Досто́йно есть вои́стинну превозноси́ти Тя славосло́вии, Всеблага́го,/ и Всепресвята́го, и Храни́теля жи́зни на́шея,/ со Отце́м и Сы́ном богонача́льно ца́рствующаго ви́димыми и неви́димыми,/ от Отца́ еди́наго исходя́щаго Бо́жия Ду́ха,/ вели́ка же и стра́шна, со стра́хом сла́вити.
Слава: Пое́м Тя все боголе́пно пе́нии Боже́ственными,/ Отца́ и Сы́на и Ду́ха Боже́ственнаго,/ Трисоста́вную Держа́ву,/ Еди́но Ца́рство и Госпо́дство.
И ныне: Влады́чице, Ма́ти Изба́вителя,/ приими́ моли́твы Твои́х непотре́бных раб,/ и́мже возда́ждь избавле́ние грехо́в/ и богоуго́дныя жи́зни прия́тное исправле́ние.
Всех Животе́, Све́те и Утеше́ние,/ Наде́ждо и Наслажде́ние, Всесвяты́й Ду́ше,/ Бо́га Тя зна́ющих, Отцу́ и Сы́ну Сопристо́льна,/ даро́в Твои́х сподо́би/ и грехо́в отпуще́ние да́руй им.
Всех живота́, Исто́чника Приснотеку́щаго Боже́ственных даро́в,/ Ду́ха Всесвята́го,/ я́ко Отцу́ Единосу́щна/ и Сы́ну Соприсносу́щна,/ в пе́снех благове́рно воспои́м и велича́им/ и я́ко Бо́гу ве́рою поклони́мся.
Поклоня́юся Тебе́, Влады́ко Уте́шителю Бо́же:/ поми́луй и спаси́ поклоня́ющияся Тебе́/ и Бо́га исповеда́ющия Тя.
Всех святых (В неделю 1-ю по Пятидесятнице)
И́же во всем ми́ре му́ченик Твои́х,/ я́ко багряни́цею и ви́ссоном,/ кровьми́ Це́рковь Твоя́ украси́вшися,/ те́ми вопие́т Ти, Христе́ Бо́же:/ лю́дем Твои́м щедро́ты низпосли́,/ мир жи́тельству Твоему́ да́руй,/ и душа́м на́шим ве́лию ми́лость.
Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики:/ тех моли́твами в ми́ре глубо́це/ Це́рковь Твою́, жи́тельство Твое́, Богоро́дицею соблюди́, Многоми́лостиве.
Велича́ем вас,/ апо́столи, му́ченицы, проро́цы и вси святи́и,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.
Собор всех святых, в земле Российской просиявших (В неделю 2-ю по Пятидесятнице)
Я́коже плод кра́сный Твоего́ спаси́тельнаго се́яния,/ земля́ Росси́йская прино́сит Ти, Го́споди, вся святы́я, в той просия́вшия./ Тех моли́твами в ми́ре глубо́це/ Це́рковь и страну́ на́шу Богоро́дицею соблюди́, Многоми́лостиве.
С Вы́шних призира́я, убо́гия прие́мля,/ посети́ нас, грехо́в ра́ди на́ших ско́рби те́рпящих, Влады́ко Всеми́лостиве,/ моли́твами Богоро́дицы и всех святы́х ру́сских/ да́руй земли́ на́шей ве́лию ми́лость.
Иерусали́ма Вы́шняго гра́жданы,/ от земли́ на́шея возсия́вшия/ и Бо́гу во вся́цем чину́/ и вся́ким по́двигом угоди́вшия,/ прииди́те, воспо́им, ве́рнии:/ о всеблаже́ннии земли́ Росси́йския засту́пницы,/ моли́теся ко Го́споду,/ да поми́лует сию́ от гне́ва Своего́,/ исцеля́я сокруше́ние ея́,/ и ве́рныя лю́ди Своя́ уте́шит.
Днесь лик святы́х, в земли́ на́шей Бо́гу угоди́вших, предстои́т в Це́ркви/ и неви́димо за ны мо́лится Бо́гу,/ а́нгели с ним славосло́вят,/ и вси святи́и Це́ркве Христо́вы ему́ спра́зднуют,/ о нас бо мо́лят вси ку́пно Преве́чнаго Бо́га.
Предста́телие страны́ на́шея неусы́пнии,/ хода́таи о нас ко Творцу́ непреста́ннии,/ не пре́зрите моле́ний на́ших,/ но предваря́юще на по́мощь, я́ко сро́дницы на́ши,/ ускори́те на моли́тву/ и потщи́теся на умоле́ние,/ предста́тельствующе при́сно о чту́щих вас.
Велича́ем Тя,/ Триипоста́сный Влады́ко,/ ве́рою правосла́вною зе́млю Ру́сскую озари́вшаго/ и святы́х сро́дников на́ших/ сонм ве́лий в ней просла́вльшаго.
Досто́йно есть велича́ти Тя,/ Богоро́дице,/ земли́ Ру́сския Цари́цу Небе́сную/ и люде́й правосла́вных/ Влады́чицу Держа́вную.
Ублажа́ем вас,/ чудотво́рцы на́ши сла́внии,/ зе́млю Ру́сскую доброде́тельми ва́шими озари́вшии/ и о́браз спасе́ния нам/ светоя́вленно показа́вшии.
Велича́ем вас,/ святи́и вси, в земли́ Росси́йстей просия́вшии,/ и чтим святу́ю па́мять ва́шу,/ вы бо мо́лите о нас/ Христа́ Бо́га на́шего.
Собор преподобных отцев, на святой горе Афонской просиявших (В неделю 2-ю по Пятидесятнице)
Пусты́ни Афо́нския отцы́,/ а́нгелы во пло́ти,/ испове́дники вку́пе и преподо́бныя,/ святи́тели же и му́ченики в пе́ниих почти́м,/ подража́юще доброде́телем их,/ зову́ще согла́сно и глаго́люще:/ сла́ва Просла́вльшему вы,/ сла́ва Венча́вшему вы,/ сла́ва в беда́х предста́тели нам вы Показа́вшему.