Славянская кормчая. Без поставления епископля, да не поет на амвоне; сеже да держится и на мнисех. Игумен же поставлением от епископа, токмо во своем монастыре, да поставляет чтецы: поставляет же чтецы и сельский епископ.
Аще и пострижение кто мнишеское имать, и аще от епископа поставления не приимет, да не чтет в соборе на амвоне священных Божиих книг. Такоже и мирский человек того да не творит. Игумени же, аще же суть и пресвитери, поставлением епископа старейшинство в монастырех прияша, власть дана есть им поставляти чтецы, токмо в своих монастырех: но и сельстии епископи чтецы, да поставляют, якоже десятое правило, иже во Антиохии собора повелевает, иподиаконы, и заклинатели да поставляют же. Аще и Великий Василий, в 88-м правиле своем, не прощает их, без повеления своего в церковную службу никого же приимати, понеже тии, небрежением и леностию, о избрании таковых не прилежат. (О сем ищи 6-го собора правило 33).