Дром сыкавэ́н ко вечно джиибэ́н.
Со ту рипирибна́стыр нашавэ́с,
Дрэ да лыла́ гара́в, соб ту латхья́н
Чявэ́н, савэ́н забистырдя́н локхэ́с,
Тэ акана́ илэ́са ґалыя́н.
Вса ж дэ́ла адава́ кирки́ годы́,
Со дрэ лыла́ про веки[59] ачяды́.
Сонэто 078
Мирья́ Муза́, бут мо́лы тут кхардём,
Ту дэ́сас да́сави мри зор бари́,
Со бутджинэ́ рисинэ́ про мро дром,
Чивэ́н гиля́ тэлэ́ паты́в тыри́.
Кэ ту и бичиба́кро забага́ла,
О бишэрэ́скро пхакорья́ латхэ́ла,
Конэ́стэ сыс — фэды́р ёв заурня́ла,
Кон го́жо сы — дрэва́н шука́р ячела.
Сом пхутькирдо́: бут мо́л лава́ мирэ́!
Нэ тутыр яг илэ́скири явья́,
Фэды́р паш тутэ мэк бага́н ваврэ́,
Дрэ лэ́ндэ тыри сла́ва бария́.
Саекх, гилы́ мири́, учес шэро́
Ґаздэ́с миро́ ту бигодя́киро.
Сонэто 079
Жыка́й мэ тутыр мири зор мангьём,
Тыро́ шукарипэ́н сыс дрэ гилы́,
Нэ акана́ мри глос мэ нашадём,
Мри Муза насвалы́ сыс дур гэи́.
Пал го́жыма тыро́ уса́ бага́в,
Вави́р кэрэ́л фэды́р, мэ ґалыём,
Нэ со пал тутэ дрэ гилы́ пхэна́в,
Тутыр чёра́в, соб тукэ отдыём:
Лэём дро длуго и чёрдём лава́,
Тырэ́ шукарипна́са сыкадэ́,
Тэ тукэ ж да́ва лэн пал адава́,
Со тутыр сыс ада лава́ чёрдэ́.
Ивья́ ман пал мирэ́ гиля́ шарэ́са,
Со тутыр мэ лыём, — одо кинэ́са.
Сонэто 080
Пал тутэ мри гилы́ зор нашавэ́ла,
Рипири́, со вави́р фэды́р дро лав:
Бари́ годы́ тэ зор ёв сыкавэ́ла, –
Тэ чиб мири́ — спхандлы́. Сыр тэ кхара́в
Шукарипэ́н тыро́? — Паны́ баро́:
Тыкнэ́, пхарэ́ ли ба́рки — рикирэ́ла,
Ничи́ сы ангил лэ́скро мро «чяро́», –
Пирда́л тро лачипэ́н саекх дживэ́ла.
Тро васт ковло́ рики́рла ман опра́л,
Ёв кэ́рла дром пир тутэ, кай камэ́л,
Сыр — пхагирдо́ — дав, чёроро́, муя́л,
Ёв учипна́стыр лэ́ла тэ дыкхэ́л:
Мэк ёв опрэ́, мэ — чюрдыно́ аври́,
Кама́м, сыр камлыпэ́н сыс хась мири́.
Сонэто 081
Мэ ль ачява́в про гро́бо тыро лав,
Или ту ман дро гро́бо удыкхэ́са,
Мэк дрэ сарэ́ годя́ тэ хасёва́в,
Ту адатхы́р про веки ачявэ́са.
Тро лав зоралэды́р, сыр мэрибэ́н,
Мэ екх рипирибэ́н на ачява́ва,
Ман лэ́ла пхув, сыр сарэ́ манушэ́н,
Тут дрэ якха́ джидэ́ мэ згарава́ва.
Дрэ мрэ гиля́ ту лэ́са тэ дживэ́с,
Якха́ чявэ́нгирэ тут удыкхэ́н,
Высыкляки́рна тут чиба́ миштэ́с,
Пиридживэ́с амэ́н сарэджинэ́н.
Джиды́ сан дрэ лава́ — мири́ гилы́
Ваш тукэ сы адя́кэ зоралы́.
Сонэто 082
Прэ бахт, нанэ́ мри Муза три ромны́,
Ничи́, мэк мрэ лава́ ту на шарэ́са,
Коли́ мири́ гилы́ на шукарны́, –
Ту да́савья латхэ́са, кай камэ́са.
