И́же и ме́ртвыми и живы́ми облада́яй я́ко Бог, / и святы́ми Твои́ми всю зе́млю просвети́вый, / Соде́телю всех, пою́щия Тя спаса́й.
Богородичен: Мы о Тебе́ хва́лимся, Богоро́дице, / и к Бо́гу Тя и́мамы Предста́тельство; / простри́ ру́ку Твою́ необори́мую / и сокруши́ враги́ на́ша, / Твои́м низпосли́ рабо́м по́мощь от Свята́го.
ИПАКОИ ОСЬМИ ГЛАСОВ
Разбо́йничо покая́ние рай окра́де, / плачь же мνроно́сиц ра́дость возвести́, / я́ко воскре́сл еси́, Христе́ Бо́же, / подая́й мiрови ве́лию ми́лость.
По стра́сти ше́дша во гроб жены́, / во е́же пома́зати те́ло Твое́, Христе́ Бо́же, / ви́деша А́нгелы во гро́бе, и ужасо́шася: / глас бо слы́шаху от них, я́ко воскре́се Госпо́дь, / да́руя мiрови ве́лию ми́лость.
Удивля́я виде́нием, / ороша́я глаго́лании, / блиста́яйся А́нгел мνроно́сицам глаго́лаше: / что жива́го и́щете во гро́бе; / воста́ истощи́вый гро́бы. / Тли Премени́теля разуме́йте Непреме́ннаго. / Рцы́те Бо́гови: коль стра́шна дела́ Твоя́, / я́ко род спасл еси́ челове́ческий.
Я́же Твоего́ пресла́внаго воста́ния, предте́кша мνроно́сицы, / апо́столом пропове́даху Христе́, / я́ко воскре́сл еси́ я́ко Бог, / подая́ мiрови ве́лию ми́лость.
А́нгельским зра́ком ум смуща́юща, / и Боже́ственным воста́нием душе́ю просвеща́емы, / мνроно́сицы апо́столом благовествова́ху: / возвести́те во язы́цех Воскресе́ние, / Го́споду соде́йствующу чудесы́, / подаю́щему нам ве́лию ми́лость.
Во́льною и животворя́щею Твое́ю сме́ртию, Христе́, / врата́ а́дова сокруши́в, я́ко Бог, / отве́рзл еси́ нам дре́вний рай, и воскре́с из ме́ртвых, / изба́вил еси́ от тле́ния живо́т наш.
И́же наш зрак восприе́мый, / и претерпе́вый Крест пло́тски, / спаси́ мя воскресе́нием Твои́м Христе́ Бо́же, / я́ко человеколю́бец.
Мνроно́сицы Жизнода́вца предстоя́ща гро́бу, / Влады́ку иска́ху в ме́ртвых, Безсме́ртнаго, / и ра́дость благове́щения от А́нгела прие́мша, апо́столом возвеща́ху: / я́ко воскре́се Христо́с Бог, / подая́й мiрови ве́лию ми́лость.
КАТАВАСИЯ ВО ВСЕ ЛЕТО (глас 4)
Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.
Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в боже́ственней Твое́й сла́ве / венце́в сла́вы сподо́би.
Седя́й в сла́ве / на Престо́ле Божества́ / во о́блаце ле́гце, / прии́де Иису́с пребоже́ственный, / нетле́нною дла́нию / и спасе́ зову́щия: / сла́ва, Христе́, си́ле Твое́й.
Ужасо́шася вся́ческая / о боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.
Боже́ственное сие́ и всечестно́е / соверша́юще пра́зднество, / богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.
Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог, благослове́н еси́.
О́троки благочести́выя в пе́щи / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.
Всяк земноро́дный / да взыгра́ется, Ду́хом просвеща́емь, / да торжеству́ет же безпло́тных Умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице, чи́стая Присноде́во.
ПЕСНИ СВЯЩЕННАГО ПИСАНИЯ ВСЕДНЕВНИИ [25]
Первый лик глаголет:
Го́сподеви пое́м, сла́вно бо просла́вися. / Коня́ и вса́дника ве́рже в мо́ре.
Таже вторый лик:
Помо́щник и Покрови́тель бысть мне во спасе́ние, / Сей мой Бог, и просла́влю Его́; / Бог отца́ моего́, и вознесу́ Его́.
И паки первый лик:
Госпо́дь сокруша́яй бра́ни, / Госпо́дь И́мя Ему́, / колесни́цы фарао́новы, и си́лу его́ ве́рже в мо́ре.
25
Подобает ведати, аще несть неделя, ниже, Владычний, ниже Богородичный праздник, ни предпразднство, или попразднство их, или празднуемаго святаго, стихословятся песни скоро сице.