7 Оба́че безду́шная глас даю́щая, а́ще сопе́ль, а́ще гу́сли, а́ще ра́знствия писка́нием не дадя́т, ка́ко разу́мно бу́дет писка́ние или́ гуде́ние?
8 И́бо а́ще безве́стен глас труба́ даст, кто угото́вится на брань?
9 Та́ко и вы а́ще не благоразу́мно сло́во дадите́ язы́ком, ка́ко уразуме́ется глаго́лемое? Бу́дете бо на возду́х глаго́люще.
10 Толи́ки у́бо, а́ще ключи́тся, роди́ гласо́в суть в міре, и ни еди́н их безгла́сен.
11 А́ще у́бо не уве́м си́лы гла́са, бу́ду глаго́лющему иноязы́чник, и глаго́лющий мне иноязы́чник.
12 Та́ко и вы, поне́же ревни́теле есте́ духово́м, я́же к созида́нию це́ркве проси́те, [224] да избы́точествуете.
13 Те́мже глаго́ляй язы́ком да мо́лится, да сказу́ет.
14 А́ще бо молю́ся язы́ком, дух мой мо́лится, а ум мой без плода́ есть.
15 Что у́бо есть? Помолю́ся ду́хом, помолю́ся же и умо́м, воспою́ ду́хом, воспою́ же и умо́м.
16 Поне́же а́ще благослови́ши ду́хом, исполня́яй ме́сто неве́жды ка́ко рече́т ами́нь, по твоему́ благодаре́нию? Поне́же не весть, что глаго́леши.
17 Ты у́бо до́бре благодари́ши, но други́й не созида́ется.
18 Благодарю́ Бо́га моего́, па́че всех вас язы́ки глаго́ля,
19 Но в це́ркви хощу́ пять слове́с умо́м мои́м глаго́лати, да и и́ны по́льзую, не́жели тмы слове́с язы́ком.
20 Бра́тие, не де́ти быва́йте умы́, но зло́бою младе́нствуйте, умы́ же соверше́ни быва́йте.
21 В зако́не пи́шет: я́ко ины́ми язы́ки и устны́ ины́ми возглаго́лю лю́дем сим, и ни та́ко послу́шают Мене́, глаго́лет Госпо́дь.
22 Те́мже язы́цы в зна́мение суть не ве́рующим, но неве́рным, а проро́чество не неве́рным, но ве́рующим.
23 А́ще у́бо сни́дется це́рковь вся вку́пе, и вси язы́ки глаго́лют, вни́дут же и неразу́мивии или́ неве́рнии, не реку́т ли, я́ко бесну́етеся?
24 А́ще же вси проро́чествуют, вни́дет же не́кий неве́рен или́ неве́жда, облича́ется все́ми, и истязу́ется от всех.
25 И си́це та́йная се́рдца его́ явле́на быва́ют, и та́ко пад ниц покло́нится Бо́гови, возвеща́я, я́ко вои́стинну Бог с ва́ми есть.
26 Что́ у́бо есть, бра́тие? Егда́ схо́дитеся, ко́ждо вас псало́м и́мать, уче́ние и́мать, язы́к и́мать открове́ние и́мать, сказа́ние и́мать, вся же к созда́нию да быва́ют.
27 А́ще язы́ком кто глаго́лет, по двема́, или́ мно́жае по трие́м, и по ча́сти, и еди́н да сказу́ет.
28 А́ще ли не бу́дет сказа́тель, да молчи́т в це́ркви, себе́ же да глаго́лет и Бо́гови.
29 Проро́цы же два или́ трие́ да глаго́лют, и друзи́и да разсужда́ют.
30 А́ще ли ино́му откры́ется седя́щу, пе́рвый да молчи́т.
31 Мо́жете бо вси по еди́ному проро́чествовати, да вси уча́тся и вси утеша́ются.
32 И ду́си проро́честии проро́ком повину́ются.
33 Несть бо нестрое́ния Бог, но ми́ра, я́ко во всех це́рквах святы́х.
34 Жены́ ва́ша в це́рквах да молча́т, не повеле́ся бо им глаго́лати, но повинова́тися, я́коже и зако́н глаго́лет.
35 А́ще ли чесому́ научи́тися хотя́т, в дому́ свои́х муже́й да вопроша́ют: сра́мно бо есть жене́ в це́ркви глаго́лати.
36 Или́ от вас сло́во Бо́жие изы́де? Или́ вас еди́ных дости́же?
37 А́ще кто мни́тся проро́к бы́ти или́ духо́вен, да разуме́ет, я́же пишу́ вам, зане́ Госпо́дни суть за́поведи?
38 А́ще ли кто не разуме́ет, да не разумева́ет.
39 Те́мже, бра́тие моя́, ревну́йте е́же проро́чествовати, и е́же глаго́лати язы́ки не возбраня́йте.
40 Вся же благообра́зно и по чи́ну да быва́ют.
Глава 15
1 Сказу́ю же вам, братие, Благовествова́ние, е́же благовести́х вам, е́же и прия́сте, в не́мже и стоите́,
2 И́мже и спаса́етеся, ка́цем сло́вом благовести́х вам, а́ще содержите́, ра́зве а́ще не всуе ве́ровасте.
3 Преда́х бо вам испе́рва, е́же и прия́х, я́ко Христо́с у́мре грех на́ших ра́ди, по Писа́нием,
4 И я́ко погребе́н бысть, и я́ко воста́ в тре́тий день, по Писа́нием,
5 И я́ко яви́ся Ки́фе, та́же единона́десятим.
6 Пото́м же яви́ся бо́ле пяти́ сот бра́тиям еди́ною, от ни́хже мно́жайшии пребыва́ют досе́ле, не́цыи же и почи́ша.
7 Пото́м же яви́ся Иа́кову, та́же Апо́столом всем.
8 Последи́ же всех, я́ко не́коему и́звергу, яви́ся и мне.
9 Аз бо есмь мний Апо́столов, и́же несмь досто́ин нарещи́ся Апо́стол, зане́ гони́х це́рковь Бо́жию.
10 Благода́тию же Бо́жиею есмь, е́же есмь, и благода́ть Его́, я́же во мне, не тща бысть, но па́че всех их потруди́хся, не аз же, но благода́ть Бо́жия, я́же со мно́ю.