ВО ВТОРНИК НА УТРЕНИ по 1-м стихословии седальны умилительны:
Объятия Отча отверсти ми потщися, блудне мое иждих житие: на богатство неиждиваемое взираяй щедрот Твоих, Спасе, ныне обнищавшее не презри сердце. Тебе бо, Господи, умилением зову: согреших на небо и пред Тобою.
Стих: Господи, да не яростию Твоею обличиши мене, ниже гневом Твоим накажеши мене.
Судище Твое страшное, и суд праведен, дела моя люта: но Сам, Милостиве, предварив мя спаси, и муки свободи, избави, Владыко, от козлищ части: и сподоби мя одесную Тебе стати, Судне праведнейший.
Слава, и ныне, Богородичен: Заченши неопально огнь Божества, и рождши безсеменно источник живота, Господа, благодатная Богородице, спасай Тя величающия.
По 6-й песни мученичен (если нет кондака):
Яко добрии воини, единомудренно веровавше, прещения мучителей не убоявшеся святии, приступисте усердно ко Христу, вземше Честный Крест, и скончавше течение, с небесе победу приясте. Слава укрепльшему вас, слава венчавшему вас, слава действующему вами всем исцеления.
В СРЕДУ НА УТРЕНИ, по 1-м стихословии седальны крестны:
Оружие крестное во бранех, явися некогда благочестивому царю Константину, непобедимая победа на враги веры ради. Сего трепещут сопротивныя силы: сей бысть верным спасение, и Павлу похвала.
Стих: Возносите Господа Бога нашего, и покланяйтеся подножию ногу Его, яко свято есть.
Креста Твоего древу покланяемся, Человеколюбие, яко на нем пригвоздился еси, Животе всех: рай отверзл еси, Спасе, верою приступившему к Тебе разбойнику, и сладости сподобися, исповедался Тебе: помяни мя, Господи, приими якоже онаго и нас, зовущия: согрешихом вси, благоутробием Твоим, не презри нас.
Слава, и ныне, Крестобогородичен: Агнца на древе Агница зрящи с разбойникома, долготерпеливно распинаема Тебе, Слове, и копием в ребра прободаема, восклицаше вопиющи матерски: что странное и ужасное, Сыне Мой, таинство? како покрывает гроб неописаннаго Бога? неизреченно есть совершаемое: не остави Мене, рождшия Тя, Сыне Мой сладчайший.
По 6-й песни мученичен:
Болезньми святых, имиже о Тебе пострадаша, умолен буди, Господи, и вся наша болезни исцели, Человеколюбие, молимся.
В ЧЕТВЕРГ НА УТРЕНИ, по 1-м стихословии седальны апостольстии:
Мрежею словесною плетения витийская, рыбарие тростию Крестною развергше, просветиша языки благочестно, славити Тя, Бога истиннаго. Темже Тебе и песнь укрепльшему их вопием: слава Отцу, и Сыну, слава единосущному Духу, слава теми просветившему мір.
Стих: Во всю землю изыде вещание их, и в концы вселенныя глаголы их.
Премудрые вселенныя ловцы, от Бога приимше милостивное, молите и ныне о нас вопиющих: Господи, спаси страну, и град Твой, и от содержащих лютых свободи, апостолами души наши.
Слава, и ныне, Богородичен: Безматерняго на небеси, паче мысли и слуха, на земли без отца родила еси: Того, Богородице, моли о душах наших.
По 6-й песни мученичен:
Мученики Христовы, молим вси: тии бо молят за спасение наше. И вси приступим к ним с верою: сии источают исцелений благодать, сии полки отгоняют демонов, яко хранителие веры.
В ПЯТНИЦУ НА УТРЕНИ, по 1-м стихословии седальны крестны:
Распеншуся Тебе, Христе, погибе мучительство, попрана бысть сила вражия. Ниже бо Ангел, ниже человек, но Сам, Господи, спасл еси нас: слава Тебе.
Стих: Возносите Господа Бога нашего, и покланяйтеся подножию ногу Его, яко свято есть.
Оружие крестное во бранех явися некогда благочестивому царю Константину, непобедимая победа, на враги веры ради. Сего трепещут сопротивныя силы: сей бысть верным спасение, и Павлу похвала.
Слава, и ныне, Крестобогородичен: Твое предстательство имуще, Пречистая, и Твоими молитвами лютых избавляеми, крестом Сына Твоего везде соблюдаеми, по долгу Тя вси благочестно величаем.
По 6-й песни мученичен:
Страдания похвалою, и венечною почестию, славные страстотерпцы, одеяшеся Тобою, Господи: терпением бо ран беззаконных победиша, и силою божественною с небесе победу прияша. Тех молитвами даруй нам, Боже, велию Твою милость.