Сего блаженнаго великого князя Михаила Ярославича несть лепо в забвение ума оставити, но на свещнице проповедания оставити, да вси, видящи свет богоразумнаго князя жития, терпения, конечная страсти его, просветят сердца своя умная светомъ немерцаемыя благодати. Аз же, аще грубъ сый и невежа есмь, но ревностию любве господина своего палимъ есмь. Убояхся оного раба лениваго, съкрывшаго талантъ господина своего в земли, а не давшаго добрымъ торжником, да быша сътворили сторицею.[119] Но паки боюся и трепещу своея грубости: како въспишу от многа мало, известити о конечней страсти блаженнаго Христова воина, великого князя Михаила Ярославича, еже сътворися в последняя времяна въ дни наша. Се и начиная молитися: «Владыко Господи Исусе Христе, подай же ми умъ и разумъ и отверзи ми устне, да възвестят хвалу твою, да провещаю подвигъ блаженнаго раба твоего».
В последняя бо лета Господь нашь Исус Христос, Слово Божие, родися от пречистыя девы Мария Богородица, и приятъ страсть, исправляя падения рода нашего, и въскресе в третий день, и възнесеся на небеса.[120] В день пятдесятный посла Господь нашъ Богъ Духъ свой на апостолы,[121] оттоле начаша учити, обходяще вся страны, и крестити въ имя Отца и Сына и Святаго Духа, и в себе место поставляаху патриархи и митрополиты, епископы же и прозвитеры. Господь же премилостивый Богъ божественым своимъ промышлениемъ на последний векъ яви благодать свою на русскомъ языце: приведе великого князя Владимера русскаго въ крещение; Вълодимеръ же, просвещенъ Святаго Духа благодатию, введе всю землю русскую въ крещение.[122] Оттоле распространися святая вера по всей земли, и бысть веселие и радость велика в новопросвещенных людехъ; точию единъ дияволъ сетовашеся, побеждаемъ от тех, имиже преже техъ чтим бываше, жертву приимая и вся угодная. Сего не терпя, врагъ душь наших опрометашеся, льстивый, како бы съвратити с праваго пути ихъ; и вложи в сердце ихъ зависть, ненависть, братоубийство; нача въсхитити и имения сынъ подо отцемъ, брат менший под старейшим братомъ, умножися неправда и злоба многа въ человецехъ, и предашеся въ слабость света сего скороминующаго. Господь же премилостивый Богъ, не терпя видети погибающа от диявола род нашь, претяше намъ казньми, хотя нас обратити от злобъ нашихъ, посла на ны казнь, овогда глад, овогда смерть въ человецехъ и скотехъ; конечную пагубу преда нас в руце измаилтяном.[123] Оттоле начахомъ дань даяти по татарьскому языку. И егда коему княземъ нашим доставашеся великое княжение, хожаше князи русстии въ Орду къ цареви,[124] носящи множество имения своего.
По великомъ жестоком пленении русстемъ минувшимъ лет 34.[125]
Сей блаженный, приснопамятный и боголюбивый великий князь Михайло бысть сынъ великого князя Ярослава, внук же великого князя и блаженнаго Всеволодичя, скончавшагося нужною смертию въ Орде за крестьяне. Роди же ся от блаженныя, въистину от преподобныя матери, великие княгини Ксении;[126] его же святая та и премудрая мати въспита въ страсе Господни и научи святымъ книгам и всякой премудрости.
Князящу же ему в вотчине своей въ Тфери, преставися великий князь Андрей[127] въ Тфери, благослови его на свой стол, на великое княжение, сего христолюбиваго великого князя Михаила, емуже по старейшинству дошелъ бяше степени великого княжения.[128] И поиде въ Орду къ царю,[129] якоже преже бывши его князи имеаху обычай тамо взимати княжение великое.
В то же время сыновецъ его князь Юрий[130] поиде въ Орду же. Бывшу ему в Володимере, блаженный и приснопамятный митрополит Максимъ всея Руси[131] со многою молбою браняше ему итти въ Орду, глаголя: «Азъ имаюся тебе съ княгинею, с материю князя Михаила, чего восхочешъ изъ отчины вашея, то ти дасть». Он же обещася, рекъ: «Хотя, отче, поиду, но не ищу княжения великого».
120
121
122
123
124
125
126
127
128
129
130
131