30 И пла́чущиися, я́коже не пла́чущии, и ра́дующиися, я́коже не ра́дующеся, и купу́ющии, я́ко не содержа́ще.
31 И тре́бующии міра сего́, я́ко не тре́бующе: прехо́дит бо о́браз міра сего́.
32 Хощу́ же вас безпеча́льны бы́ти. Не ожени́выйся пече́тся о Госпо́дних, ка́ко угоди́ти Го́сподеви,
33 А ожени́выйся пече́тся о мірски́х, ка́ко угоди́ти жене́. Раздели́ся жена́ и де́ва.
34 Непося́гшая пече́тся о Госпо́дних, да есть свя́та и те́лом, и ду́хом, а пося́гшая пече́тся о мірски́х, ка́ко угоди́ти му́жу.
35 Сие́ же на по́льзу вам саме́м глаго́лю, не да сило́ вам наложу́, но к благообра́зию и благоприступа́нию Го́сподеви безмо́лвну.
36 А́ще ли же кто безобрази́ти о де́ве свое́й непщу́ет, а́ще есть превозра́стна, и та́ко должна́ есть бы́ти, е́же хо́щет, да твори́т, не согреша́ет, а́ще пося́гнет.
37 А и́же стои́т тве́рдо се́рдцем, не имы́й ну́жды, власть же и́мать о свое́й во́ли, и се разсуди́л есть в се́рдце свое́м блюсти́ де́ву свою́, до́бре твори́т.
38 Те́мже и вдая́й бра́ку свою́ де́ву до́бре твори́т, и не вдая́й лу́чше твори́т.
39 Жена́ привя́зана есть зако́ном, в ели́ко вре́мя живе́т муж ея́. А́ще же у́мрет муж ея́, свобо́дна есть, за него́же хо́щет, пося́гнути, то́чию о Го́споде.
40 Блаже́ннейша же есть, а́ще та́ко пребу́дет, по моему́ сове́ту, мню бо ся и аз Ду́ха Бо́жия име́ти.
Глава 8
1 О идоложе́ртвенных же ве́мы, я́ко вси ра́зум и́мамы. Ра́зум у́бо кичи́т, а любы́ созида́ет.
2 А́ще ли кто мни́тся ве́дети что, не у́ что разуме́, я́коже подоба́ет разуме́ти.
3 А́ще же кто лю́бит Бо́га, сей позна́н бысть от Него́.
4 О яде́нии же идоложе́ртвенных ве́мы, я́ко и́дол ничто́же есть в міре, и я́ко никто́же Бог ин, то́кмо Еди́н.
5 А́ще бо и суть глаго́лемии бо́зи, или́ на небеси́, или́ на земли́, [я́коже суть бо́зи мно́зи и госпо́дие мно́зи,]
6 Но нам еди́н Бог Оте́ц, из Него́же вся, и мы у Него́, и еди́н Госпо́дь Иису́с Христо́с, И́мже вся, и мы Тем.
7 Но не во всех ра́зум, не́цыи же со́вестию и́дольскою да́же досе́ле я́коже идоложе́ртвенное ядя́т, и со́весть их, немощна́ су́щи, скверни́тся.
8 Бра́шно же нас не поста́вит пред Бо́гом: ниже́ бо а́ще я́мы, избы́точествуем, ниже́ а́ще не я́мы, лиша́емся.
9 Блюди́те же, да не ка́ко власть ва́ша сия́ преткнове́ние бу́дет немощны́м.
10 А́ще бо кто ви́дит тя, иму́ща ра́зум, в тре́бищи возлежа́ща, не со́весть ли его́ немощна́ су́щи сози́ждется идоложе́ртвенная я́сти?
11 И поги́бнет немощны́й брат в твое́м ра́зуме, его́же ра́ди Христо́с у́мре.
12 Та́коже согреша́юще в бра́тию, и бию́ще их со́весть не́мощну су́щу, во Христа́ согреша́ете.
13 Те́мже а́ще бра́шно соблазня́ет бра́та моего́, не и́мам я́сти мя́са во ве́ки, да не соблазню́ бра́та моего́.
Глава 9
1 Несмь ли апо́стол? Несмь ли свобо́дь? Не Иису́са Христа́ ли Го́спода на́шего ви́дех? Не де́ло ли мое́ вы есте́ о Го́споде?
2 А́ще у́бо ины́м несмь апо́стол, но у́бо вам есмь. Печа́ть бо моего́ апо́стольства вы есте́ о Го́споде.
3 Мой отве́т востязу́ющим мене́ сей есть.
4 Еда́ не и́мамы вла́сти я́сти и пи́ти?
5 Еда́ не и́мамы вла́сти сестру́ жену́ води́ти, я́ко и про́чии Апо́столи, и бра́тия Госпо́дня, и Ки́фа?
6 Или́ еди́н аз и Варна́ва не и́мамы вла́сти е́же не де́лати?
7 Кто во́инствует свои́ми обро́ки когда́? Или́ кто насажда́ет виногра́д, и от плода́ его́ не яст? Или́ кто пасе́т ста́до, и от млека́ ста́да не яст?
8 Еда́ по челове́ку сия́ глаго́лю? Не и зако́н ли сия́ глаго́лет?
9 В Моисе́ове бо зако́не пи́шет: да не загради́ши устну́ вола́ молотя́ща. Еда́ о воло́вех ради́т Бог?
10 Или́ нас ра́ди вся́ко глаго́лет? Нас бо ра́ди вписа́ся, я́ко о наде́жди до́лжен есть оря́й ора́ти, и молотя́й с наде́ждею своего́ упова́ния причаща́тися.
11 А́ще мы духо́вная се́яхом вам, вели́ко ли, а́ще мы ва́ша теле́сная по́жнем?
12 А́ще ини́и вла́сти ва́шея причаща́ются, не па́че ли мы? Но не сотвори́хом по о́бласти сей, но вся терпи́м, да не прекраще́ние ко́е да́мы благовествова́нию Христо́ву.
13 Не ве́сте ли, я́ко де́лающии свяще́нная от святи́лища ядя́т, и служа́щии олтарю́ со олтаре́м сделя́ются?
14 Та́ко и Госпо́дь повеле́ пропове́дающим Благове́стие от благове́стия жи́ти.
15 Аз же ни еди́но сотвори́х от сих. Не писа́х же сия́, да та́ко бу́дет о мне: до́брее бо мне па́че умре́ти, не́жели похвалу́ мою́ кто да испраздни́т.