Хто бы против кого право якое так у суду земского, яко и кгродского и в которого кольвек иного вряду яким фортелем або омылкою якою справою заочне, за нестаньем стороны позваное, перевел, будь рок який неправдивый, змышленый в неведомости стороны противное утворившы, або на якую реч за записы якими змышлеными, неправдивыми, сказанье врядовое одержавши, тогды тот, против кому сказанье выйдеть, можеть о такий злый а неправдивый перевод права до того ж вряду, перед которим будеть право переведено, сторону противную позвати. И кгды се в том винным с права окажеть, тогды тот суд перший маеть быти поднесен и внивеч обернен. А тот, хто змышленым обычаем право переводил, за тую вину маеть седети в замку албо в дворе нашом судовом дванадцать недель, а стороне своей противной дванадцать рублей грошей заплатити. А то в речах таких, где горла не заслужить. Вед же естли бы се на том праве оказал який фалш и подступок значный, явный, за што бы слушне водле права мел быти горлом каран, тогды такового вряд маеть судити, сказовати и карати водлуг сего права посполитого и выступку его. Пакли ж бы тот, хто позоветь о злый перевод права, тое жалобы своей не довел, але бы тое позванье чинил ку зволоце справедливости, а тое бы ся противное стороны поступок перший слушный правный оказал, тогды сам тот жалобник оной противной стороне своей также вины дванадцать рублей грошей маеть заплатити и на замку або в дворе нашом дванадцать недель седети. А оному суду первшому маеть отправа быти чинена водлуг сказанья и права посполитого. А где бы хто, о злый перевод права припозвавши в речах крвавых, где пойдеть о горло, менил то, же ему о позве ведомость не дошла была, тогды маеть на том присегнути, же его ведомость о позве не дошла, и по присязе от первшого сказанья волен будеть, а на реч самую там же заразом отказовати маеть. А то се маеть розумети о заочном положенью позву.
Артыкул 42
Роки завитые в которых речах мають быти складаны у суду земского.
Напервей, хто кого позоветь о заставу ку бранью пенезей, хотя сторона позваная не станеть на роки первшие, тогды предсе суд не маеть откладати на далшие другие роки. Але на першом року яко на завитом, первой выслухавши доводу стороны поводовое, яко о том нижей описано, тож маеть всказанье учинити и ввезанье стороне поводовой дати, взявши от него пенези до вряду, и при книгах судовых мають быти положены до того часу, аж сторона позваная их озметь. Другое: о выбитье з дому з спокойного мешканья и отнятье именья, людей и всяких кгрунтов, где бы омешкал або не хотел о то до кгроду позвати. Третее: о всякую реч сужоную рок завитый за первшим позвом. Четвертое: о слугу якого ж кольвек стану або чоловека, або челядина домового, который бы от пана своего так шкоду учинивши, яко и не зашкодивши, проч утек. Пятое: о мыто, о мостовое, о гребелное, торговое и перевозы князские, паньские и шляхетские, также и всяких станов, естли хто на ком або на подданом чием мыто неслушне возметь або шкоду якую учинить. Шостое: хто бы езами або млынами, гатми, мостами реки портовые гамовал, проходу або дороги слушное не вчинивши, а за тым бы се шкода кому стала. Семое: естли ся хто кому добровольне описал и рок в листе своем ознаймил, а не учинил бы тому досыть. Осмое: о роздел именей и маетности всякое межи братьею и сестрами, и близкими, также и з опекунами детем лет дорослым, за первшыми позвы маеть быти рок завитый. Девятое: на поручника и на приказцу. А поручнику и приказцы з истцом, по ком ручил, маеть быти завитый рок. Десятое: о выеханье на кгрунт вряду подкоморского и комисарского. Одинадцатое: о обельживость возных на справе уряду их. Дванадцатое: о кривды подданых господарских от шляхты, где права майдебурского нет. Третеенадцать: о вдове утратной, на вдовим столцу будучой. Четвертоенадцать: о вины нашы, господарские, врядовые и сторонам належачие. Пятоенадцать: о головщины людей стану простого. Шеснадцатое: о бранье пересудов и потуремного над уставу статутовую через князей, панов, шляхту и врядников их и о вину на подкоморого. Семнадцатое: о грабеж вшелякий и о заплату испаши. Осмнадцатое: хто бы под часом роков який збыток учинил и, не росправившисе, уехал. Деветнадцатое: о кривды от врядников господарских з их врядов, одно не о добра, столу нашому належачих, и о оборону их, яко о том в инших артыкулех ест описано. Двадцатое: о полюбовный суд. Двадцать первое: о выбитье або отнятье з держанья по увезанью. Двадцать второе: о загамованье листов отвороных. Двадцать третее: о кривду под часом военным вчиненую. Двадцать четвертое: о дохоженье долгов по змерлом должнику на именьях