И великий князь нашь Игорь, [и князи] и боляре его, и людье вси Рустии послашаны к Роману, и Костянтину и к Стефану, к великим царем Гречьским, створите любовь с самеми цари, со всемь болярьством и со всеми людьми Гречьскими на вся лета, дондеже съяеть солнце и весь мир стоить. И иже помыслить от страны Руския разрушите таку любовь, и елико их крещенье прияли суть [от страны Рускыя], да приимуть месть от бога вседержителя, осуженье на погибель в весь век в будущий; и елико их есть не хрещено, да не имуть помощи от бога ни от Перуна, да не ущитятся щиты своими, и да посечени будуть мечи своими, от стрел и от иного оружья своего, и да будуть раби в весь век в будущий. А великий князь Руский и боляре его да посылають в греки к великим царем Гречьским корабли, елико хотять, со слы и с гостьми, якоже им уставлено есть. Ношаху ели печати злати, а гостье сребрени; ныне же уведел есть князь вашь посылати грамоты ко царству нашему; иже посылаеми бывають от них [поели] и гостье, да приносять грамоту, пишюче сице: яко послах корабль селико6; и от тех да увемы7 и мы, оже с миромь приходять. Аще ли без грамоты придуть, и преданы будуть нам, да держим и храним, дондеже възвестим князю вашему; аще ли руку не дадять, и противятся, да убьени будуть, да не изищется смерть их от князя вашего; аще ли убежавше в Русь придуть, мы напишем ко князю вашему, яко им любо тако створять. Аще придуть Русь бес купли, да не взимають месячна. Да запретить князь слом своим и приходящим Руси еде, да не творять бешинья в селех, ни в стране нашей. И приходящим им, да витають у святаго Мамы, да послеть царство наше, да испишегь имяна ваша, тогда возмуть месячное свое, съли слебное8, а гостье месячное, первое от города Киева, паки из Чернигова и [ис] Переяславля [и ис прочих городов]. Да входять 50, и да творять куплю якоже им надобе, [и] паки да исходять; и мужь царства нашего да хранить я, да аще кто от Руси или от грек створить криво, да оправляеть то. Входяще же Русь в град, да [не творять пакости и] не имеють волости купити паволок лише по 50 золотник; и от тех паволок аще кто крьнеть9 да показываеть цареву мужю, и тъ е запечатаеть и дасть им. И отходящей Руси отсюда взимають от нас, еже надобе, брашно на путь, и еже надобе лодьям, якоже уставлено есть преже, и да возъвращаются с спасением в страну свою; да не имеють власти зимовати у святаго Мамы. Аще ускочить челядин от Руси, по не же придуть в страну царствия нашего и от святаго Мамы аще будет, да поимуть и; аще ли не обрящется, да на роту идуть наши хрестеяне Руси по вере их, а не хрестеянии по закону своему, ти тогда взимають от нас цену свою, якоже уставлено есть преже, 2 паволоце за чалядин. Аще ли кто от людий царства нашего, ли от города нашего, или от инех город ускочить челядин нашь к вам, и принесеть что, да въспятять и опять; и еже что принесл будеть, все цело, и да возьметь от него золотника два. Аще ли кто покусится от Руси взяти что от людий царства нашего, иже то створить, покажнен будет вельми; аще ли взял будеть, да заплатить сугубо; и аще створить [тоже] грьчин русину, да прииметь ту же казнь, якоже приял есть и он. Аще ли ключится
