17 Ко́их же негодова́ четы́редесять лет? Не согреши́вших ли, и́хже ко́сти падо́ша в пусты́ни?
18 Кото́рым же кля́лся не вни́ти в поко́ище Его́? Я́ве, я́ко проти́вльшимся.
19 И ви́дим, я́ко не возмого́ша вни́ти за неве́рствие.
Глава 4
1 Да убои́мся у́бо, да не когда́ оста́влену обетова́нию Бо́жию вни́ти в поко́й Его́, яви́тся кто от вас лиши́вся.
2 И́бо есмы́ благовествова́ни, я́коже и они́, но не по́льзова о́нех сло́во слу́ха, нерастворе́нное ве́рою слы́шавших.
3 Вхо́дим бо в поко́й ве́ровавшии, я́коже рече́: я́ко кля́хся во гне́ве Мое́м, а́ще вни́дут в поко́й Мой, а́ще и дело́м от сложе́ния міра бы́вшим.
4 Рече́ бо не́где о седмо́м си́це: и почи́ Бог в день седмы́й от всех дел Свои́х.
5 И в сем па́ки: а́ще вни́дут в поко́й Мой.
6 Поне́же у́бо лише́ни не́цыи [278] вни́ти в него́, и и́же пре́жде благовествова́ни бы́ша, не внидо́ша за непослуша́ние,
7 Па́ки не́кий уставля́ет день, днесь, в Дави́де глаго́ля, по толи́цех ле́тех, я́коже пре́жде глаго́лася: днесь, а́ще глас Его́ услы́шите, не ожесточи́те серде́ц ва́ших.
8 А́ще бо бы о́нех Иису́с упоко́ил, не бы о ино́м дни глаго́лал по сих.
9 У́бо оста́влено есть и еще́ суббо́тство лю́дем Бо́жиим.
10 Вше́дый бо в поко́й Его́, и той почи́ от дел свои́х, я́коже от Свои́х Бог.
11 Потщи́мся у́бо вни́ти во о́ный поко́й, да не кто в ту́же при́тчу противле́ния впаде́т.
12 Жи́во бо сло́во Бо́жие и де́йственно, и остре́йше па́че вся́каго меча́ обою́ду остра́, и проходя́щее да́же до разделе́ния души́ же и ду́ха, члено́в же и мозго́в, и суди́тельно помышле́нием и мы́слем серде́чным.
13 И несть тварь неявле́на пред Ним, вся же нага́ и объявле́нна пред очи́ма Его́, к Нему́же нам сло́во.
14 Иму́ще у́бо Архиере́а вели́ка, проше́дшаго небеса́, Иису́са Сы́на Бо́жия, да держи́мся испове́дания.
15 Не и́мамы бо архиере́а не могу́ща спострада́ти не́мощем на́шим, но искуше́на по вся́чeским по подо́бию, ра́зве греха́.
16 Да приступа́ем у́бо с дерзнове́нием к престо́лу благода́ти, я́ко да прии́мем ми́лость и благода́ть обря́щем во благовре́менну по́мощь.
Глава 5
1 Всяк бо первосвяще́нник, от челове́к прие́млемь, за челове́ки поставля́ется на слу́жбы я́же к Бо́гу, да прино́сит да́ры же и жéртвы о гресе́х.
2 Спострада́ти моги́й неве́жствующим и заблужда́ющим, поне́же и той не́мощию обложе́н eсть.
3 И сего́ ра́ди до́лжен eсть я́коже о лю́дех, та́коже и о себе́ приноси́ти за грехи́.
4 Никто́же сам о себе́ прие́млет честь, но зва́нный от Бо́га, я́коже и Ааро́н.
5 Та́ко и Христо́с, не Себе́ просла́ви бы́ти первосвяще́нника, но Глаго́лавый к Нему́: Сын Мой eси́ Ты, Аз днесь роди́х Тя.
6 Я́коже и и́нде глаго́лет: Ты eси́ свяще́нник во век по чи́ну Мелхиседе́кову.
7 И́же во днех пло́ти Своея́ моле́ния же и моли́твы к Могу́щему спасти́ Его́ от сме́рти с во́плем кре́пким и со слеза́ми прине́с, и услы́шан быв от благогове́инства.
8 А́ще и Сын бя́ше, оба́че навы́че, отону́дуже пострада́, послуша́нию,
9 И соверши́вся бысть всем послу́шающим Его́ вино́вен спасе́ния ве́чнаго.
10 Нарече́н от Бо́га Первосвяще́нник по чи́ну Мелхиседе́кову.
11 О не́мже мно́гое нам сло́во и неудо́бь сказа́емое глаго́лати, поне́же не́мощни бы́сте слу́хи.
12 И́бо до́лжни су́ще бы́ти учи́тели ле́та ра́ди, па́ки тре́буете учи́тися, ка́я пи́смена нача́ла слове́с Бо́жиих, и бы́сте тре́бующе млека́, а не кре́пкия пи́щи.
13 Всяк бо причаща́яйся млека́ неиску́сен сло́ва пра́вды, младе́нец бо есть.
14 Соверше́нных же есть тве́рдая пи́ща, иму́щих чу́вствия обуче́на до́лгим уче́нием в разсужде́ние добра́ же и зла.
Глава 6
1 Те́мже оста́вльше нача́ла Христо́ва сло́во, на соверше́ние да веде́мся, не па́ки основа́ние покая́ния полага́юще от ме́ртвых дел, и ве́ры в Бо́га,
2 Креще́ний, уче́ния, возложе́ния же рук, воскресе́ния же ме́ртвых и суда́ ве́чнаго.
3 И сие́ сотвори́м, а́ще Бог повели́т.
4 Невозмо́жно бо просвеще́нных еди́ною и вкуси́вших да́ра небе́снаго, и прича́стников бы́вших Ду́ха Свята́го,
5 И до́браго вкуси́вших Бо́жия глаго́ла и си́лы гряду́щаго ве́ка,
6 И отпа́дших, па́ки обновля́ти в покая́ние, второ́е распина́ющих Сы́на Бо́жия себе́ и облича́ющих.