Александръ шествие творя к востоку. Которые волею к нему приидоша, сии честь и прощение от него прияша, которые ему противляхуся, темъ грады разбиваше, иных мечю предаваше.
О семь же страх и трепет вси Асийскии страны обдержаше — и цари Палестиньстии, и Еврейское царьство, и Египетцкое царство. Вси бо тии Дарию подручни бяху, и мнози от нихъ к Дарию притекоша о напрасномъ нашествии македонянъ. Дарий же, царь перьский, с вестми посла ко Александру с листомъ: «Дарий, царь надъ цари, великий, силный гордениемъ и земскою славою, равен богомъ небесным, единако с солнцемъ от востока и до запада. Весть во уши мои прииде, сыну Филиповъ, яко всю Елладию объятъ, и до великаго Рима дошедъ, и вси западныя цари подмял еси, и сихъ до конца затеръ еси, и до Окияна реки дошелъ еси, не точию о семъ доволенъ еси, но и нижнюю Варварию и Ефиопию и вся западныя страны, подручная царьствию моему, поколебалъ еси, и много богатества взялъ еси, и симъ еще не доволенъ еси, на Асию и Фругию, моея земли, наступилъ еси с подобными тебе гусари, с македоняны и отроки. В забитии положилъ еси подручную работу; к перъскому царству вси земьстии прилагаются царие. Да доволенъ буди тебе во отечествии обрестися, Еладиею обладати. Оставляем ти законную дань, юже отецъ твой ко царству моему приношаше. И сие помилование над тобою чиню за неизочтеную твою худость и за безмерную твою наглость, иже с подобными тебе гусарми учинилъ еси. Аще ли сему не повинешися, и силою перьскою поиду на тя и не может тебе вся вселенная предо мною укрыти, пред мечемъ моимъ казнити тя имам».
Приим же Александръ листъ и прочетъ его и в той чась раздра, посла же повеле со гневомъ на древе распяти, а инымъ главы отсещи повеле. Македоняне же приступльше к нему и рекоша: «Царю Александре, не подобаеть ти посла убити». Он же к нимъ рече: «Не ко царю послани суть, но к разбойнику и гусарю». И се рекъ половину их пусти к Дарию и к нимъ рече: «Не зазирайте мене о семъ, но царю вашему ругайтеся, азъ бо царя его имам, а он мене разбойника нарече; да егда вас к разбоинику послалъ есть, тогда вамъ главы отсеклъ есть; царь бо посла никогда не убивает, да вы к разбойнику пришедше, погинули есте. Азъ же не яко разбойникъ, но яко царь живот вамъ дарую». Они же к нему рекоша: «Аще нас убиеши, царю Александре, самъ себе делом разбойника наречеши. Дарию же малу тшету нанесеши, закон же царьский нами разориши, но умилися о нас, доволни бо есми имя твое в Персиде прославити». О семъ слове Александръ умилися и к Дарию их с листом посла: «Александръ царь Дарию, перьскому царю. Листъ твой приимъ и писания твоя в нем прочтох и благодарих, понеже не бе в немъ царского устава, ни подобия. Ты претиши нам, како западныя царства приемше, разорили есми. Ведомо да есть ти, яко всякъ человекъ ищетъ от нижних на вышняя преити и взыти, и се мы разумевше, на западе прияли есми и на востокъ идемъ. Ты претиши намъ, глаголя: “Вся вселенная полна есть имени моего и не может тебе укрыти и всехъ македонянъ”, ихже гусари наречеши. Ты велиши нас бити и ухватити, а мы к царству твоему сами идемъ. Да аще нас младых и крепких мниши быти, но паче камени адаманта твердейши явимся тебе, паче перцовых зернъ лютейши, государие всему твоему наречешся. На великий промыслъ надеемся, емуже ты противишися равен быти. Но не утаися в персехъ, противу насъ изыди. Сут бо жены украшены с тобою, македоняне же суть лвове неутолимии, волею своею смерть за живот купуют». Дарий же листь Александровъ прочет, ярости и гнева напонився, рече к послу, иже бяше ходилъ ко Александру: «Коего возраста есть Александр, каков умомъ есть, явите ми, и коего лета рождение его, колика войска у него есть». Они же рекоша к нему: «Лета есть ныне тридесятнаго, ум же многолетенъ в немъ есть, красен же и храбръ есть зело и судитъ право, мудрость же его по листомъ познай, царю, войска же с нимъ видехомъ пятсоть тысяч. Премудрый же Соломан в книгах своихъ пишет: “Посмеяния устъ и поглядание очию, поступанию ногамъ возвещаетъ еже о мужи”». Дарий же все во умъ приимъ и рече: «Воистину сии суть великихъ царей белези, но сему не мню истинну быти». Повеление же по земляхъ своих и странах расписати повеле — на поле Сенар войску собирати повеле, идеже языцы столпъ создали бяху, боящеся втораго потопа нашествия. Ту языкомъ размешение бысть, ту войску собиратися повеле.
Во Иерусалим же и во Египет писа листъ, глаголя: «Не передавайтеся Александру, татеви и гусарю, аз бо силою перскою изручю васъ».