10 украсти русину от грек что, или грьчину от руси, достойно есть да возворотить е не точью едино, но и цену его; аще украденое обрящеться продаемо, да вдасть и цену его сугубо, и тъ показнен будеть по закону Гречьскому, [и] по уставу и по закону Рускому. Елико хрестеян от власти нашея пленена приведуть Русь, ту аще будеть уноша, или девица добра, да вдадять златник 10 и поимуть и; [аще ли есть средовечь, да вдасть золотник] 8 и поимуть и; аще ли будеть стар, или детещь, да вдасть златник 5. Аще ли обрящутся Русь работающе у грек, аще суть пленьници, да искупають е Русь по 10 златник; аще ли купил и будет грьчин, под хрестомь достоить ему, да возметь цену свою, еликоже дал будеть на немь. А о Корсуньстей стране. Еликоже есть городов на той части, да не имате волости, князи Рустии, да воюете на тех странах, и та страна не покаряется вам и тогда, аще просить вой у нас князь Руский да воюеть, да дам ему, елико ему будеть требе. И о том, аще обрящють Русь кубару11 гречьскую въвержену на коемь любо месте, да не преобидять ея; аще ли от нея возметь кто что, ли человека поработить, или убьеть, да будеть повинен закону Руску и Гречьску. Аще обрящють в вустье Днепрьскомь Русь корсуняны рыбы ловяща, да не творять им зла никакоже. И да не имеють власти Русь зимовати в вустьи Днепра, Белбережи12, ни у святаго Ельферья13; но егда придеть осень, да идуть в домы своя в Русь. А о сих оже то приходять чернии болгаре14 и воюють в стране Корсуньстей, и велим князю Рускому, да их не пущаеть: пакостять стране его. Аще ли ключится проказа некака от грек, сущих под властью царства нашего, да не имате власти казнити я, но повеленьемь царства нашего да прииметь, якоже будеть створил. Аще убьеть хрестеянин русина, или русин хрестеянина, да держим будеть створивый убийство от ближних убьенаго, да убьють и. Аще ли ускочить створивый убой и убежить, аще будеть имовит, да возмуть именье его ближьнии убьенаго; аще ли есть неимовит [створивый убийство] и ускочить же, да ищють его, дондеже обрящется, аще ли обрящется, да убьен будеть. Или аще ударить мечем, или копьем, или кацем любо оружьем русин грьчина или грьчин русина, да того деля греха заплатит сребра литр 515 по закону Рускому; аще ли есть неимовит, да како можеть, в только же продан будеть, яко да и порты, в нихже ходить, да и то с него сняти, а о проце да на роту ходить по своей вере, яко не имея ничтоже, ти тако пущен будеть. Аще ли хотети начнеть наше царство от вас война противящаяся нам, да пишем к великому князю вашему, и послет к нам, еликоже хочем: и оттоле уведять ины страны, каку любовь имеють грьци с Русью. Мы же свещание се написахом на двою харатью, и едина харатья есть у царства нашего, [на ней же есть крест и имена наша написана, а на другой послы ваши и гостье ваши. А отходяче послом царства нашего] да допроводять к великому князю Рускому Игореви и к людем его; и ти приимающе харатью, на роту идуть хранити истину, яко мы свещахом, напсахом [на] харатью сию, на ней же суть имяна наша написана. Мы же, елико нас хрестилися есмы, кляхомъся церковью святаго Илье в сборней церкви, и предлежащем честным крестом, и харатьею сею, хранити все, еже есть написано на ней, не преступити от него ничтоже; а иже преступить се от страны нашея, ли князь ли ин кто, ли крещен или некрещен, да не имуть помощи от бога, и да будеть раб в весь век в будущий, и да заколен будеть своим оружьем. А [некрещеная] Русь полагають щиты своя и мече свое наги, обруче16 свое и [прочаа] оружья, да кленутся о всемь, яже суть написана на харатьи сей, хранити от Игоря и от всех боляр и от всех людий от страны Руския в прочая лета и воину. Аще ли же кто от князь или от людий Руских, ли хрестеян, или не хрестеян, преступить се, еже есть писано на харатьи сей, будеть достоин своим оружьемь умрети, и да будеть клят от бога и от Перуна, яко преступи свою клятву. Да аще будеть добре, Игорь великий князь да хранить ей любовь правую, да не разрушится, дондеже солнце сьяеть и весь мир стоить, в нынешний веки и в будущая».