спадковых оного змерлого водлуг артыкулу осмнадцатого в розделе семом. Двадцать пятое: о навезку за выводом шляхетства водлуг артыкулу пятьдесятого в розделе одиннадцатом. А в тых всих речах, тым роком завитым подданых, в сем артыкуле и теж в иншых артыкулех сего статуту описаных, за позвы земскими рок маеть трвати, водле давного обычаю права, до третего дня так позваной, яко и поводовой стороне. А где бы которая сторона через три дни за воланьем возного без причин правных, в сем статуте замероных, не стала, тогды вжо в той речи, на позве описаной, упадаеть и вечне то стратить, абовем моц роков завитых у суду земского и кгродского такую хочем мети, иж кождого стану чоловек, будучи позваный на рок завитый, не можеть се на року завитом большими справами в инших поветех и никоторими иными причынами вымовляти, окром трех причын, то ест хоробы обложоное и послуги нашое, господарское, земское, в сем статуте менованое; а третяя причина: естли бы се коли то трафило, жебы одна особа в речах крвавых до двух судов кгродских была позвана, яко о том в артыкуле двадцать семом сего ж розделу ширей ест описано. Вед же и тая обмова против року завитому толко на одных рокох и за одными первшыми позвы маеть быти допущона, а на других рокох або рочкох кгродских вжо се и тыми причинами вымовляти нихто не будеть мочи, але албо сам албо через умоцованого у суду становитисе и росправити повинен будеть, вынявши то, естли бы хто, будучи отослан на послугу нашу, господарскую, земскую з границ паньств наших, не мог се оттоль борздо звернути, таковому до зверненья с послуги нашое и земское фолькга в праве чинена быти маеть водле сего статуту. А где бы теж сторона позваная без причын правных, вышей мененых, не стала, таковая реч свою, о што позвана, тратить, и суд на таковом за доводом правным то, што в позве описано, сказати маеть. Так теж и поводовая сторона, позвавшы на рок завитый, сама не стала и року своего не пилновала, таковая также реч свою, о што позвала, вечне тратить.
Артыкул 43
О позвех наших земских и кгродских, и як долго трвати мають.
Уставуем теж, иж кождые позвы уряду земского и кгродского, так тые, которыми бы не позвано, и яко и тые, которыми бы позвано, далей трвати и в моцы своей быти не мають, толко на одны роки судовые земские албо рочки кгродские, перед которыми их взято. И для того тые роки земские и рочки кгродские, на которые се тыми позвы позывати будуть, в оных позвех меновите мають быть описаны, окром того, естли бы по заложенью позвов роки земские або рочки кгродские сползли не сужоные за войною або поветреем, або за иншыми якими с часом припалыми причинами, о чом ест нижей в артыкулех сего ж розделу описано.
Артыкул 44
Хто бы кого от суду належного до иного повету албо вряду и суду вызвал.
Уставуем, хотечи мети, абы нихто никого от суду належного до другого вряду и суду, то ест яко о речи, земскому суду належачие, до вряду кгродского, так о речы вынятые на кгродский суд, до земского вряду и теж с повету в ынший повет, ани до комисарского, подкоморского и жадного иньшого суду неприналежного, также ани перед нас, господара, ани перед суд головный над сесь статут и порядок его и теж над артыкулы оного головного суду постановеные не смел вызывати. А хто бы то учинил, а до иншого вряду и суду належного кого вызвал, тогды позваный толко ведомость вряду тому, до которого будеть позван, о таковом непорядном и неслушном позванью сам або через посланца своего, на то умоцованого, маеть дати и обмову в том учинити. А таковых позвов послушон быти и стороне за ними отказывати не будеть повинен, але еще тот, хто таковые позвы озметь и ими позоветь, за то, же мимо суд свой належный смел то учинити, маеть заплатити вины тому вряду, от которого вызвал, копу грошей, а стороне — три рубли грошей. А то в тот час, кгды бы жалобник повторе о тую ж реч позвал и тые вины тот вряд належный мает собе и стороне отправити заразом, не позываючи о то, где бы оселый в том же повете был, тогды на оселости его. А естли бы оселости в оном повете не мел, тогды на маетности его рухомой. Пакли ж бы жалобник, позвавши до суду належного, сам не стал, а позваный становилсе, тогды предсе позваному волно будеть о тую вину оного жалобника позвати на рок завитый до суду земского з оселости его, в котором колвек повете мети ее будеть. А вряд винен будеть ему тую вину сказати и на оселости его отправити, окром того, хто бы записом своим листом властным, отступуючи повету албо которого суду своего належного, в який иншый суд доброволне ся вдал и опроч тое причины, которая ув ынших артыкулех допущаеть с повету вызвати.