- Oo, wel, - ta shwo, - es ya pyu hao. Nau, gayar, ob doktor shwo-te, komo longem me gai lagi on sey ship-kama?
- Amini un wik, - me shwo.
- Bliza-guruha! - ta krai. - Un wik! Si me lagi duran un wik, li pai sundi swate marka. Sey shma-jenta snifi-findi wo me es, sey nokushalnik kel bu janmog kipi lo swa-ney e yao pren lo otra-ney. Ob es suluka de vere marjen, me kwesti ya? Bat me hi es sparnik. Me bu gwo vanisi mani, me bu yao lusi it. Me sal trompi li snova. Me bu fobi li. Me ve stavi yoshi un parus e snova mah ahmak aus li.
Al shwo se, ta fa-lifti gro-mushkilem, al graspi may plecha tanto fortem ke me hampi krai por tunga. Ta muvi gambas kwasi li es plumba-ney. Ye gran farka inter suy inspira-ney shwosa e feblitaa de suy vos.
Afte en-sidi, ta fai pausa duran koy taim.
- Sey doktor he finisi me, - ta murmuri. – Zumbi in aures. Mah-lagi me bak.
Bat bifoo ke me mog zwo koysa, ta snova lwo on kama, wo ta bin, e duran kelke taim ta lagi al silensi.
- Jim, - ta shwo pa fin, - yu he vidi ku toy marjen sedey?
- Swate Doga ku? - me kwesti.
- Wel, Swate Doga, - ta shwo, - ta es ya buhao wan; bat toy-las kel he sendi ta, li es ya pyu bade. Nau, audi ba. Si me bu pai geti wek e li fai swate marka an me, hay yu jan ke li shikari may sunduk. Dan en-raki ba kaval... yu janmog ya, bu ver?.. Wel, raki ba kaval e go a toy... es egal nau... a toy damnen doktor, e shwo ke ta gai wisli oli wan a dek - oli judista e simila - e kapti li oli on borda de "Admiral Benbo", den tote tim de lao Flint, den oli kel haishi jivi. Me bin subkapitan, ya, subkapitan she lao Flint, e me es sole wan kel jan toy loko. Ta selfa he dai it a me in Savanna al lagi-morti, yus kom me zai lagi nau. Bat bye shwo nixa, til ke li fai swate marka an me, o til ke yu snova vidi toy Swate Doga... o marjen do un gamba, Jim, den ta sobreolo.
- Bat kwo es sey swate marka, kapitan? - me kwesti.
- Es kom voki-leta, gayar. Me ve shwo a yu si li pai sundi it. Bat kan-wahti ba atentem, Jim, e me ve parti olo kun yu, ga honestem...
Ta en-konfusi worda, e suy vos fa-feble. Me dai a ta lekika, e ta gloti it obedi-shem kom kinda, al remarki ke "nul marjen gwo nidi lekika pyu kem me". Sun ta lwo inu glube dekonsa to somna, e me lyu ta sole.
Me bu jan kwo me wud zwo si olo wud go normalem. Shayad me wud rakonti ol historia a doktor, por ke me mortem fobi ke kapitan mog hwei om swa-ney sinseritaa e finisi me. Bat eventi tak ke may povre patra morti pa toy aksham, aika turan-nem, lo kel mah nu atarafi-fogeti olo. Nuy griva, visitas de visines, dafna-aranjing e ol gunsa om gastaguan mah me gro-mangi, also me apena hev taim fo dumi om kapitan, yoshi meno fo fobi ta.
Pa sekwi-she sabah ta lai nich kom si nixa eventi e chifan pa pinchan ora. Ta chi shao bat musbi pi pyu rom kem pinchanem, por ke ta pa selfa fulisi glasa pa bar-kaunta; al se ta fruni e fai ira-ney suon tra nos, also nulwan osi kontrashwo. Pa aksham bifoo dafna ta sta pyan kom sempre. Es ya shoki-she, tu audi ta-ney savaje mar-ney gana in nuy dom do griva. Bat nu ya gro-fobi ta, kwel unkwe feble ta es; yoshi doktor es turan voki-ney fo visiti un morbi-sha pa mucho milya wek; afte patra-ney morta ta haishi bu lai-te.
Me he shwo ke kapitan es feble. Ver, ta sembli fa-feble oltaim pyu, ga bu fa-hao. Ta asendi sulam gro-mushkilem; ta go-go fon salon a bar-kaunta e bak snova. Koyves ta fai nos aus dwar fo fauhi mar-aira al fa-teni pa mur e al gro-spiri kom jen klimbi-she krute monta.
Ta bu pyu adresi me apartem, shayad fogeti-te om swa-ney konfida. Malgree feblitaa de korpa, ta bikam yoshi pyu vexishil e batalishil. Ta en-hev alarmi-she abyas, al sta pyan, tu austiri zian e pon it on tabla bifoo swa. Bat nau ta meno atenti sirkum-ney jenta; ta sembli plunji-ney inu swa-ney duma to halusina.
Undey ta iven gro-surpirisi nu por en-gani koy kisan-ney luba-gana ke ta shayad gwo gani in yungitaa, bifoo ke ta en-fai mar.
