Имать же святый Софеи множьство кладязъ съ сладкими водами, оприч тех, иже въ стенах церковных и промежу стенъ, и не познати их равно со дном, рекше, помостом церковным. Суть же колца железны вбиваны въ мраморъ, мрамор бо зовется камень гладокъ и красенъ вельми. Тако же и кандилъ множество неисчетно въ святой Софии: иная же въ пределех и в комарах, а инии въ стенах и промежи стенъ и во улицах церковных, идеже иконы великыя стоят, и ту кандила с маслом древяным горят. И ту, грешнии, приходихом съ слезами и радостию, по силе свещи подавахом, тако же и у мощей святых. Святы Софеи имат дверей 365, тако же и престолов, окованы хитро велми. Инии же от них загражени за оскудение.
А о святей Премудрости Божии умъ человечь не может сказати и исчести, но что видехом, и написахом.
Идучи же от святыа Софии мимо столпъ Иустиниановъ, мимо малы тръгъ, нарицаемы Милии, мимо святаго Феодора, на гору поити великою улицею — Царевым путемъ. Подшед не далече доброго стрелца перестрелъ, ту стоить столпъ правовернаго царя Констянтина от багряна камени, от Рима привезенъ. На връх его крестъ, в том же столпе 12 коша укрух,[14] ту же и секира Ноева лежит. Ту патриархъ лето провожаеть.
И оттоле идохомъ назад къ святей Софеи, ту близ церкви великия Ирина святая,[15] а оттоле недалече святая Богородица монастырь женскы, зовомъ Итерапиотица, ту лежит святая Евдокиа. И оттуду на подолъ к морю идучи, святы великы мученикъ Георгий, нарицаем Ирюни, рекше — «Непобедимая сила». Ту стоят Страсти Господня, замчены и запечатаны царевою печятию. На Страстной недели царь сам с патриархом отпечатывают и целуют, а потомъ не възможно их видети никомуже. Ту лежит тело святы Анны, и целовахом, грешнии. И ту за стеною над морем явися Христосъ самъ, и ту церковь, нарицаемая «Христос стоит», ту лежит множество болящих, и от инех градов привозят, и приимают исцелениа. И ту лежит святы Аверкии, и целовахом тело его. То бо место подобно есть Силуямли купели, иже въ Иерусалиме.
И оттоле идохомъ в монастыръ святыя Богородица, иже зовется Перечь.[16] Ту лежит глава Иоанна Златоустаго,[17] и поклонихомся и целовахом. И оттоле идохом в монастырь Понахрандов,[18] ту — глава святаго Василиа.[19] И оттоле не далече монастырь Пандънасу,[20] и ту суть Страсти Господни, на двое разделены.
И оттоле идохом, въ вторникъ, къ святей Богородици выходней иконе,[21] ту бо икону Лука евангелистъ написалъ, позираа на самую госпожу девицу Богородицю, и еще живе и́ сущи. Ту икону въ въсякой вторникъ выносят. Чюдно велми зрети: ту сходится весь народ, и из градовъ. Икона же та велика велми, окована гораздо, и певци пред нею поют красно, а народи вси зовут: «Кирьелесонъ», с плачем. Единому человеку въставят на плеща встанно, а он руце распрострет, аки распятъ, тако же и очи ему запровръжеть, видети грозно, по буевищу мычет его семо и овамо, велми силно повертывает им, а онъ не помнит ся куды его икона носит. Потом другий похватить, и той тако же, таже третей и четверты подхватывают, а оне поют с диакы пение велико, а народ зовет: «Господи, помилуй!» с плачем. Два диакона держать рипиды,[22] а иные кивотъ пред иконою. Дивно видение: 7 человекъ или 8 въставят на плеча одиному человеку, а онъ, аки простъ, ходитъ изволением Божиим.
И оттуду, идучи к монастырю Инеяклесиа, рекше къ 9-и чиномъ церкви и въ одиной церкви ту Христос велми гораздо, аки живъ человекъ, образно стоить, не на иконе, но собою стоить. Ту же дворъ, нарицается «Полата правовернаго царя Констянтина»: стены его высоки велми, выше городных стен, великъ, граду подобенъ, под подрумием стоит, при мори. Ту близ монастырь Сергиа и Вакха, и целовахом главы ею. То все посолнь водится, подръживая по левую руку городную стену, възле море.
От подрумия поити мимо Кандоскамии,[23] туто суть врата городная железна решедчата, велика велми; теми бо враты море введено внутрь города. И коли бываетъ рать с моря, и ту держат корабли и катарги, до треюсотъ. Имеет же катарга веслъ 200, а иная 300 весел, в тех судех по морю рать ходить. А оже будет ветръ, а они бежат и гонят, а корабль стоит — погодия ждеть.
14
15
16
17
19
21