6 Прии́де же к Си́мону Петру́, и глаго́ла Ему́ той: Го́споди, Ты ли мои́ умы́еши но́зе?
7 Отвеща́ Иису́с и рече́ ему́: е́же Аз творю́, ты не ве́си ны́не, разуме́еши же по сих.
8 Глаго́ла Ему́ Петр: не умы́еши но́гу мое́ю во ве́ки. Отвеща́ ему́ Иису́с: а́ще не умы́ю тебе́, не и́маши ча́сти со Мно́ю.
9 Глаго́ла Ему́ Си́мон Петр: Го́споди, не но́зе мои́ то́кмо, но и ру́це и главу́.
10 Глаго́ла ему́ Иису́с: измове́нный не тре́бует, то́кмо но́зе умы́ти, есть бо весь чист, и вы чи́сти есте́, но не вси.
11 Ве́дяше бо предаю́щаго Его́, сего́ ра́ди рече́, я́ко не вси чи́сти есте́.
12 Егда́ же умы́ но́ги их, прия́т ри́зы Своя́, возле́г па́ки, рече́ им: ве́сте ли, что сотвори́х вам?
13 Вы глаша́ете Мя Учи́теля и Го́спода, и до́бре глаго́лете, есмь бо.
14 А́ще у́бо Аз умы́х ва́ши но́зе, Госпо́дь и Учи́тель, и вы до́лжни есте́ друг дру́гу умыва́ти но́зе.
15 О́браз бо дах вам, да я́коже Аз сотвори́х вам, и вы твори́те.
16 Ами́нь, ами́нь глаго́лю вам: несть раб бо́лий го́спода своего́, ни посла́нник бо́лий посла́вшаго его́.
17 А́ще сия́ ве́сте, блаже́ни есте́, а́ще творите́ я́.
18 Не о всех вас глаго́лю: Аз бо вем, и́хже избра́х: но да Писа́ние сбу́дется: яды́й со Мною хлеб воздви́же на Мя пя́ту свою́.
19 Отсе́ле глаго́лю вам, пре́жде да́же не бу́дет, да, егда́ бу́дет, ве́ру и́мете, я́ко Аз есмь.
20 Ами́нь, ами́нь глаго́лю вам: прие́мляй, а́ще кого́ послю́, Мене́ прие́млет: а прие́мляй Мене́ прие́млет Посла́вшаго Мя.
21 Сия рек Иису́с возмути́ся ду́хом и свиде́тельствова и рече́: ами́нь, ами́нь глаго́лю вам, я́ко еди́н от вас преда́ст Мя.
22 Сзира́ху же ся между́ собо́ю ученицы́, недоуме́ющеся, о ком глаго́лет.
23 Бе же еди́н от учени́к Его́ возлежя́ на ло́не Иису́сове, его́же любля́ше Иису́с:
24 Поману́ же сему́ Си́мон Петр вопроси́ти, кто́ бы был, о не́мже глаго́лет.
25 Напа́д же той на пе́рси Иису́совы, глаго́ла Ему́: Го́споди, кто́ есть?
26 Отвеща́ Иису́с: той есть, ему́же Аз омочи́в хлеб пода́м. И омо́чь хлеб, даде́ Иу́де Си́монову Искарио́тскому.
27 И по хле́бе тогда́ вни́де в онь сатана́. Глаго́ла у́бо ему́ Иису́с: е́же твори́ши, сотвори́ ско́ро.
28 Сего́ же никто́же разуме́ от возлежа́щих, к чесому́ рече́ ему́.
29 Не́цыи же мня́ху, поне́же ковче́жец имя́ше Иу́да, я́ко глаго́лет ему́ Иису́с: купи́, е́же тре́буем на пра́здник: или́ ни́щим да не́что даст.
30 Прии́м же он хлеб, а́бие изы́де: бе же нощь. Егда́ изы́де,
31 Глаго́ла Иису́с: Ны́не просла́вися Сын Челове́ческий, и Бог просла́вися о Нем.
32 А́ще Бог просла́вися о Нем, и Бог просла́вит Его́ в Себе́, и а́бие просла́вит Его́.
33 Ча́дца, еще́ с ва́ми ма́ло есмь, взы́щете Мене́, и я́коже рех иуде́ем, я́ко а́може Аз иду́, вы не мо́жете приити́, и вам глаго́лю ны́не.
34 За́поведь но́вую даю́ вам, да лю́бите друг дру́га, я́коже возлюби́х вы, да и вы лю́бите себе́.
35 О сем разуме́ют вси, я́ко Мои́ ученицы́ есте́, а́ще любо́вь и́мате между́ собо́ю.
36 Глаго́ла Ему́ Си́мон Петр: Го́споди, ка́мо и́деши? Отвеща́ ему́ Иису́с: а́може Аз иду́, не мо́жеши ны́не по Мне ити́, последи́ же по Мне и́деши.
37 Глаго́ла Ему́ Петр: Го́споди, почто́ не могу́ ны́не по Тебе́ ити́? ны́не ду́шу мою́ за Тя положу́.
38 Отвеща́ ему́ Иису́с: ду́шу ли твою́ за Мя положи́ши? Ами́нь, ами́нь глаго́лю тебе́, не возгласи́т але́ктор, до́ндеже отве́ржешися Мене́ три́щи.
Глава 14
1 Да не смуща́ется се́рдце ва́ше, ве́руйте в Бо́га, и в Мя ве́руйте.
2 В дому́ Отца́ Моего́ оби́тели мно́ги суть, а́ще ли же ни, рекл бых вам: иду́ угото́вати ме́сто вам.
3 И а́ще [145] угото́влю ме́сто вам, па́ки прииду́ и поиму́ вы к Себе́, да иде́же есмь Аз, и вы бу́дете,
4 И а́може Аз иду́, ве́сте, и путь ве́сте.
5 Глаго́ла Ему́ Фома́: Го́споди, не ве́мы, ка́мо и́деши, и ка́ко мо́жем путь ве́дети?
6 Глаго́ла ему́ Иису́с: Аз есмь путь и и́стина и живо́т, никто́же прии́дет ко Отцу́, то́кмо Мно́ю.
7 А́ще Мя бы́сте зна́ли, и Отца́ Моего́ зна́ли бы́сте у́бо, и отсе́ле позна́сте Его́, и ви́десте Его́.
8 Глаго́ла Ему́ Фили́пп: Го́споди, покажи́ нам Отца́, и довле́ет нам.
9 Глаго́ла ему́ Иису́с: толи́ко вре́мя с ва́ми есмь, и не позна́л еси́ Мене́, Фили́ппе? Ви́девый Мене́ ви́де Отца́, и ка́ко ты глаго́леши: покажи́ нам Отца́?