Александръ же вземъ воя своя, во Июдейскую землю и на Еврейское царство во Иеросалимъ отъиде. В то же время обладаше еврейсками сонмищи и Иеросалимскимъ царством пророкъ Бога Саваофа именемъ Еремея. И к симъ царь Александръ посла пусти с листом: «Александръ, царь над цари, сынь Филиппа царя и царицы Алимпияды, ко обретающимся началником Еврейского царства. Да есть вамъ, яко сотворилъ мя Богъ вышний царя паче всехъ царь в роде моемъ и вся западную страну и Рим приимъ, да вас доидох. Аще угодно есть вамъ мне поклонитися и самемъ на отеческих законех быти и отчину и землю без боязни держати, и вестника ко мне с словомъ пошлите и дани войску моему пошлите». Се же слышавше евреиский сонмъ молвою великою одержими бываху; листъ же Александровъ прочетше, вестника ко Александру послаша с листомъ: «Евреиский сонмъ Бога Саваофа людие, живущеи во Иеросалиме, Александру царю радоватися. Елико поведалъ еси намъ, с радостию увидехомъ. Ведомо да есть царствию твоему, яко отнележе преидохом Чермное море, ни единому повинухомся царю, но водимы есми рукою высокою и мышцею непобедимою Саваофа Бога. Се же напоследокъ времен разгневавшуся на ны великому Богу, поработи нас Навходоносору, царю перьскому. Много же летъ в порабощении быхомъ и паки возвратившеся во свою землю и ныне есм.и подручни перской десницы, ейже вся вселенная подручна есть. Аще ли тебе предадимся, ныне или утро Дарий пришед вся красная земли нашей разрушит. Аще ли Дария победиши и острию мечю перскому притупиши, во Иеросалимъ с миром приидеши и царь всей вселенней от еврей наречешися. Аще ли Дария не победиши, во Иеросалимъ невозможно ти внити». Евреи же единого с листомъ послаша ко Александру. Александрь же листь прочетъ и другий отписа к ним, рече: «Александръ, царь над цари, всемъ живущим во Иеросалиме пишу. Елика писасте ко мне, ту познахъ. Не подобает вамъ, людемъ Бога живаго, подручным быти человеку идолослужителю. Да не задержав, ко мне дани принесите. Азъ бо, не поклонився Богу во Иеросалиме, на бой к Дарию не поиду. Ведомо да есть вамъ, яко Дариевы десницы напрасно избавити вас хощу». Вестника же еврейска отправи, а самъ ко Иеросалиму поиде. Пророкъ же Иеремея пришествие его слышав, советъ сотвориша со иеросалимляны: «Добро есть, — рече, — намъ Александра пустити во град. Видехъ бо в нощь сию во сне пророка Данила глаголюща ко мне: “Се грядет к вамъ, о немже азъ древле прорекох, иже бо от персь пострадахомъ, сий Александръ возмездие нам платити имаетъ”». Се же людемъ угодно явися. Александрь же в ту нощь виде сонъ: явися ему пророкъ Иеремея во одеянии архиерея Аарона и рече ему: «Александре, поиди во Иеросалимъ и ту поклонися Богу Саваофу, и поклонився ему, на Дария иди; и сего победивъ, персомъ государь наречешися». Александрь же, от сна воставъ, властелем своим сонъ исповеда и ко Ерусалиму поиде. И приближившуся ему ко граду, слышав же сего пророкъ Иеремея, всякому дыханию на сретение царю поити повеле. Сам же во одежи архиерейской со свещами и с кадилницами стретоша и покадиша. Александръ же, видевъ пророка Иеремею, и ко властелемъ своимъ рече: «Сего пророка видех в сию нощъ». И тако Александръ сседъ с коня и поклонися ему до земли и целова ризы его. Пророкъ же Иеремея покадивъ его и благослови и за руку имъ его, въ церковъ введе, Святая Святых, поклонитися, юже созда Соломан царь. Александръ же вопрошаше пророка: «Возвести ми, в коего Бога веруете?» Пророкъ же рече ему: «Во единаго Бога веруемъ, иже небо и землю сотворил и вся видимая и невидимая, иже око не виде и ухо не слыша, ни на сердце человеку не взыде». О семъ Александръ удивися и рече: «Поистинне велику Богу раби есте вы; да верую аз в него, исповедую, дела бо его яве творитъ; дарую ему дани, иже от вас взял бых яко от прочих языкъ; Богъ вашъ во мне да будет и мирь его со мною да будет». Взем же пророкъ злата много с людми града того и сии ко Александру принесоша. Он же не восхоте взяти ничтоже, но вместо дара дасть Богу Саваофу. И се рекъ, отъиде от земли еврейские, восхоте поити ко Египту. Проводи же его пророкъ Иеремея до полудни и сказа ему пророчество Данила пророка, иже преже бе, ко Александру рече: «На помощъ призывай Бога Саваофа и силу перьскую победити имаеши и всему от востока и до запада царь наречешися, егда вся си совершиши, тогда и близу рая доидеши и ту человеки наидеши, иже не есть от женъ Адамовых, согрешениемъ не живут, дебелостию плотьскою обременении же, якоже и мы, но мирно некако живут, близу аггельскаго жития; сии блажени от Бога наричутся. Сих же увидиши, Александре, вся, иже о возвращении твоемъ, прорекуть ти». И паки рече ко Александру: «Не остави нас в жалости, возми нечто от нас любве ради». Александрь же к нему рече: «Якоже велиши, святый отче, да сотворю». И повеле пророкъ принести камень лихнитарий,