Лик: Аминь.
Великая Ектения
Д. Миром Господу помолимся.
Л. Господи, помилуй.
Д О свышнем мире и спасении душ наших, Господу помолимся.
Л. Господи, помилуй.
Д О мире всего мира, благостоянии святых Божиих церквей и соединении всех, Господу помолимся.
Л. Господи, помилуй.
Д. О святем храме сем, и с верою, благоговением и страхом Божиим входящих в онь, Господу помолимся.
Л. Господи помилуй.
Д. О Святейших Патриарсех Православных, и о Господине нашем Митрополите (или Архиепископе, или Епископе) нашем (имя), честном пресвитерстве, во Христе диаконстве, о всем причте и людех, Господу помолимся.
Л. Господи, помилуй.
Д. О предержащих властех наших и о всем воинстве, Господу помолимся.
Л. Господи, помилуй.
Д. О граде сем (или о веси сей, или о святей обители сей), всяком граде, стране и верою живущих в них, Господу помолимся.
Л. Господи, помилуй.
Д. О благорастворении воздухов, о изобилии плодов земных и временех мирных, Господу помолимся.
Л. Господи, помилуй.
Д О плавающих, путешествующих, недугующих, страждущих, плененных, и о спасении их, Господу помолимся.
Л. Господи, помилуй.
Д. О избавитися нам от всякия скорби, гнева и нужды, Господу помолимся.
Л. Господи, помилуй.
Д Заступи, спаси, помилуй и сохрани нас, Боже, Твоею благодатию.
Л. Господи, помилуй.
Д Пресвятую, пречистую, преблагословенную, славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.
Л. Тебе, Господи.
Молитва 1-го антифона
Господи Боже наш, Егоже держава несказанна, и слава непостижима, Егоже милость безмерна, и человеколюбие неизреченно: Сам, Владыко, по благоутробию Твоему, призри на ны, и на святый храм сей и сотвори с нами, и молящимися с нами, богатыя милости Твоя, и щедроты Твоя.
Возглас: Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков.
Л. Аминь.
1-ый Псалом изобразительный[2]
Благослови, душе моя, Господа, благословен еси, Господи.
Благослови, душе моя, Господа и вся внутренняя моя Имя святое
Его.
Благослови, душе моя, Господа, и не забывай всех воздаяний Его.
Очищающаго вся беззакония твоя, исцеляющаго вся недуги твоя.
Избавляющаго от нетления живот твой, венчающаго тя милостию и щедротами.
Исполняющаго во благих желание твое, обновится яко орля юность твоя.
Творяй милостыни Господь и судьбу всем обидимым, сказа пути своя Моисеови, сыновом Исраилевым хотения своя.
Щедр и милостив Господь, долготерпелив и многомилостив.
Не до конца прогневается, ниже в век враждует: не по беззаконием нашим сотворил есть нам, ниже по грехом нашим воздал есть нам.
Яко по высоте небесней от земли, утвердил есть Господь милость свою на боящихся Его.
Елико отстоят востоцы от запад, удалил есть от нас беззакония наша.
Якоже щедрит отец сыны, ущедри Господь боящихся Его.
Яко той позна создание наше, помяну яко перст есмы.
Человек, яко трава дние его, яко цвет сельный, тако оцветет.
Яко дух пройде в нем, и не будет, и не познает к тому места своего. Милость же Господня от века и до века на боящихся Его.
И правда Его на сынех сынов, хранящих завет Его, и помнящих заповеди Его, творити я.
Господь на небеси уготова престол свой, и царство Его всеми обладает.
Благословите Господа вси ангели Его, сильнии крепостию, творящии слово Его, услышати глас словес Его.
Благословите Господа вся силы Его, слуги Его творящии волю Его. Благословите Господа вся дела Его, на всяком месте владычества Его.
Слава Отцу и Сыну и Святому Духу.
И ныне, и присно, и во веки веков, аминь.
Благослови, душе моя, Господа, и вся внутренняя моя Имя святое Его.
Благословен еси, Господи.
Или Антифон 1-ый повседневный
Благо есть исповедатися Господеви, и пети Имени Твоему, Вышний. Молитвами Богородицы, Спасе, спаси нас.
Возвещати заутра милость Твою, и истину Твою на всяку нощь. Молитвами Богородицы, Спасе, спаси нас.
2
Этот псалом поем в дни с великим славословием, полиелеем, бдением, в предпразднества и отдания праздников, в дни всей Пятидесятницы и в рядовые недели (воскресения).