Священномученикам двум и многим
Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лости Твоея́ от нас,/ но моли́твами их в ми́ре упра́ви живо́т наш.
Я́ко свети́льницы незаходи́мии Разу́мнаго Со́лнца,/ соше́дшеся днесь восхва́лим пе́сньми,/ возсия́ли бо есте́ су́щим во тьме неразу́мия,/ всех созыва́юще к высоте́ благоче́стия, священному́ченицы./ Тем вопие́м вам: ра́дуйтеся, по́стников всех основа́ние.
Велича́ем вас,/ священному́ченицы Христо́вы (имена),/ и чтим святу́ю па́мять ва́шу:/ вы бо мо́лите за нас/ Христа́ Бо́га на́шего.
Преподобномученику единому
В тебе́, о́тче, изве́стно спасе́ся, е́же по о́бразу:/ прии́м бо крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со а́нгелы сра́дуется, преподо́бне (имя рек), дух твой.
Я́ко по́стника благоче́стна и иску́сна,/ и страда́льца произволе́нием честна́,/ и пусты́ни жи́теля сообра́зна,/ в пе́снех досто́йно восхва́лим (имя рек), приснохва́льнаго:/ той бо зми́я попра́л есть.
Ублажа́ем тя,/ преподобному́чениче (имя рек),/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Преподобномученикам двум и многим
Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лости Твоея́ от нас,/ но моли́твами их в ми́ре упра́ви живо́т наш.
Волне́ний мно́жество невла́жно проходя́ще,/ безпло́тныя враги́ струя́ми слез ва́ших кре́пко погрузи́ли есте́,/ Богому́дрии, преподо́бнии му́ченицы,/ и чуде́с дар прии́мше, моли́те непреста́нно о всех нас.
Ублажа́ем вас,/ преподо́бнии му́ченицы (имена),/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.
Мученице единой
Агница Твоя́, Иису́се, (имя рек)/ зове́т ве́лиим гла́сом:/ Тебе́, Женише́ мой, люблю́,/ и Тебе́ и́щущи страда́льчествую/ и сраспина́юся и спогреба́юся креще́нию Твоему́,/ и стражду́ Тебе́ ра́ди, я́ко да ца́рствую в Тебе́/ и умира́ю за Тя, да и живу́ с Тобо́ю;/ но я́ко же́ртву непоро́чную приими́ мя, с любо́вию поже́ршуюся Тебе́./ Тоя́ моли́твами, я́ко Ми́лостив, спаси́ ду́ши на́ша.
Храм твой всечестны́й,/ я́ко цельбу́ душе́вную обре́тше, вси ве́рнии/ велегла́сно вопие́м ти:/ де́во му́ченице (имя рек), великоимени́тая,/ Христа́ Бога моли́ непреста́нно о всех нас.
Велича́ем тя,/ страстоте́рпице Христо́ва (имя рек),/ и чтим честно́е страда́ние твое́,/ е́же за Христа́/ претерпе́ла еси́.
Мученицам двум и многим
Агницы слове́сныя,/ Агнцу и Па́стырю приведо́стеся муче́нием ко Христу́/ тече́ние сконча́вше и ве́ру соблю́дше;/ те́мже днесь ра́достною душе́ю соверша́ем, досточу́днии,/ святую ва́шу па́мять,/ Христа́ велича́юще.
Страстоте́рпиц Христо́вых па́мять пра́зднуем,/ и ве́рою прося́ще по́мощи,/ изба́витися всем от вся́кия ско́рби, зову́ще:/ Бог наш с на́ми,/ и́же сих просла́вивый, я́коже изво́ли.
Велича́ем вас,/ страстоте́рпицы святы́я (имена),/ и чтим честна́я страда́ния ва́ша,/ я́же за Христа́/ претерпе́ли есте́.
Преподобной жене единой
В тебе́, ма́ти, изве́стно спасе́ся, еже по о́бразу:/ прии́мши бо крест, после́довала еси́ Христу́,/ и де́ющи учи́ла еси́ презира́ти у́бо плоть, прехо́дит бо;/ прилежа́ти же о души́, ве́щи безсме́ртней;/ те́мже и со а́нгелы сра́дуется, преподо́бная (имя рек), дух твой.
За любо́вь Госпо́дню, преподо́бная,/ поко́я жела́ние возненави́дела еси́,/ поще́нием дух твой просвети́вши:/ кре́пко бо зве́ри победи́ла еси́;/ но молитвами твои́ми проти́вных шата́ние разори́.
Ублажа́ем тя,/ преподо́бная ма́ти (имя рек),/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Преподобным женам двум и многим
И́стинному жела́нию уневе́стившеся, Христосла́внии,/ и вре́меннаго обру́чника отве́ргшеся совокупле́ния,/ и доброде́тельными по́двиги возра́стше,/ на высоту́ востеко́сте нетле́ния,/ красноду́шнии и многобога́тии,/ столпи́ мона́шествующих жен и пра́вило;/ те́мже о нас моли́те непреста́нно, любо́вию ва́шу па́мять пра́зднующих.