Блажен муж, иже не иде на совет нечестивых, и на пути грешных не ста, и на седалищи губителей не седе; но в законе Господни воля eго, и в законе eго поучится день и нощь. И будет яко древо насажденое при исходищих вод, eже плод свой даст во время свое, и лист eго не отпадет; и вся, eлика аще творит, успеет. Не тако нечестивiи, не тако; но яко прах, eгоже возметает ветр от лица земли. Сего ради не воскреснут нечестивiи на суд, ниже грешницы в совет праведных. Яко весть Господь путь праведных, и путь нечестивых погибнет.
Вскую шаташася языцы, и людiе поучишася тщeтным? Предсташа царiе земстiи, и князи собрашася вкупе на Господа и на христа eго. Расторгнем узы их и отвержем от нас иго их. Живый на небесех посмеется им, и Господь поругается им. Тогда возглаголет к ним гневом своим и яростiю своею смятет я; аз же поставлен eсмь царь от него над Сiоном, горою святою eго, возвещаяй повеленiе Господне. Господь рече ко мне; сын мой eси ты, аз днесь родих тя; проси от менe, и дам ти языки достоянiе твое, и одержанiе твое концы земли; упасеши я жезлом железным, яко сосуды скудeльничи сокрушиши я. И ныне, царiе, разумейте, накажитеся вси судящiи земли. Работайте Господеви со страхом, и радуйтеся eму со трепетом. Прiимите наказанiе, да не когда прогневается Господь, и погибнете от пути праведнаго, eгда возгорится вскоре ярость eго; блажени вси надеющiися нань.