34. г) О святом свете: како сходит на Христов Гроб
«А еже прославнейше и пречуднейше есть: На всяко бо лето в Великую Субботу вечер огнь, паче же святый свет, на Гробе Христове виден бывает, и внутрь Гроба исполняет, и кандила окрест тамо висящая от того огня или света возжигаются и светле светят. Но да увеси, како сия бывают, слыши: благодать сия приходит и чудо является молитвами святаго и православнаго Патриарха Иеросалимскаго, егда со многим народом трикраты Гроб обходят поюще сие: „Воскресение Твое, Христе Спасе, ангели славят на небесех, и нас на земли сподоби чистыми сердцы Тебе славити!“ И сие совершив, Патриарх входит внутрь Гроба, и свещи благолепныя белаго воска возжигает от онаго света. Таже изшедшу ему оттуду и седшу на уготованном ему месте, вси людие сошедшися приступают, и подобне возжигают от свещ, сущих в патриарших руках. А аще бо кто от противных усумнится, и не восхощет сему веровати, тогда предлагаю свидетельство Барония, именитаго церковных деяний писаря, иже на листу 1094-м пишет сия словеса: „Видели чудо сие, егда в Субботу пред Пасхою у Гроба Господня свещи возжгошася. Сие чудо по прежнему обычаю всегда беяше“. Дозде Бароний. И аще был по обычаю, благодатию Божиею и ныне не преста; обещание бо истинное Того, Иже сия места походи, и пречистою кровию Своею, излиявшеюся на кресте, освяти, исполняется: се Аз с вами есмь во все дни, до скончания века (Мф. 28:20). Или мало тебе видится, яко Сына Божия кровь освяти места она? He буди безумен в разсуждении своем. К сему же и вышеприведеная свидетельства святых приемля, не буди не верен, но святым последуй. Они бо любили, почитали же и посещали святая места во Иеросалиме, и оттуду благословение и благодать Божию взысковаху. Сего ради и мы правовернии, Церкве Сионския сынове, нимало о уничижении противных небрежем; но с пророком Исаием глаголем:
блажен, иже имать племя в Сионе, и ужики во Иеросалиме (31:9). И пророк Захария научает: в Сион возвращаитеся живущии во дщери вавилонстей (2:7). И пророк Иоиль глаголет: яко в горе Сионе, и во Иеросалиме будет спасаемый (2:32), сиречь, иже в Сионе и во Иеросалиме данную благодать исповедуют и соблюдают, спасаются. А тем, иже уничижают святая места, пророк Амос претит сице: люте хулящим Сиона (Ам. 6:1): и стих церковный: „ненавидящии Сиона посрамятся от Господа, яко трава бо огневи будут изсохшая“. И пророк Давид утверждает: да постыдятся и возвратятся во ад еси ненавидящии Сиона (Пс. 128:5). Святый же Афанасий сице толкует: Елицы бо возненавидеша и не вероваша в Сионе бывшим таинам, тии постыдятся вечно, последи же страшный ответ изыдет на них: благословящии тя, благословени, и проклинающии тя, прокляти (Чис. 24:9). – Кто же таков обрящется, иже сицеваго страшнаго прещения не имать убоятися? Самем делом да познает и да прилежно блюдет, яко в Божественном Писании и малейшее слово не туне лежит. Сего ради да всяк весть о сем: яко иже ныне не приобщается сионскому исповеданию и сродных во Иеросалиме в вере не имать, таковый не подобен будет и небеснаго имети. Зане и благодать Новаго Завета не явлена бысть, дондеже ветхаго закона пророчества конец восприяша. Возможно бяше и большая о сем произвести, но убо в предгрядущих главах полезнейшее предложено будет. Прилежно молю правовернаго читателя, да блюдет себе, и скончавая главу сию первую, указую, яко во Иеросалиме и суд страшный, по пророчеству Давидову, имать бытии, иже во псалме 49-м приводит сия словеса: Бог богов Господь глагола, и призва землю, от восток солнца до запад. От Сиона благолепие красоты Его. И пророк Иоиль глаголет: Господь от Сиона воззовет, и от Иеросалима даст глас Свой: и потрясетеся небо и земля (Иоил. 3:16). И Захариа пророк рече: и приидет Господь Бог мой, и вси святии с Ним (Зах. 14:5). И песнь церковная ясне свидетельствует: „в дому Давидове страх велик: ту бо престолом поставленным судится вся племена земная и язы́цы“ (Ант. гл. I). He без вины сие воспомянух, возлюбленнии, но ради сего, яко да помним, откуду начало нам, тамо и обращение наше да бывает выну. И убоявшеся страшнаго прещения святителя Кирилла архиепископа Александрийскаго, иже в слове о страшном суде пишет: „иже Церкве Сионския общения удаляются, врази Божии бывают, а бесо́м друзи“. При сем спасеном общении сионстем, не забываем страшных оных книг, в нихже писано: яко судия седе, и книги отверзошася (Дан. 7:10), и Самого Господа нашего Иисуса Христа поучение: будите готови: яко, в оньже час не мните, Сын Человеческий приидет (Мф. 24:44). К егоже пришествию дабы в православной вере нашей были готови добрыми делы, славящее Отца и Сына и Святаго Духа, и ныне и присно, и во веки веком. Аминь».