Годя́са, сыр и пэ́са, сан шуки́р,
Латхэ́са дро мро лав чёрорипэ́н,
Ма́нгэс, соб тэ рода́в лава́ фэды́р,
Тэ сыкава́в екха́тыр гожыпэ́н.
Кэра́в адя́кэ: нэ коли́ ваврэ́
Вса дорэсэ́н дрэ на́ртыма[60] учё,
Ґалёса: дрэ чяче лава́ мирэ́
(Дава́ мо́л бут) сы мро ило́ чячё.
Мэк сыкавэ́н ваврэ́ патри́н фэды́р.
Со тукэ трэ́би? — О рат лолэды́р?
Сонэто 083
На трэ́би тукэ макхипэ́н, патя́в,
Тэ на дыкхтём прэ тутэ николи́,
Шукарэды́р сарэ́стыр да латха́в,
Со ковлыпэ́н кэрэ́ла дрэ гилы́.
Паладава́ лава́ мэ зрикирдём,
Соб ту пэс кокори́ сыкадэя́н,
Сыр дывэсэ́стыр упрэды́р тро дром,
Ивья́ шарэ́на тут, соб бария́н.
Сыр миро грэ́хо вытходя́н дова,
Со биглося́киро мро шарибэ́н;
Сыр тутыр тэлэды́р мирэ́ лава́,
Ваврэ́ ж кэрэ́н паты́в, сыр умарэ́н.
Ка́жно три якх буты́р дэл джиибэ́н,
Сыр дуй тырэ́ поэ́ты накхувэ́н.
Сонэто 084
Нико́н — саро́! Кон выпхэндя́ буты́р:
Хай, ту сан ту, гиля́са ракири́,
Дро миштыпэ́н ада́савья шуки́р,
Сыр тут, дрэ дар ваш пэ́скэ рикири́?
Нашты́, нэ сыр мэк на́бут бутэды́р
Тэ на́ дэс го́жыма, коли́ бага́са;
Екх одова́, кон сыкавэ́ла, сыр,
Хай, ту сан ту, барьёла трэ слава́са.
Мэк тэ кэрэ́л э чёрори́ патри́н,
Нэ на тховэ́ла хоханэ́ лава́,
Да́саво муршыпэ́н чячё исы́н,
Ачела, кай на лэ́, шардо́ дова́.
Коли́ ж тут гудлыпна́са бишарэ́н,
Ками́ дова́, прилэ́са кошыбэ́н.
Сонэто 085
Мри Муза чиб рики́рла тэ ило́,
Сыр бутджинэ́ бага́на шарибэ́н;
Совнакунэ́ порэ́са зачиндло́,
Со лэ́нгэ сарэ́ музы куч скэдэ́н.
Лачё ило́, машки́р лаче лава́,
Вса на́барэ годя́са тут камэ́ла,
Тэ пал шука́р гиля́ екх адава́:
«Аи́-аи́!» — нэ пэ́скиро, додэ́ла.
Шарэ́на тут, тэ мэ: «Аи́-аи́!»,
Мэк лаворо́ дода́ва бутэды́р;
О камлыпэ́н илэ́са ґаздэи́,
Лава́ — палэ́, ило́ сы англэды́р.
Чюв э тими́н лавэ́нгэ, сыр пхурдэ́н,
Тэ мрэ илэ́скэ пало чячипэ́н.
Сонэто 086
Барэ́ пхакэ́нца лэ́скири гилы́
Тро гожыпэ́н лыя́ тэ дорэсэ́л,
Дова́ кэрэ́л годы́ мри лангалы́,
Вашэ гилы́ миро́ ило́ мэрэ́л.
На-манушы́тка ль лэс сыклякирдэ́?
Лэ́скрэ гиля́тыр сом, ґалёв, муло́.
Нашты́, соб на́жужэ дова́ кэрдэ́?
Кай мри гилы́? Дынэ́ ман якхало́?
Нат! На дова́ кхэри́тко, кон годы́
Додэ́ла лэ́скэ дрэ гиля́ раты́,
На лэ́са мири чиб зарикирды́,
Нанэ́ мри дукх пал адая́ буты́.
Коли́ дживэ́с дрэ лэ́скиро шэро́,
Ничи́ — ваш ма́нгэ, мэ сом чёроро́.
Сонэто 087
Дэвлэ́са! Э тими́н тыри́ буты́р,
Сыр ма́ндэ. Ту джинэ́с, мэ плэскирдём,
Нэ мри кисы́к[61] илэ́стыр тыкнэды́р,
Со ма́ндэ сыс, дрэ тутэ нашадём.
Сыр мангипна́са тут тэ рикира́в?