Псалом 4.
Внегда призвати ми, услыша мя Бог правды моея; в скорби распространил мя eси; ущедри мя и услыши молитву мою. Сынове человечестiи, доколе тяжкосердiи? вскую любите суету и ищете лжи? И уведите, яко удиви Господь преподобнаго своего. Господь услышит мя, внегда воззвати ми к нему. Гневайтеся, и не согрешайте, яже глаголете в сердцах ваших, на ложах ваших умилитеся; пожрите жертву правды и уповайте на Господа. Мнози глаголют; кто явит нам благая? знаменася на нас свет лица твоего, Господи. Дал eси веселiе в сердцы моем; от плода пшеницы, вiна и eлеа своего умножишася; в мире вкупе усну и почiю, яко ты, Господи, eдинаго на упованiи вселил мя eси.
Псалом 5.
Глаголы моя внуши, Господи, разумей званiе мое. Вонми гласу моленiя моего, царю мой и Боже мой; яко к тебе помолюся, Господи. Заутра услыши глас мой; заутра предстану ти, и узриши мя; яко Бог не хотяй беззаконiя ты eси; не приселится к тебе лукавнуяй, ниже пребудут беззаконницы пред oчима твоима; возненавидел eси вся делающыя беззаконiе. погубиши вся глаголющыя лжу; мужа кровей и льстива гнушается Господь. Аз же множеством милости твоея вниду в дом твой, поклонюся ко храму святому твоему, в страсе твоем. Господи, настави мя правдою твоею, враг моих ради исправи пред тобою путь мой. Яко несть во устех их истины, сердце их суетно, гроб отверст гортань их, языки своими льщаху. Суди им, Боже, да отпадут от мыслей своих; по множеству нечестiя их изрини я, яко преогорчиша тя, Господи. И да возвеселятся вси уповающiи на тя, во век возрадуются, и вселишися в них; и похвалятся о тебе любящiи имя твое. Яко ты благословиши праведника, Господи, яко oружiем благоволенiя венчал eси нас.