынове ея: «Мати наша милая, не скорби ты о томъ, дай нам благословение свое и молитъву; вскоре скрыемъ путь свой».
И препоясаша на себя оружия своя и вседоша на кони своя, и поехаша, яко златокрылатые ястребы, кони же под ними яко летаху. И доехаша сумежья Срацынския земли и сретоша некоего срацынина, стража бдуща, и начаша братаничи вопрошати его: «Повежьдь нам, братии, колко до жилища вашего Амира царя?» Срацыненин же изовлече мечь свой и течаше на них дерзостно, а чающе, яко беглецы суть, а не ведая их дерзости. Скочив же их меншей братъ и ухватив же срацынина за горло, и примча его ко братии своей, и хотяше его убити. Рече же болшый братъ: «Братия моя милая, чемъ намъ о срацыненина мечь свой сквернить, и мы осквернимъ о самого Амира царя, той бо есть намъ виненъ». А сего срацыненина привезаша на горе у древа, а сами поехаша путемъ темъ, и сретоша иных многих стражей Амира царя от великия реки, рекомыя Багряницы;[38] бяше же их числомъ 3000. Видеша же братия великую стражу Амира царя, и рече же имъ болшый братъ: «Братия моя милая! Во единомъ ли месте намъ ехать на стражу Амира царя?» И рече середний братъ: «Братия моя милая! То есть стража великая Амира царя, и мы разделимъся натрое». Болшый братъ поеде съ правыя руки, середний в болшый полкъ, а меншый с левую руку, и поскочиша на Амировых стражей, и начаша их бити, яко добрые косцы траву косити: овиих изсекоша, а овиих связаша и приведоша их на гору высоку, и гнаша их передъ собою, яко добрый пастухъ овца, и пригнаша их на гору и побиша. Токмо тремъ мужемъ животъ даша провожения ради ко Амиру царю. И начаша ихъ вопрошати: «Повеждьте намъ, срацыняне, во граде ли вашъ Амир царь пребываетъ или вне града?» Отвещав же имъ срацыняне: «Господие три братие! Амир царь нашъ вне града пребываетъ, за семь поприщь[39] от града, и под темъ градомъ многие шатры у него стоятъ, а въ шатер во един многия тысячи вмещаются силныхъ и храбрых кметей: един на сто напустить». И рекоша же братаничи: «Братия срацыняне! Аще ли бы мы не боялися Бога, давно бы вас смерти предали, но вопрошаемъ вас: повеждьте намъ, каков шатер Амира царя вашего?» Рекоша же им срацыня: «Амира царя шатеръ черлен, а по подолу зелен, а по шатру златомъ и сребромъ и жемчюгомъ укаченъ и драгимъ камениемъ украшенъ; а у брата его шатер синь, а по подолу зеленъ, а по шатру такоже златомъ и сребромъ украшен, а иные разные многия шатры стоятъ, а в них пребываютъ многия кмети, а емлютъ у царя прибытку на годъ по 1000 и по 2000, силнии и храбрии суть: един на сто человекъ наедетъ». Братаничи же отпустиша техъ срацын трех ко Амиру царю своему. И рекоша им: «Отнесите словомъ вести ко Амиру царю, да не рекъ бы он такъ Амир царь, что мы приидоша к нему татемъ». И рече срацыняномъ братаничи: «Поидите вы восвояси». Срацыняне же ради бысть отпущению ихъ, сказаша царю своему.
36
37
38
…
39
…