Туже был домъ Соломонь, и силно было здание его, и велико велми, и зело красно. Мощенъ был весь мраморными дъсками и есть на комарах утверженъ, и воды исполнен весь дом-отъ был. Храми же создани были красни зело, и хитро мусиею украшено изрядно и столпи мраморяни драгаго мрамора и красно поставлени стоят по ряду; и комары на столпех техъ создани суть хитро, и покрыт оловом весь. И ту суть врата дому того, красно зело и хитро покрыта оловом, мусею исписана и покована медию позлащеною. И та врата зовуться Красная, идеже Петръ и Иоаннъ исцелиста хромца одного,[93] и есть место то у врат техъ и доныне.
А иныя врата суть троя кроме тех, а 5-я врата суть Апостольская. Та бо врата Давыдъ пророкъ създалъ есть. Твердо и дивно хитростию врата суть сделана: медию позлащеною покована была издну, исписана хитро была по меди, а извну железы поковна была твордо. И суть 4-ры двери у вратъ тех. И та бо суть врата осталася толко ветхаго здания, ти и столпъ Давыдовъ, а ино здание все ново есть. Ветхий бо град Иерусалимъ разоренъ есть весь не единою. И теми враты вшелъ есть Христос в Иерусалимъ от Вифаниа с Лазаремъ, егда въскресилъ Лазаря Христос.[94] Вифаниа на всток лиць противу Елеоньстей горе. И есть отъ тех вратъ до церкви Святаа Святыхъ сажень 100 и 50.
Вифаниа же от града Иерусалима вдалее двою версту, за горою во удолне месте. И есть Вифаниа градок малъ к полуденью лиць от Иерусалима. И влезучи есть во врата градка того, на десней руце есть пещера, и в той пещере есть гробъ святаго Лазаря. И в той келии Лазарь болелъ, ту же и умерлъ был. И есть посреде градка того церкви велика, создана вверхъ и исписана добре была вся. И есть от церкви тоя до гроба Лазарева сажен 12; и есть гробъ Лазаревъ от церкви к западу лиць, а церковь къ встоку лиць. И пред градом к западу лиць есть вода добра зело, и есть глубоко в земли, по степенемъ влести къ ней. А оттуда есть къ Иерусалиму лиць столпъ от Вифаниа вдале версты; и на том месте усрела Марфа Исуса; ту паки на осля всел Христос, егда Лазаря въскресивъ.
Фепсиманиа же есть село, идеже есть гробъ святыя Богородица, близь града Иерусалима на потоце Кидардьстемъ въ Удоле плачевнем, и есть отъ Иерусалима межи встока лиць летнимъ и зимным.
И есть от врат градных сажень 8 до места, идеже Охония жидовинъ хоте сврещи тело со одра святыя Богородица, егда несяхуть е погребать апостоли в Гепсиманию. И утя ему аггелъ обе руце мечем, и положи я на нем.[95] И есть на месте том был монастырь женьскый, и ныне же разорено есть от поганых.
И оттуда до гроба святыя Богородица есть сажен 100. И есть гробъ Святыя Богородица въ удолне месте: пещерка была мала в камени изсечена, дверци имущи малы, яко можеть человекъ влести наклонься; и во дне в пещере той противу дверцам яко лавица засечена в томже камени пещернемъ, и на той лавици положено бысть тело честьное Пречистыя Владычица нашеа Богородица, и оттуда же взято бысть въ рай, нетленно суще. И есть пещерка та дне мужа възвыше, а вшире 4 лакоть всямокачна, а около теремцем оделана красно мраморными дъсками. А врьху, над гробом святыя Богородица, создана была церкви велика велми клетьски, во имя святыя Богородица Успения; ныне же разорено есть от поганых место то. И есть гробъ святыя Богородица исподи под великим олтаремъ тоа церкви.
А от гроба святыя Богородица есть сажень 10 до пещеры, идеже преданъ бысть от Июды жидом на 30 сребреницех.[96] И есть пещера та об онъ пол потока Кедарьскаго при горе Елеоньстей.
И ту есть место близь пещеры тоя, яко довержеть человекъ каменемь малымъ, и есть къ полуденью лиць место то, идеже помолися Христос Отцу своему в нощи, в нюже преданъ бысть на распятие июдеем, и рече: «Отче, аще возможно есть, да минеть чаша си от мене».[97] И есть на месте томъ ныне создана церквица мала. А оттуда есть дострела вдалее до гроба Асафатова; и то есть былъ царь июдейскъ и потому зоветься та дебрь Асафатова.[98] И ту есть близь в той же дебри гробъ святаго Иякова, брата Господня.[99]
93
94
95
96
97
98
99