Ye milion fabula pa munda, bat zuy pri-ney fabula de syao Veronika bu es pyu kem finga pa handa.
Me pri fabula Om baokin do hiran-piga zuy. It he fa-lusi koylok, fa-wek miden lo pasi-ney, yus kom olo om kwo opa rakonti.
Mantela de rega
Me sal go safari. Me mah-tayar may bavul. Treba kunpren sol zuy nesese kosa.
Bat se bu es tro simple, tu samaji kwo es verem nesese e sin kwo me mog duyfu hao.
— Bu ye nixa fo kaulu, me es gro-nesese! – may pijama krai.
— E nu! Nu toshi! Gro-nesese! – poshtuhes snufi tra nos.
May tay pren may gorla sirkum:
— Yu sim bu mog departi sin me!
Oli may kamisa, sok, panta e pulova lansi swa inu bavul. Sol un lao shamba-roba resti in lemar.
— A wo yu sal go?
— A safara.
— Dalem ku?
— Way yu kwesti?
— Me yao jan a wo nu sal go.
— Me bu nidi shamba-roba.
— Way? Oni sempre nidi shamba-roba.
— Yu imajini ya tro!
— In bavul sempre ye plasa fo me.
— Me bu yao safari kun lao shamba-roba.
— Ob yu fogeti komo nu he pasi vakasion pa hunta? Me hev ramla de mar in may posh. Kada ramlinka mah me remembi to.
— To bin longtaim bak. Bu shwo pyu, me tardi ya fo may tren!
Me klapi-klosi may bavul e lopi nich sulam.
Nichen me miti may gin-visin. Me hampi lansi may klef a ela, pregi om ke ela arosi flor she me til ke me lai bak.
— Hao safara! – ela krai. Bat me bu audi ela yo.
Klarem me toshi bu audi to ke eventi she me in dom.
In ga ofni-ney lemar pendi gro-ofensi-ney shamba-roba. Rude shamba-roba do chaure plechas e gran kapushon.
— Me es sinior Jupan de Frotee! – ta deklari. – Me es hir fo wahti ordina.
— Ha-ha-ha, sinior Jupan de Frotee! – slipas ridi gro. – Yu bu he inventi to selfa. Nu toshi he kan toy fabula pa TV.
— Segun to ke me vidi, yu toshi resti in dom, bu ver? – shamba-roba kwesti mokishem.
— Ver. Nu bu chu depos longtaim yo. Bu ye toy yash.
Shamba-roba e slipas bu lubi mutu gro. Li kan munda farka-nem. Bat shamba-roba bu hev nulwan pyu fo kunshwo om me e om jiva.
Taim lopi for, polva geti on kosas, flores fadi.
Pa fin un syao gela de visines lai. Ela lai fo arosi may flor. Ela nami Viktoria. Bat in dom oni nami ela otrem, pyu simplem: Vikinka.
— Ah! – ela ek-krai, bat poy samaji kway ke to bu es jen in toy ofni-ney lemar, sol shamba-roba. Ela lai pyu blisem. Ela pri toy shamba-roba. It es ya tanto jamilem rude, it hev ya tanto gran kapushon.
— Oo, se es mantela de rega! – ela sospiri pa admira e pren shamba-roba fon pendika. Tu onpon it bu es tro simple. Manshas es tro longe, bat oni mog pligi li uupar. E longe lapas trani on poda ya kom vere tranika.
Regina go-go pa shamba gro-mahanem.
“Magnifike! – shamba-roba shwo a swa. – Me he zwo regina aus Vikinka e palas aus shamba. E me selfa bu es yo shamba-roba, me es ya mantela de rega. Es ya gro-hao ke kinda ye in munda!”
Viktoria arosi flor. Mantela de rega es tro longe. Ela tangli e lasi guti akwa a poda. Bat es syaodela. Ela wud yao sol ke in palas ye mira. Dan ela wud mog vidi swa fon kapa til pedas. Bat mira yok.
Turan ye baja.
— Baji gro, fabula wek! – Viktoria sospiri.
Mata voki:
— Vikinka, lai ba aus, me klefi dwar. He arosi flor ku?
— Ya!
Viktoria mah-lwo suy mantela e lopi wek.
Pendika es tro gao. Shamba-roba lwo a poda.
Wen rega lwo, es sempre surprisa.
— Nu he dumi ke yu hev chaure plechas, — slipas shwo. — Nu he admiri yu. E se bin sol pendika!
Shamba-roba silensi. Tristitaa de fogeti-ney e kwiti-ney kosa lai a ta. Bat ta bu diki se. Ta es ya aus vere frotee kel mog sponji olo.
E me bu jan nixa om to. Me lai a dom, me go-go in may flat. E me bu samaji way me sta tanto hao in may lao rude shamba-roba.
Ta lubi me. Ta he weiti me ya tanto longem.
Char munda-taraf
Me gwo koni un gina kel hev char kinda. Ela he nami li tak ke ley nam begin samem kom char munda-taraf: Nordik, Estik, Sudik e Westina.
