И бывшу ему во Орде, не хотяше добра роду крестьяньскому дияволъ вложи в сердце князем татарьским свадиша братию, рекоша князю Юрию: «Оже ты даси выход болши князя Михаила, тебе дамъ великое княжение». Тако превратиша сердце его, нача искати великого княжения. Обычай бе поганых, и до сего дни — вмещущи вражду между братьею, князи русскими, себе многия дары взимаютъ.
И бывши пре велице между има, и бысть тягота велика в Руси за наша беззакония и съгрешения. О том рече пророкъ: «Аще обратитеся ко мне и останетеся от злобъ ваших, то вложу любовь княземъ вашим, аще ли не останетеся злаго обычая вашего, ни покаетеся от многих беззаконий своих, всякою казнию покажню вас».[132] Но милостию пречистыя Богородица и всех святых прииде благоверный великий князь Михайло и посаженъ бысть на столе деда и отца своего у святей Богородици в Володимере блаженым и преподобным Максимом, митрополитомъ всея Руси.
И князившу ему лето в великомъ княжении, и седе инъ царь, именем Озбякъ.[133] И виде Богъ мерьскую веру срацинскую,[134] и оттоле начаша не щадити рода крестьяньска, якоже бо о таковых рекоша царския дети, въ плену в Вавилоне сущии, глаголаху: «Предасть ны в руце царю немилостиву, законопреступну, лукавнейшу паче всея земля».[135] Егда бо Господь Титу предасть Иерусалимъ, не Тита любя, но Иерусалимъ казня. И паки, егда Фоце преда Царьград, не Фоцу любя, но Царьград казня за людская прегрешения.[136] Еже и си нас деля бысть за наша согрешения. Но мы бывшее възглаголемъ.
Оттоле нача быти вражда между князема сима, а еще сваристася многажды миръ межю собою, но врагъ дияволъ паки рать въздвизаше. И паки бывшимъ княземъ во Орде, бывши пре велице межю има; оставиша Юрия у себя въ Орде, а князя Михаила отпустиша в Русь. И минувшу лету, паки безаконнии измаилтяне, не сыти суще мздоимьства, егоже ради желааше, вземши многое сребро, и даша Юрию великое княжение, и отпустиша с ним на Русь единого от князь своих, беззаконнаго треклятаго Кавгадыя.[137] Блаженный же великий князь Михайло срете его с вои своими, послалъ князю Юрию, рекъ: «Брате, аже тебе далъ Богъ и царь великое княжение, то азъ отступлю тебе княжения, но в мою оприснину не въступайся». Роспустя вои свои, поиде в вотчину свою з домочадци своими.
Паки не престаетъ дияволъ, желаетъ кровопролития, еже сотворися за грехи наша. Прииде князь Юрий ратию ко Тфери, совокупя всю землю Суздальскую, и с кровопийцем с Ковгадыемъ множество татаръ, и бесерменъ, и мордвы, и начаша жещи городы и села. И бысть туга и скорбь велика, поимающе бо мужи, мучиша разноличными ранами и муками и смерти предаяху, а жены ихъ оскверниша погании. И пожгоша всю волость Тверскую и до Волги, и поидоша на другую страну Волги, в той стране то же, хотеша сътворити.
Блаженный же великий князь Михайло призвавъ епископа своего, и князи, и бояре и рече имъ: «Братие, видите, княжения отступился есмь брату моему молодшему, и выход далъ есмь, и се над темъ, колика зла сътвориша в отчине моей, аз же терпях имъ, чаяхъ, убо престанет злоба сия. Наипаче вижю, уже головы моея ловят. А ныне не творюся, в чем ему виноватъ буду или в чем виноватъ, скажите ми». Они же, яко единеми усты, съ слезаами рекоша: «Господине, правъ еси во всемъ пред сыновцемъ своим. Тако въ смирение сотворил еси, се взяша всю волость твою, а на другой стране в отчине твоей то же хотятъ сотворити. А ныне, господине, поиди противу имъ, а мы за тебя хотимъ животом своимъ». Блаженный же великий князь Михайло такоже съ многимъ смирениемъ рече: «Братие, слышите, что глаголетъ святое Евангелие: иже аще кто положит душу свою за други своя, велик наречется въ царствии небеснемъ. Нам же не за единъ другъ, ни за два положити душа своя: селико народа в полону, и инии избиени суть, жены же и дщери ихъ осквернени суть от поганыхъ; а ныне мы, иже за толика народа положим душа своя, да вменится намъ слово Господне въ спасение».
И утвердившеся крестомъ честнымъ, и поидоша противу ратным. И яко быша близъ себе, бысть видети ратных бесчисленое множество; яко съступишася полци, и бысть сеча велика; не могуть брани носити противнии и вдаша плещи свои; милостью бо святаго Спаса и пречистыя его Матери и помощию великаго архаггела Михаила победи великий князь Михайло; бысть видети бесчисленое множество ратных, падающих под конми язвени, аки снопы в жатву на ниве.
133
134
136
137