И по томъ по неколицех днехъ останок собравше поганое латины,[82] и пришед тайно, и взяша с украины неколико псковскых селъ, и възвратишася вскоре. И боголюбивы же князь Домонтъ не стерпе обидиме быти земли и дому святыа Троица от нападениа поганыхъ немець, выехавъ в погоню с малою дружиною в пяти насадах[83] с шестьюдесятью мужь псковичь, Божиею силою 8 сотъ немец победи на реце на Мироповне,[84] а два насада бежаше в ыныа островы. Боголюбивый же князь Домонтъ, ехав и зажже островъ, и пожже ихъ под травою, а инии побегоша, а власи их зажжени горятъ, а иных иссече, а инии истопоша в воде пособием святыа Троици, и славнаго великого воина Георгиа,[85] и молитвою благовернаго князя Всеволода, месяца априля в 23 день, на память святого славнаго мученика Христова Георгиа. И възвратишася с радостию великою въ град во Псковъ, и бысть радость и веселие въ граде во Пскове о пособии Святыа Троица и святого воина великого Христова мученика Георгиа.
Слышав же местеръ земля Ризскиа[86] мужство Домонтово, ополчився в силе тяжце без Бога, и прииде ко Пскову в корабляхъ и в лодьях и на конехъ, и с порокы, хотя пленити домъ Святыа Троица, а князя Домонта руками яти, а мужъ псковичь мечи иссечи, а иныа люди плесковскыа в работу ввести. Слышав же то Домонтъ, ополчающася люди без ума во множстве силы, без Бога, и вниде въ церковь Святыа Троица и, положивъ мечь свой пред олтаремъ Господнимь, пад, моляся много с плачемъ, сице глаголя: «Господи Боже силъ, мы, людие твои и овца пажити твоея, имя твое призываемъ, призри на кроткиа и смиренныа възвыши, и гордыхъ высокиа мысли низложи, да не опустиеть пажить овць твоих».[87] И взем же игуменъ Сидоръ[88] мечь, и всь иерейский чинъ, препоясавше мечемъ, и благословивша и отпустиша. Домонт же въ множестве ярости мужства своего, не дождавъ полковъ новъгородцких, с малою дружиною с мужи съ псковичи выехавъ, Божиею силою победи и изби полки ихъ, самого же местера раниша по лицю. Они же трупьа своя многи учаны[89] накладоша, везоша в землю свою, а останокъ ихъ устремиша на бегъ, месяца июня в 8 день, на память святого мученика Федора Стратилата принесению мощей.
И паки же по временех княжениа его начаша поганая латына силу деати на псковичехъ нападениемъ и работою. Боголюбивый же князь Тимофей не стерпе обидимъ быти, ехавъ с мужи съ псковичи, и плени землю и грады их пожже.
И потомъ по мале времени бысть знамение в луне, месяца септября. Тоа же зимы грех ради наших изгониша немци изгонною ратью посад у Пскова, в лето 6807-е, месяца марта въ 4 день, на память святого мученика Павла и Ульаны, и избиша игумены. Тогда убиенъ бысть Василей, игуменъ святого Спаса,[90] Иосифъ прозвутеръ, Иасаф, игуменъ святей Богородици Снятной горе,[91] и с ними 17 мнихъ, и черньца, и черници, и убогыа, и жены, и малыа детки, а мужь Богъ ублюде. Въ утрий же день погании немци оступиша град Псков, хотяще его пленити. Боголюбивый же князь Тимофей не стерпе дождати мужь своихъ болшея рати и выехал с малою дружиною с мужи съ псковичи и с Ываномъ с Дорогомиловичем[92] и сь его дружиною, противо имъ вполчився. Помощью Святыа Троица у святого Петра и Павла на березе[93] удари на нихъ; и бысть сеча зла, якоже николиже не бывала у Пскова, и раниша самого мендеря[94] по главе, а вельневици,[95] изъимаве, посла к великому князю Андрееви,[96] а прочии вскоре повергъша оружиа и устремишася на бегъ страхомъ грозы храборства Домонтова и мужъ его псковичь.
Тогда же беаше и моръ золъ на людех.
Сей же бе князь не одинем храборъством показанъ бысть от Бога, но и боголюбець показася, в мире приветливъ, и церкви украшаа, и попы и нищаа любя, и вся праздники честно проводя, и попы и чернца кормля, и милостыню даа и сиротамъ и вдовицамъ. Якоже рече Исайя пророкъ: «Князь благъ въ стране, уветлив, боголюбивъ, страннолюбецъ, кротокъ, смеренъ, по образу Божию; Богъ бо мира не аггеломъ любить, но человекомъ щедря си ущедряеть и показуеть милость свою на мире».[97]
И прославися имя князей нашихъ во всех странахъ, и бысть имя их грозно на ратехъ, и быша князи княземъ и воеводы воеводамъ, и бысть грозенъ гласъ ихъ пред полкы, аки труба звенящи, и бысть побежаа и не бе победими, якоже бе и Акрита,[98] единъ побежая полки в крепости силы своеа. Такоже и великий князь Александръ[99] и Дмитрей сынъ его с своими бояры, и с новогородци, и съ зятем своимъ с Домонтомъ и сь его мужи с плесковичи побежаа страны поганыа Немець, Литву, Чюдь, Корелу. То единаго ли ради Езекея съхраненъ бысть Иерусалимъ от пленениа Синахиримля, царя Асурска.[100] Паки же и великимъ княземъ Александром, и сыномъ его Дмитреемъ, и зятемъ его Домонтомъ спасенъ бысть град Новгород и Псковъ от нападениа поганыхъ немець.
82
85
86
87
88
91
93
94
95
96
97
98
100