Sembli a ela ke nixa simile haishi bu gwo ye pa munda!
Al kinda-yash sey kindas sempre plei pa farke shamba-taraf. Bat fo akshamfan li oli jami sirkum tabla miden shamba.
Mata pri wen oli kinda es bli, e ela shwo oltaim:
- Es ya tanto hao tu sidi pa hunta pa un tabla!
Kindas bu shwo nixa, bat li toshi sta hao pa komune tabla. Oni mog bumerkibilem darbi gamba de mutu, pushi mutu e diki lisan a mutu, e mata neva jan hu he begin.
Poy kindas fa-gran e stopi darbi gambas de mutu. Gambas sub tabla fa-shao, e pa fin miden shamba ye sol char gamba de tabla selfa.
"Komo se he mog eventi?" - mata kwesti swa. - "May kindas he flai-go wek a oli char minda-taraf! Shayad bu gai-te nami li tak."
Tabla vidi komo ela nokalmi, e nokalmi toshi.
Unves pa oton ta shwo a swa:
"Wel, basta! Me bu es pinchan tabla do deyfan. Char skola-kinda gwo skribi kompositura on me. E me haishi hev papir e kalames inen tiriboxa. Bu es tanto mushkile tu skribi letas a oli char munda-taraf."
Ta shwo, ta zwo. Tabla skribi char leta tuy: lai ba oli a dom, ta skribi, yus pa sey datum! Pa norda den sey leta lekti da Nordik kel he bikam plunjer. Ta yus es sub akwa wen leta lai.
- Leta fon dom! - Nordik to plunjer joi, geti aus akwa e raki-go a dom.
Pa esta Estik to talimer pai leta. Ta zai cheki diktura de sey lerner. Al lekti leta ta bu findi nul galta in it, dai fenshu pet, e en-raki-go.
Sudik pa suda yao bikam poeta. Leta lai yus al ke ta skribi:
"Dalem-dalem es nuy hom, Mata sole sta pa dom."
- Semblem me he skribi veritaa, - Sudik shwo. - Es taim fo go a dom!
Pa westa Westina to fama-ney aktorina pai leta. Pa toy dey ela fa-filmi in kino "Flores fo may mata". Ela tuy fai buketa e hasti-go a swa-ney mata.
"Ob koysa buhao he eventi? Ob mata sta sane?" - kindas dumi al hasti-raki a dom fon oli char munda-taraf.
E tabla joi gro por swa-ney inventa. Nau ta dumi komo miti gastas zuy hao. Oni ya sempre tayari festa-tabla fo gastas.
Kindas gwo shwo koytaim: "Zuy hao tabla es Nove-yar-ney-la!"
Al en-remembi sey wordas, tabla kovri swa bay festa-ney tablakovra, dekori swa bay mucho kandela-ki e pina-brancha. Lo zuy mushkile es tu pai karpa to fish ke oni sempre chi duran Nove-yar-ney festa. Lo reste es ya fasile.
Al lai a dom, kindas joi gro por mita: "Walaa nu oli es snova pa hunta!" Li zin shamba e stopi por astona.
On tabla ye madu do amba-kolor, biskwitas, yablas, figas, nutas, suhvinberi. Nove-yar-ney karpa to fish mavi kauda al saluti li. Kadalok ye rude banda-ki, Nove-yar-ney luma rasfai agninka, fainglasa tintini alegrem.
- Es ya strane! Way tabla es bepon-ney kom si es Nove yar? - kindas fa-astoni. - Es ya haishi oton! Kwo mata he inventi-zwo?
E tabla, kel bu es pumbe por ke char kinda ya gwo fai leson on it, samaji ke ta he fai galta.
- Nu gai visiti mata pyu oftem, - Westina shwo.
- E kuydi-kwesti om elay sanitaa toshi pyu oftem, - Estik shwo.
- Mama-ki, ob yu sta sane? - Nordik to plunjer kwesti, e Sudik bumerkibilem darbi suy gamba sub tabla.
"Walaa li snova darbi gamba de mutu, kom kindas!" - tabla dumi. - "Lao taim lai bak! Me es ya haonik!"
E ta en-dansi por joisa.
Kino Prinsina e jen-chier
Meteo bin dashatival, prinsina bin admirival.
Klok dwa pa dey toy buhao in shulin ela lusi-te dao.
Ela kan: felda-ki ye admirival, dar ye arda-domkin dashatival.
Jen-chier ye dar turan: "Yu es may gro-hao deyfan!"
Den sikin ta pren, klare dao ya,
Turan vidi: ta es ya admirival!
E turan ta senti swa buhao: "Go ya wek, shuki otre dao!
She me apetit es dashatival, sikom aspekta es tro admirival..."
Ela go ga bu kway, toy prinsina, a kastela ta lai aus shulin ya.
Sey rakonta walaa dashatival, sey prinsina walaa ya admirival.