32. б) О Восточных Патриархах
В той же Книге о вере пишется о четырех Вселенских Восточных Патриархах в гл. 20-й:
«Обаче же помощию Господнею в Восточной Церкви четырех верховнейших пастырей, по подобию четырех Евангелистов, имеем, от нихже никогда же ни в чем един над другаго вящшаго себе начальства и большаго и праваго суда не приписующе, братски же в любви и в покорении Христове живут. И тех не яко главу всего мiра, но яко честнейшия уды Христовы Церкве почитаем. И аще бы хотя един от них и ниспал и все, еже подлежащее под паствою, стадо его в туже яму вринул, единаче православную Церковь ни в чем бы соблазнити могл, зане имеет во всем равныя ему пастыри три, от того свободны падения, истинную и безсмертную имеющих над собою Главу, Христа Спаса нашего, Бога. И аще бы и получилося когда таковое заражение, или не восхотел бы покаятися, то яко гнилый уд отъят и прочь отвержен будет. Но рекут ли Римляне, яко патриарси со всем духовенством Турскому дани дают? И то есть правда: нечему тому дивитися: аще и дают, да волю имут свое благочестие содержати».
В той же Книге о вере, глава 25, о патриарсех:
«Иже правыи кафолическия веры отступиша, не пребывше в той, спасение свое погубиша, якоже святитель Афанасий Патриарх Александрийский в толковании веры описует. Грецы и Русия ту праве кафолическую веру, юже святитель Афанасий описует, исповедают, то есть нам и спасение известное. А иже не по Афанасию символ исповедают, якоже он тамо свидетельствует, тем погибель вечная. Яко иже от соединения и сообщения Святыя единыя Кафолическия и Апостольския Церкве, иже на востоце, отступиша, и иже в ней целе и совершенне не пребывают, живота вечнаго и сообщения в небесех со святыми ангелы и со святыми Божиими не доступят. Иже пастыря народу Русийскому Богом даннаго, православнаго архиепископа Константиня града патриарха Вселенскаго отступиша, к немуже еже не привязатися сердечне, и во учении и в послушании его не пребывати, блудити есть, а заблуждшия овцы, по Спасову словеси, и агнцы татие и волцы похищают».
Тоя-же книги и главы во 2-ом отделении тако пишется:
«Слушати восточныя Церкве и патриарха Константинопольскаго и прочих четырех творит нам оную пользу: благословение временное и спасение вечное. Русийскому народу патриарха Вселенскаго, архиепископа Константинопольскаго, слушати и ему подлежати и повиноваться в действах и в науце духовной есть польза и приобретение велие спасительное и вечное. Первое: яко патриарх обретается и есть во единой Святой Соборной Апостольской Церкви, и бывает в ней непоколебимым столпом, нося на себе истинное веры исповедание. Второе: яко патриарх веру по Святому Евангелию и Апостолом и святых отец научению исповедает и соблюдает. Третие: яко патриарх пречистыя Тайны Тела и Крове Христовы и вся ины святыни истинны имеет, и все яко от начала, яко древле и яко всегда было, верует и соблюдает. Четвертое: яко патриарх держит и исповедует веру святых учителей Вселенских, на нихже Церковь возлежит: якоже се Дионисия Ареопагита освященнаго, и святых Афанасия, Василия Великаго, Григория Богослова, Иоанна Златоустаго, Григория Нисскаго, Кирилла Иеросалимскаго и Кирилла Александрийскаго, Амвросия Медиоламскаго, Августина Иппонейскаго, Климента, Дамаса, Леона, Агафона, Григория, Мартина, римских епископов; Максима Исповедника, Иоанна Дамаскина, Феофилакта и прочих подобных тем. Пятое: яко патриарх веру, догматы и уставы седми Вселенских и поместных Соборов, такоже и которыя по них на утвержение их были, держит и соблюдает. Шестое: яко патриарх Константинопольский Русиов крестил, и он народ наш Русийский в веру и в познание Бога привел. Митрополита и епископы и весь чин церковный и книги и богопотребное благочестие и устав нашей Церкви предал. Седьмое: яко Русия от Бога, от Собора Вселенскаго, от царей и князей и королей, за правое строение и Епархию, подана есть Константинопольскому и Апостольскому Престолу и патриарху Вселенскому. И несть возможно нам, сущим в строении патриарха Константиня града, подносити себе под папу латинскаго, и под клятву, в правилах соборных описанную, вметати себе. И тако мы Церкви Константинопольстей и патриархом престолов восточных полезных ради правыя веры и для спасения душевнаго и благословения временнаго прибегаем. К тому же с повинностей прав в главе, или в разделе предыдущем помяненых, слушаем, Александрийскаго, Антиохийскаго, Иеросалимскаго и великой Русии, яко единоверных Константинопольскаму архиереов почитаем и приимаем. К ним бо надлежат оны Христовы словеса: слушаяй вас, Мене слушает: и отметаяйся вас, Мене отметается: отметаяйся же Мене, отметается Пославшаго Мя (Лк. 10:16). И истинно есть: кто слушает патриархов и от них освящаемых и посылаемых, Христа слушает, а кто отметается их, Самого Христа Бога отметается той».