Цесарь же объеждааше вкруг града почасту, укрепляя стратигъ и воин, такоже и всех людий, да не отпадут надежею, ни ослабляют съпротивлением на врагы, но да уповають на Господа вседрьжителя — той бо нашь помощник и защититель есть; и пакы обращашеся на молитву.
Турки же по вся места бьяхуся без опочиванья день и нощь, пременяющеся, не дающе нимала опочити градцкиим, но да ся утрудят, понеже уготовляхуся къ приступу; и так творяху отбои до 13 ден. В 14-й же день турки, откликнувше свою безбожную молитву, начаша сурны играти и в варганы и накры бити[40] и, прикативши пушкы и пищали многие, начаша бити град, такоже стреляти и из ручных и из луков тмочисленых. Гражане же от бесчисленнаго стреляния не можаху стоати на стенахъ, но, западше, ждаху приступу, а инии стреляху ис пушек, ис пищалей, елико можаху, и многы туркы убиша. Патриархъ же и святители и весь священнический чин бяху непрестанно молящеся о милости Божии и о избавлении града. Егда же туркы начааху — уже всих людий съ стен збиша, абие вскрычавши все воинство и нападоша на град вкупе со всех стран, кличюще и вопиюще, овыи со огни различными, овыи с лествицами, овыи съ стенобитными хитростьми, и ины многы козни на взятие града. Градцкие же люди такоже вопияху и кричаху на них, бьющеся с ними крепко. Цесарь же объежаше по всему граду, понужая люди свои, дающе им надежу Божию, и повеле звонити по всему граду на созвание людем. Турки же паки, услышавше звон велий, пустиша сурныа и трубныя гласы и тумбан[41] тмочисленых. И бысть сеча велиа и преужасна: от пушечного бо и пищалного стуку, и от зуку звонного, и от гласа вопли и кричаниа от обоих людей, и от трескоты оружия — яко молния бо блистааху от обоих оружия — также и от плача и рыданиа градцкых людей, и жон, и детей, мняашеся небу и земли совокупитися и обоим колебатися, и не бе слышати друг друга что глаголеть: совокупиша бо ся вопли, и крычаниа, и плач, и рыданиа людей, и стук пищалный и звонъ клаколный в един зук, и бысть яко гром велий. И паки от множества огней и стреляниа пушек и пищалей обоих стран дымное курение згустився, покрыло бяше градъ и войско все, яко не видети друг друга съ кем ся бьет, и от зелейнаго духу многим умрети. И так сечахуся имаяся за руки на всех стенах, дондеже нощная тьма их раздели: туркы убо отыдоша въ свои станы и мертвыа своя позабывше, а градцкие людие падоша от труда яко мертвы, токмо страж единыхъ оставиша по стенам. Наутрия же повеле цесарь собрати трупиа, и не обретоша людей: вся бо бяху спяща утрудився. И посла цесарь къ патриарху, да повелит священником и дьяконом собрати мертвыа и погрести я. И абие собрашася множество священник и дьяконов и взяша мертвыя и погребоша их. Бяху же числом греков 1740, а фряг и армен 700. Цесарь же, взем боляр, поиде по стенам града, хотяще видети ратных, понеже не бе от них ни гласа, ни послушаниа, вси бо бяху опочивающе. И видеша полны рвы трупиа, а ины в потоцех и на брезех; и пометиша всех убьенных до 18 тысячь и стенобитныа сусуды мнози, ихже повеле цесарь пожещи. И тако поиде съ патриархом и съ святители и со всеми съборы в святую великую церковь молбы и благодарение вздаяти всесилному Богу и пречистые Богоматере, чаяху бо уже отступити безбожному, толико падение видев своим.
Он же, безверный, не тако помышляаше, но в 2 день посла видети мертвыя своя, и яко сказаша ему много мертвых, вскоре посла мнози полкы взяти трупиа своя. Цесарь же заповеда, да не деют их никоторою бранью, яко да очистят рвы и потоци. И тако взяша своя трупы безбранно и пожгоша и́. Видев же безбожный туркъ, яко не успе ничтоже, но паче своих погуби, и повеле магистром вскоре прибавити пушки и пищали мнози на битье града и ины стенобитныя козни готовити. И в седмый же день паки безверный повеле ити войску къ граду и тако ся бити, якоже и первие, без опочивания.
Цесарь же Костянтин посылаше по морю и посуху въ Аморею къ братии своей, и въ Венецею и въ Зиновию о помощи. И братия его не успеша, понеже распря велия бе межу ими, и с арбанаши ратовахуся. И фрягови не восхотеша помощи, но глаголаху в себе: «Не дейте, но да возмутъ й туркы, а у нихъ мы возмемъ Царьградъ». И тако не бысть ниоткуду помощи. Един токмо зиновьянин князь, именем Зустунея,[42] прииде царю на помощь на дву караблях и на дву катаргах[43] воруженных, имеа съ собою 600 храбрых. И проиде сквозе все рати морскиа турского и доиде до стены Цесаряграда. Его же видев, цесарь обрадовася зело, дающе ему честь велию, понеже ведом бяше цесарю. И тако испроси у цесаря хужшее место града, идеже болши приступают туркове. И придаде ему цесарь людий своих на исполнение двою тысящь, и бьяшася съ туркы толма храбро и мужествене, яко отступити от того места всемъ туркомъ и к тому не приходити на то место. Зустунея же не токмо свое место снабдяше, но и по стенам града обхожаше и укрепляше и наставляа люди, да не отпадутъ надежда, и на Бога упование неподвижно дрьжати, и не ослабляти въ делехъ, от всеа душа и от всего сердца братися съ неверными, и — «Господь Бог поможетъ ны». Таковыми убо словесы многыми уча люди и наставляа их, яко изнаказан бе дозела ратному делу, и возлюбиша его вси людие и послушаху его во всем.
40
42