141. А будет тот ответчик у пристава и в деревне ухоронитъся, или учинитъся силен, и приставу в его место привести с собою человека, или его християнина за поруками же. А будет у кого людей и християн нет и взяти ему с собою будет не кого, и приставу о том в приказе подати доезд свой за своею рукою. А судьям по той доездной памяти по того ослушника послати в другие иного пристава, а к воеводе в тот город, где тот ослушник живет, послати государева грамота, чтобы воевода на того ослушника приставу дал стрельцов и пушкарей и затинщиков, сколько человек пригоже, чтобы приставу было с кем такова ослушника изымати. Да как пристав того ослушника изымав, к Москве приведет, и тому ослушнику за его ослушание учинити наказание, бити батоги, да на нем же доправити исцу проесть и волокита по указу и недельщиков езд без суда, и отдати исцу; а в и(ы)ску на него исцу дати суд, и по суду указ учинити, до чего доведетъся. А будет такой непослушник учинит такъже и в третьие у пристава ухорониться, или учинитъся приставу силен, a опосле того он сыщеться, и на нем исцов иск и проесть и волокита по указу, и приставу езд доправити без суда, и отдати исцу, да его же бити батоги, и вкинути на месец в тюрму.
142. А будет по которого ответчика по исцову челобитью послан будет пристав с наказною памятию, в которой город или в уезд, или кого ответчика велят судьи сыскати на Москве по приставной памяти, и поставити к суду, или для какова ни буди дела, или к кому пристав, или сын боярской послан будет с государевыми грамотами, о каком деле ни буди, и тот, по кого послан будет пристав с наказною и с приставною памятию, или тот, к кому пристав послан будет с государевыми грамотами, учнет того пристава, или сына боярского бити сам, или велит кому его бити мимо себя людям своим или християном, или кому ни буди, или у него наказную и приставную память, или государевы грамоты отоимет и изъдерет, и тем он приказных людей, от которых тот пристав послан будет, обезчестит, а сыщется про то допряма, и такова непослушника за государеву грамоту бити кнутом, и посадити в тюрму на три месецы, а недельщику велеть на нем доправити безчестие и увечие против окладу въдвое.
А будет с тем недельщиком будут в понятых сторонния люди, и тот, по кого тот неделыцик послан будет. и сторонних людей учнет бити и безчестити, и на нем по тому же велети приставу и сторонним людем доправити безчестие, да убытки их въдвое по сыску, что у кого взято будет.
А кто недельщика или понятых побиет досмерти, а сыщется про то допряма, и того убойца самого казнити смертию же, а кабальныя долги побитых взяти с поместья его и с вотчин и с животов.
А будет приставу или понятым учинится какое безчестие, или бой от людей и от християн того, по кого тот пристав и понятые посланы будут, а самого его втепоры не будет, а пристав или понятые в том учнут на него бити челом на самого, а не на людей, ни на християн его, а он учнет сказывати, что он про то ничего не ведает, и им в том дати суд. Да будет по суду и по сыску про то дело сыщется допряма, что его люди и християне того пристава и понятых били, и тем его людем и християном за то учинити наказание, бити кнутом, да на них же доправити битым приставу и понятым убытки их въдвое по сыску.
143. А будет пристав или понятые на тех людей, по кого они посланы будут, такое дело, что их били и безчестили, или скажут, что они учинилися силны, затеют напрасно, и сыщется про то допряма, что им те люди, на кого они учнут бити челом, никакова безчестия не учинивали, и за такое затейное ложное челобитье пристава и понятых бити кнутом, да на понятых же за то взяти в государеву казну пени по два рубли на человеке, чтобы на то смотря иным неповадно было ни на кого напрасно бити челом и затевати.
144. А хоженого недельщику в городе имати десять денег. А будет неделщик послан будет по общую ссылку, и ему хоженого взяти с и(ы)сца десять денег, а с ответчика десять денег же, а болши того недельщиком хоженого не имати ни которыми делы, и от поруки им посулов и поминков не имати и к суду ставити исцов и ответчиков безо всякия поноровки.
145. А на службе в полках приставом имати хоженого по приставной памяти по две деньги. А будет на службе же пристав, по чьему челобитью по кого послан будет и уезд, и ему езду имати на челобитчике на пять верст по две денги же.
146. А будет которой неделщик, норовя кому по посулом, или по дружбе, исцов с ответчики к суду вскоре ставити не учнет, или сверх указу возмет лишнее хоженое, и в том на него будут челобитчики, и сыщется про то допряма, и тому недельщику за то учинити наказание, бити батоги нещадно, а лишнее хоженое велети на нем доправити, и отдати челобитчику. А будет он так сворует вдругие или в третьие, и его бити кнутом и из недельщиков выкинуть.