Ца́рскую диади́му обагри́л еси́ кро́вию твое́ю,/ Богому́дре му́чениче,/ за скиптр крест в руку́ прии́м,/ яви́лся еси́ победоно́сец,/ и же́ртву непоро́чну Влады́це прине́ся еси́ себе́,/ я́ко бо а́гнец незло́бив от раба́ заколе́н еси́,/ и ны́не ра́дуяся предстои́ши Святе́й Тро́ице./ Моли́ся о держа́ве сро́дников твои́х богоуго́дней бы́ти/ и сыново́м росси́йским спасти́ся.
Я́ко благочести́ваго ко́рене Боголюби́вый произы́де плод,/ я́ко а́гня незло́биво, непови́нно во младе́нстве за́клан бысть/ от властолю́бца вку́пе и зла́го раба́./ Тем, я́ко златы́ми кры́лы,/ душе́вною чистото́ю и младе́нческим незло́бием/ к Небе́сней высоте́ возлете́л еси́, страстоте́рпче Дими́трие./ И ны́не кровь твоя́ от земли́ та́йно вопие́т к Бо́гу,/ я́ко Авеля пра́веднаго./ Сего́ ра́ди покланя́емся ве́рою ти,/ сла́вяще просла́вльшаго тя Бо́га,/ Его́же моли́ стране́ на́шей богоуго́дней бы́ти/ и сыново́м ру́сским спасти́ся.
Всеору́жеством Ду́ха благода́ти вооруже́н быв/ и необори́м столп и утвержде́ние оте́честву своему́ показа́ся,/ я́ко а́гнец незло́бивый, от врага́ непра́ведно закла́н быв и в же́ртву непоро́чну Го́сподеви принесе́ся./ И ны́не дар благода́ти от всех Подвигополо́жника прие́м,/ источа́вши всем исцеле́ние, достохва́льне благове́рный царе́виче кня́же Дими́трие./ Сла́ва Восприи́мшему тя от земны́х в Небе́сная,/ сла́ва Венча́вшему тя венце́м неувяда́емым,/ сла́ва Де́йствующему тобою́ всем исцеле́ния.
Возсия́ днесь в сла́вней па́мяти твое́й ве́рным весе́лие,/ я́ко бо доброра́сленный грезн* прозя́бл еси́/ и Христу́ красе́н плод прине́сл еси́ себе́;/ те́мже и по убие́нии твое́м соблюде́ те́ло твое́ нетле́нно,/ страда́льчески обагре́нное кро́вию,/ благоро́дне свя́те Дими́трие,/ соблюда́й оте́чество твое́ и град твой невреди́м,/ тому́ бо еси́ утвержде́ние.
Велича́ем тя,/ святы́й благове́рный царе́виче Дими́трие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.
Изволе́нием Боже́ственнаго Ра́зума в пусты́ню всели́лся еси́,/ преподо́бне о́тче Евфроси́не,/ и та́мо впери́в ум твой в Небе́сная,/ равноа́нгельное житие́ пожи́л еси́,/ в моли́твах, бде́ниих и поще́ниих о́браз быв твои́м ученико́м./ Те́мже и Христо́с Бог наш, ви́дяй твоя́ труды́ и по́двиги,/ в Небе́сная селе́ния прия́т тя./ Ны́не у́бо, я́ко име́яй ко Го́споду ве́лие дерзнове́ние,/ помина́й ста́до твое́,/ е́же собра́л еси́, Богому́дре,/ и моли́ Христа́ Бо́га спасти́ся душа́м на́шим.
Жите́йскую печа́ль и всяк мяте́ж ми́ра сего́/ любве́ ра́ди Христо́вы со дерзнове́нием отве́ргл еси́, блаже́нне,/ и повеле́нная распя́тым Го́сподем И́исусом Христо́м/ вся испра́вил еси́,/ и, Того́ яре́м взем, во всем во́ли Его́ повину́лся еси́,/ и, благочести́в де́латель, живо́тным* за́поведем Христо́вым/ благотру́дно прилежа́л еси́./ И сего́ ра́ди Бог просла́ви тя/ и по преставле́нии чудеса́ показа́ от честна́го гро́ба твоего́./ Те́мже и неоску́дно угобзи́ся* оби́тель твоя́,/ и ни́щим бысть бога́тное приста́нище и покро́в,/ о́тче наш преподо́бне Евфроси́не,/ моли́ Христа́ Бо́га, да спасе́т ду́ши на́ша.
Изволе́нием Боже́ственнаго Ра́зума всели́лся в пусты́ню/ и та́мо впери́в свой ум в Небе́сныя оби́тели/ и ра́вно а́нгелом житие́ пожи́в на земли́,/ в моли́твах, и в труде́х, и в поще́ниих о́браз быв свои́м ученико́м./ Те́мже Бог, ви́дев твое́ благое́ изволе́ние,/ умно́жи тебе́ ча́да в пусты́ни,/ слез твои́х ту́чами напая́ема,/ но, я́ко име́я дерзнове́ние к Бо́гу,/ помина́й ста́до свое́, е́же собра́л еси́, му́дре,/ и не забу́ди, я́коже обеща́лся еси́, посеща́я чад свои́х,/ Евфроси́не, преподо́бне о́тче наш.
Бо́жиим светоли́тием просвеще́н, о́тче,/ по́стническое стяжа́в жи́тельство, преподо́бне,/ и́ноком предо́брый наста́вниче и по́стником благо́е украше́ние./ Сего́ ра́ди Госпо́дь, труды́ твоя́ ви́дев, да́ром чуде́с обогати́ тя,/ источа́еши бо исцеле́ния./ Мы же, ра́дующеся, вопие́м ти:/ ра́дуйся, о́тче Евфроси́не, и́ноком удобре́ние.
Ублажа́ем тя,/ преподо́бне о́тче Евфроси́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.
Изря́дством жития́ чистоту́ де́вства прии́м, Серапио́не,/ и вся кра́сная ми́ра сего́ возненави́дев,/ Христа́ еди́наго возлюби́л еси́./ Сего́ ра́ди во вну́треннюю пусты́ню всели́вся и, со зверьми́ жи́вый,/ весь Христо́в спо́стник и друг Евфроси́на учи́теля твоего́ был еси́./ Те́мже и мо́лим тя: помина́й нас, чту́щих святу́ю па́мять твою́, да зове́м ти:/ ра́дуйся, пусты́нная похвале́, преподо́бне о́тче наш.