А который человек во Христе Бозе моем самого существа и самыя невидимыя ипостаси не исповедует в нем, таковый подобен есть мужу ругателю, или дураку, паче же беснующемуся, иже бы аще, видя царя земнаго лице, и венец и багряницу на себе носяща, и венец и ризы на царе почитает и покланяется, а лице самое царево безчестит, и ругается ему, и отметается его: и за буйство и беснование милости сподобляется от царя своего; аще ли от ума тако дурит таковый, лютой казни смертной предается в правду. Тако, чадо мое, и о Христе разумей. Самое существо Божества его плотию, яко ризою, облеченно, и яко удица червем. Сице святии вси научают нас о Христе разумевати. А Павел Апостол плоть Христову завесою называет, ко евреом в послании зачало 354. А тут же в послании, в зач. 303, самую ипостась Сыновню во Христе исповедует. И святый Иоанн Дамаскин глаголет, в воскресном богородичне 6-го гласа на стиховне: Творец и избавитель мой, Пречистая, Христос Господь, из твоих ложесн прошед, в мя оболкся, и прочая там. И 5-го гласа во 2-й песни ирмос, от самого Божества глаголет: Видите, видите, яко аз есмь Бог ваш, иже в плоть оболкся волею своею, да спасу Адама, лестию падшаго преступлением змииным. И тмы есть таковых словес и стихов в книгах святых, имиже забросаю и забию всякаго врага Христова, яко камением. Аз бо знаю, чадо мое, Христа Бога, истиннаго света, и пречистыя нозе его слезами умываю по вся дни и нощи, яко блудница. И дана ми некогда зде книга от Пресвятыя Матери его Богородицы во сне, якоже и Роману певцу свиток. В тойже книге имя: Зерцало премудрости Божии. И прочтох се, и положих ю в недра своя, а не снедох ю: яко уш-то недостойн еще грешный снести ю. И то вем аз: которыя люди во Христе самого существа не исповедуют, и те люди люте осуждени будут с еретицы, аще не исправлятся и не покаются, якоже подобает. И ты, чадо, аще знаеш таковых, моли их, дабы престали от таковаго злаго начинания. И аз молю их со всяцем усердием, и полагаю главу свою на нозе их, и со слезами вопию им: о, возлюбленнии отцы и братия, христоименитое достояние, роде избранный, царское священие, люди обновления! упразднитеся и разумейте, яко есть, есть самое существо Божества во Христе Исусе Господе нашем, изтрезвитеся праведно и не согрешайте, и не имите веры прелщающим вас о том и смущающим. Аще и ангел будет кто, отвращайтеся его и плюйте на него! Аще бы мощно было мне, юзнику Феодору, аз бы возшел на высоту Фроловския башни посреде Москвы, и вострубил велегласно трубою во все царьство, яко есть, есть, есть пресамое существо Божества во Христе Исусе Сыне Божии. Не прельщайтеся, братия, и не отметайтеся его, Создателя всех, да не умрете вечною смертию бесконечною. Аз бо в никониянех не слыхал такова зломудрия отнюд. И аще они уведают в вас, братие, таковое христоненавистное новое злочестие и подобную мудрость, и за то вас начнут паки мучити и убивати: неповинны уже будут пред Богом и святыми его, и вам те муки их начало болезнем будут вечных мук. И на крестное Христово сущее знамение в сложении перстов велию хулу сами наносите тем неразумием и новоложным толкованием своим. Никон, враг Божий, безумный бывший учитель, поклепал и оболгал напрасно церковное оно правое сложение перстов в старых книгах, — назвали несториянством, не смысля. А по вашему нынешнему новому мудрованию и в правду тако два Сына будут, по Несторию зловерному, еже глаголете в трех лицех Святыя Троицы самое существо, во Отце и Сыне и Святем Дусе, а во Христе не самое существо глаголете. И сие ваше зловерие и дурак узнает, яко два Сына исповедуете, — великаго да малаго, и тако четверицу славите, а не Троицу Святую. И сего ради паки и паки молю вы: покинте то злое и душепагубное мудрование, егоже несть, несть во всех наших древних православных книгах церковных, за нихже аз стражду и умираю; и вы тех же держитеся, и любите и стражите же. И в новых явно несть еще того. Разумейте, возлюблении, о сем испытно во всех писаниих святых. Присно бо Пресвятая Троица Бог наш Троица есть: и преже воплощения Христа Сына Божия Тройца бе, и по воплощении Христове и со восприятием его Троица есть неизменно, — токмо бо еже не бе прият Сын, и еже бо бе пребысть непреложно, Бог сый истинный, Спаситель наш. И много бы писах вам о сем, да бумаги мало, а промыслити боле несть воли. Сами весте: все бывает с нужею великою и всего скудость. И тако можете разумети о всем: даст бо вам Господь разум и откровение в познание правды его.