И ту есть близь пещера, иде же лежать телеса 7-ми отрок, иже спали 300 и 60 лет:[27] при Декии цари[28] успоша, а при Феодосии цари[29] явишася. В той же пещере 300 святых отець лежит; и святый Александръ[30] лежит ту, и гроб Магдалыни Марьи и глава ея; и святый апостолъ Тимофей, ученикъ святаго апостола Павла, в ветсемъ гробе лежить. И ту есть в ветсей церкви икона святыя Богородица, ею же святии препреша Несториа еретика.[31] И ту есть баня Диоскоридова, идеже работал Иоаннъ Богослов с Прохором у Романы. И видехом пристанище то, идеже Иоанна Богословца море изверже;[32] ту стояхом три дни; и зоветься пристанище то Мореморное. Ефесъ же град есть на сусе, от моря вдале 4 верст, в горах; обилен же есть всем добромъ. И ту поклонихомся святому гробу тому и, благодатию Божиею храними и молитвами святаго Иоанна Богословца, идохомъ, радующеся. А от Ефеса до Сама острова[33] верстъ 40. И в том острове рыбы многы всякы и обилен есть всем остров-от. А от Сама до Кария острова верстъ 20.
А отъ Кариа до Патма острова верстъ 60. На стране далече в мори Патмъ остров. В томъ острове Иоаннъ Богословець Еуангелие написал, егда заточен бысть с Прохором. Таже оттуда Леросъ островъ, таже Калимнос островъ, таже Нисера островъ, таж и Кос островъ, велик зело. Тот островъ богатъ велми всемъ, и людьми, и скотом. Таже Тилос островъ, и въ сем острове мука Иродова кипит серою горящею; и ту серу, варяче, продають, мы же огнь вытинаемъ. Таже Харкия островъ. И ти острови вси с людми и скотом близь себе суть по ряду, яко по десяти верстъ или болши межи собою.
Таже Род островъ,[34] велик и богатъ всем велми. И в томъ острове был Олегь князь русскый 2 лете и 2 зиме.[35] А от Сама до Рода острова 200 верстъ, а от Рода до Макрии[36] 60 верстъ. И въ том граде и по земли той по всей, нолны до Миръ, ту ражаеться темьянъ черный игоифит.[37]
И тако ражаеться темьанъ черный игофит: из древа исходит аки мезга, и снимают железом острым. Имя древу тому зигия,[38] и есть яко олха образом древо то. А другое древце есть мало, образом яко осина, но есть имя древцю тому рака;[39] и есть въ древци том червь великъ, яко поноровъ[40] вболе есть, за корою древца того. И точит древце то черв-етъ, и исходит из древца того червоточина та, яко отруби пшеничны, и падают от древця того, яко клей вышневый. И то сбирают людие и смешивают с первореченным древом и, вложивше в котел, и тако варят темианъ гоифит; и кидають в мехи, продають купцем.
А от Макрии до Патера града[41] верстъ 40. И ту есть рожество святаго Николы, то его есть и отчина и род — Петера. А от Патеры до Миръ,[42] идеже гробъ святаго Николы, есть верстъ 40. А от Миръ до Хилидония[43] верстъ 60. А от Хилидония до Кипра великаго острова верстъ 200.
Кипръ есть островъ великъ зело, и множество в нем людий, и обиленъ есть всем добром. И суть в нем епископи 24, митрополия же едина. А святыхъ въ нем бе-щисла лежит: и ту лежит святый Епифание,[44] и апостолъ Варнава,[45] и святый Зинон,[46] и святый Трифолие епископъ,[47] и святый Филагриос епископ[48] егоже крестилъ апостолъ Павелъ.
И ту есть гора высока зело, и на той горе святаа Елена крестъ поставила[49] кипарисенъ велик на прогнание бесомъ и всякому недугу на исцеление и вложила въ крестъ честный гвоздь Христовъ. И бывають ту, на месте том у креста того, знамения велика и чюдеса и доныне. Стоит же на въздусе крест-отъ, ничим же не придержится к земли, но тако Духомъ Святымъ носимъ есть на въздусе. И ту недостойный азъ поклонихся святыни той чюдной, и видехъ очима своима грешныма благодать Божию на месте том, и походих островъ тъи весь добре.
И ту ражаеться темиянъ, ладан: спадает с небесе, и тако взимают на древцих. Суть бо по горамъ темъ древца многа и низка, с травою равна, и на том падаеть темианъ тъ добрый. И емлють его июля месяца и августа; въ иныя же месяци не спадывает, но токмо в та два ражаеться.
А Кипра до Яфа града верстъ 400, все по морю ити. От Царяграда до Рода острова 8 сот верстъ; а от Рода до Афа 8 сот верстъ. То ти всего пути по морю до Афа есть верстъ 1000 и 600. Яфъ же есть град на брезе близь Иерусалима, и оттоли поити по суху къ Иерусалиму. И есть от Афа до Иерусалима верстъ 30, по полю 10 верстъ или до святаго Георгиа:[50] ту была церковь велика создана во имя святаго Георгиа, ту бо и гроб его во олтари был, ту же есть мученикъ святый Георгие. И воды многи суть ту; и ту опочивають странници у воды тоя, но съ страхом великим: есть бо пусто место то, и близь есть Асколонь град,[51] выходять бо оттуду срацини и избивають странныя на путехъ тех, да ту есть боязнь велика, от места того входя в горы. И есть от святаго Георгиа до Иерусалима верстъ 20 великих, но все въ горахъ каменых. И тий путь тяжекъ и страшенъ зело.
27
31
32
34
35
39
44
46
47
48
49
50
51