Велича́ем Тя,/ Живода́вче Христе́/ и почита́ем вси Пречи́стаго Ли́ка Твоего́/ пресла́вное изображе́ние.
Велича́ем Тя,/ Живода́вче Христе́,/ и чтим о́браз Твой святы́й,/ и́мже нас спасл еси́/ от рабо́ты вра́жия.
Велича́ем Тя,/ Живода́вче Христе́,/ и почита́ем пречи́стаго зра́ка Твоего́ непи́санное изображе́ние.
На Престо́ле огнезра́чнем/ в Вы́шних седя́й со Отце́м Безнача́льным и Боже́ственным Твои́м Ду́хом,/ благоволи́л еси́ яви́тися на земли́, я́ко челове́к,/ исполня́я предве́чный о нас Сове́т Святы́я Тро́ицы, Христе́ Иису́се;/ сего́ ра́ди и пострада́л еси́ пло́тию,/ да спасе́ши мир и вознесе́ши избра́нный Твоя́,/ иде́же при́сно, я́ко Бо́г, во сла́ве ца́рствуеши./ Сла́ва всеблаго́му Твоему́ Сове́ту,/ сла́ва прему́дрому смотре́нию Твоему́,/ сла́ва неизрече́нному снизхожде́нию Твоему́, Еди́не Человеколю́бче.
Прему́дрсть о́тчая,/ Сия́ние сла́вы и о́бразе Ипоста́си Его́,/ в нача́ле Небеса́ и зе́млю основа́вый,/ благослови́ достоя́ние Твое́,/ сохрани́ в ми́ре Це́рковь и град Твой и лю́ди Твоя́ спаси́.
Избра́нному пре́жде век соде́лати спасе́ние ми́ра,/ Вели́каго Сове́та А́нгелу, Сы́ну Бо́жию, Иису́су Христу́/ прииди́те, ве́рнии, поклони́мся и припаде́м Ему́/ сла́вяще неизрече́нное о нас Боже́ственное смотре́ние,/ и, я́ко изба́вленнии от ве́чныя сме́рти,/ вознесе́м Ему́, Спаси́телю на́шему и Бо́гу, благода́рственную пе́снь,/ душа́ми чи́стыми и нескве́рными устна́ми взыва́юще:/ сла́ва Тебе́, Го́споди, сла́ва Тебе́.
Велича́ем тя,/ Единоро́дный Сы́не Бо́жий, Иису́се Христе́,/ вся прему́дростию Твое́ю в нача́ле сотво́ршаго/ и челове́ческий па́дший род от ве́чныя сме́рти/ всеми́лостивно искупи́вшаго.
Мучи́тельнии сосу́ди устро́иша ти путь к Небесе́м,/ Христо́в во́ине Диоми́де,/ победи́в диа́вольския ко́зни,/ и на Небесе́х у Христа́ просла́вися,/ моли́ся за творя́щих ве́рою па́мять твою́.
И́стинный и непобеди́мый страстоте́рпец,/ благоче́стия и благода́ти Небе́сный таи́нник я́влься,/ Диоми́де пресла́вне,/ победи́в мучи́теля и победоно́сец быв,/ венцы́ побе́дными просла́вися.
Велича́ем тя,/ страстоте́рпче святы́й Диоми́де,/ и чтим честна́я страда́ния твоя́,/ я́же за Христа́ претерпе́л еси́.
Пусты́нный жи́тель, и в телеси́ а́нгел,/ и чудотво́рец яви́лся еси́, Богоно́се о́тче наш Иоаки́ме,/ посто́м, бде́нием, моли́твою/ Небе́сная дарова́ния прии́м,/ исцеля́еши неду́жныя и ду́ши ве́рою притека́ющих ти./ Сла́ва Да́вшему тебе́ кре́пость;/ сла́ва Венча́вшему тя;/ сла́ва Де́йствующему тобо́ю всем исцеле́ния.
В моли́твах не усыпа́я, преподо́бне,/ восприе́м си́лу на сопроти́внаго врага́,/ терпе́нием бо свои́м, о́тче Иоаки́ме преподо́бне,/ возше́д на Небеса́/ и жизнь тле́нную оста́вив на земли́,/ на нетле́ние пресели́лся еси́ Небе́сное./ Те́мже тя хвала́ми вси прославля́ем.
Ублажа́ем тя,/ преподо́бне о́тче Иоаки́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Прише́ствием честны́я Твоея́ ико́ны, Богоотрокови́це,/ обра́дованный днесь Богохрани́мый град Кострома́,/ я́коже дре́вний Изра́иль к киво́ту Заве́та,/ притека́ет ко изображе́нию лица́ Твоего́/ и воплоти́вшагося от Тебе́ Бо́га на́шего,/ да Твои́м Ма́терним к Нему́ предста́тельством/ при́сно хода́тайствуеши всем,/ под сень кро́ва Твоего́ прибега́ющим,/ мир и ве́лию ми́лость.
Днесь све́тло красу́ется преимени́тый град Кострома́/ и вся Ру́сская страна́,/ созыва́ющи к весе́лию вся Боголюби́выя наро́ды христиа́нския,/ на пресла́вное торжество́ Бо́жия Ма́тере,/ прише́ствия ра́ди чудотво́рнаго Ея́ и многоцеле́бнаго о́браза,/ днесь бо яви́ся нам пресве́тлое вели́кое со́лнце,/ прииди́те, вси Богоизбра́ннии лю́дие, но́вый Изра́иль,/ ко исто́чнику цельбоно́сному,/ источа́ет бо нам неоску́дныя ми́лости Пресвята́я Богоро́дица/ и избавля́ет вся гра́ды и страны́ христиа́нския/ невреди́мы от всех наве́т вра́жиих./ Но, о Всеми́лостивая Госпо́же, Де́во Богоро́дице, Влады́чице,/ спаси́ страну́ на́шу, и архиере́и, и вся лю́ди Твоего́ достоя́ния от всех бед/ по вели́цей Твое́й ми́лости, да зове́м Ти:/ ра́дуйся, Де́во, Христиа́ном похвало́.