Tak hi olo sta til ke pa dafna-sekwi-she dey, pa sirke klok tri, al meteo do piki-she frosta e tuman, me zai stan pa daklis, tristem dumi-yen om patra, e turan vidi un jen pedi-she lentem along kamina. Ta es evidentem blinde, por ke ta tuki-senti dao bay stik e hev grin shirma sobre okos e nos. Ta hev gorba do laotaa o morba, e ta porti gro-gran lao trapalik mar-mantela kun kapushon, lo kel mah ta yoshi pyu kurupe. Me bu gwo vidi jen kel aspekti tanto dashat-nem. Ta stopi bu dalem fon gastaguan e en-shwo lautem kwasi gani al adresi vakue aira bifoo swa:
- Ob koy karim amiga mog informi povre blinda kel he lusi vidi-mogsa duran kuraje defensa de Ingland to patralanda, Boh blesi ba rego Jorj! - om wo e in kwel landa-parta ta loki al nau?
- Yu es bli "Admiral Benbo" to gastaguan, baya de Swate Kolina, may hao jen, - me shwo.
- Me audi vos, - ta shwo, - vos de yungo. Ob yu mog extendi yur handa a me, may karim yunge amiga, e dukti me inu dom?
Me extendi handa, e toy terible sin-oko-ney kreatura do mule shwosa graspi it kwasi bay klemika.
Me en-fobi gro e trai mah swa los, bat blinda tiri me a swa bay ek-muva de bracha.
- Nau, boy, - ta shwo, - dukti me a kapitan.
- Sinior, - me shwo, - ga honestem, me bu osi.
- Ahaa, tak! - ta dussmaili mokem. - Dukti ba me tuy rek a ta, otrekas me rupti yur bracha.
Ewalaa ta ek-torsi may bracha tak ke me ek-krai por tunga.
- Sinior, - me shwo, - es ya fo yu hi ke me bu osi. Kapitan bu pyu es tal kom ta gwo bi. Ta zai sidi al tayar zian. Un otre jen yo lai-te a ta e...
- Kamon, go ba! - ta interrupti bay vos zuy brutale, lenge e nafre ke me gwo audi. It pyu kem tunga mah me obedi ta, e me dukti ta rek inu salon, wo nuy morbe pirata zai sidi turdi-ney bay rom.
Blinda klingi a me, klemi-yen may handa bay fer-ney-si kulak, e apogi an me tanto gro ke me apena mog stan.
- Dukti ba me rek a ta, e wen ta vidi me, krai ba: "Walaa amiga fo yu, Bill!" Si yu bu krai, me fai ya tak, - ewalaa ta ek-torsi may bracha tak ke me hampi dekonsi. Me es tanto fobisen bay sey blinde wandi-sha ke me ga fogeti may foba versu kapitan, e afte ofni salon-dwar, me krai-shwo ti ta komandi na wordas pa tremi-she vos.
Povre kapitan lifti kansa e kwasi fa-sahe tuy. Suy fas expresi bu foba bat morta-ney tormenta. Ta trai en-stan, bat evidentem bu hev basta forsa fo se.
- Sidi ba, Bill, wo yu es, - blinda shwo. - Me bu mog vidi, bat me audi olo. Dela es dela. Extendi ba yur lefte handa. Boy, pren ba suy lefte handa pa polsa e blisi it a may desne-la.
Nu ambi obedi, e me vidi komo ta pon koysa fon holika de ti teni stik na handa inu kapitan-ney pama kel fa-kulak tuy.
- Es zwo-ney, - blinda shwo al turan lasi me los, e kun noexpektibil ajilitaa ta kwiti salon e go wek al tuki-tuki bay stik, lo kel me audi al stan sin muva.
Sol afte kelke taim me e kapitan kwasi rikonsi. Me loslasi luy polsa e ta tiri handa a swa hampi pa same taim. Ta ek-kan pama.
- Klok shi! - ta krai. - Sit ora resti! Haishi ye taim fo duyfu li!
Ta ek-salti-stan bat tuy en-hili, pon handa on gorla, stan nosigurem duran kelke momenta, poy ek-fai koy strane suon e lwo on poda al fas nich pa ol gravitaa.
Me tuy lopi a ta, me voki mata. Bat es yo tarde. Kapitan morti por apoplexia. Es merkival ke, obwol me bu gwo pri sey jen, mogbi sol piti ta idyen duran laste deys, me ya lwo in gro-plaki al vidi ta morte. To es yo dwa-ney morta ke me vidi, e griva de un-ney-la haishi jivi inen may kordia.
Sunduk do marjen
Sertem me tuy rakonti olo ke me jan a mata. Shayad me iven gai-te zwo se longtaim bak. Nu findi swa in ga mushkile danjaful situasion.
Parta de kapitan-ney mani, si ye mani, it sertem mus bi nu-ney. Yedoh bu es probable ke kapitan-ney ship-amigas, e primem toy-las ke me he vidi yo, Swate Doga e blinde vagabonder, wud yao losdai swa-ney kaptura fo ladi deba de morte wan. Den komanda de kapitan tu raki-go a Doktor Livsi tuy, me ga bu mog fulfil it, bikos me bu mog iven dumi om lyu mata sole, sin protekta. Bat nu bu mog resti pa dom toshi, sikom iven suon de gual-ge lwo-she on fer-grata e kloka-ney tiktaking mah nu alarmi. Nu semblem audi lai-she stepas fon kadalok. Ek-duma om ti zai lagi in salon na korpa de morte kapitan e om ti es ga bli e mog returni pa eni minuta na nafra-ney blinda, it mah may kordia gro-salti por dashat. Taim fo deri ga yok, e nu desidi pa fin ke nu pa hunta gai go a bli-ney vilaja fo shuki-voki helpa. Nu shwo, nu zwo. Sin kapakovra nu tuy lopi aus tra frosta-ney tuman al ke fa-tume.