Артыкул 45
О таковых, которые бы, не маючи в котором повете оселости, другого оселого позвал, а шло бы им обудвум сторонам о одну реч, также и о том, который нигде оселости не маеть.
Теж уставуем: коли бы хто, не маючи в котором повете оселости, другого кого там оселого позвал, а шло бы им обудвум сторонам о одну реч, тогды тот позваный оселый можеть заразом не отповедати и в право се не вдавати, аж бы се теж он противник его неоселый там поддал и обвезалсе листом своим и сознаньем перед врядом ему в том, где о одну реч идеть, там же у его повете отповедати и усправедливятися , не отзываючисе и не беручи собе до суду и повету своего. А кгды ся поддасть под тое и обвяжеть, тогды предсе оный позваный за тыми ж позвы на оный же час наперед будеть ему повинен усправедливитися. Пакли ж бы тот приеждчый жалобник з иншого повету, одержавшы собе справедливость, а позваному зася не усправедливившися, проч от суду отехал, тогды тот суд и сказанье, ему вчиненое, не маеть быти ему выконывано. А естли бы хто нигде в том паньстве, великом князстве литовском, оселости не маючи, оселого в котором повете позвал, а позваный бы до него, будь о тую ж реч албо о которую иншую дело мел, тогды таковый маеть наперед по собе паруку оселого в том же повете дати, иж нигде индей, одно на том же уряде стороне своей противной усправедливятися заразом скоро по своем праве будеть повинен. А где бы по своем праве уехал, не росправившисе з стороною противною, тогды такеж сказанье оное першое ему вделаное, до выконанья привожоно быти не маеть, а речи своее позваный местцо истца на паручнику искати там же заразом маеть. А где бы и поручник не росправившисе уехал, тогды з ним за позвом справедливости доводити собе будеть у суду належного.
Артыкул 46
О рокох, которые судья, подсудок и писар зеждчатисе и позваные перед ними становитисе повинни, а под которым часом роки сужоны быти не мают.
Теж уставуем, иж суды земские мають быти трикроть до году, то ест трои роки судовые, на которые будуть повинни судья, подсудок и писар на одно местце в кождом воеводстве и повете, а в земли Жомоитской также на местца певные, судом назначоные, зеждчатися и там так долго мешкати, поки вси справы судовые отсужоны и скончоны быти могуть. А в котором повете на двух местцах роки земские отсужованы бывають, тогды и до тых местц вряд приехавшы по тому ж ся около мешканья на отправу судов заховати маеть, яко о том вышей в сем же артыкуле описано, прызнаваючи кождому позванью очывистому и заочному рок перед кождыми роками водле артыкулу осмнадцатого в сем же разделе. А час приеханья всих трех урядников на другое местце судовое от початья роков земских в чотырох неделях. А позванье и повод будуть повиньни перед ними се становити обычаем и способы, в особливых артыкулех описаными. А роки мають быти сужоные: первшые о светой тройцы рымского свята и назавтрее ся в понеделок почнуть, а другие — ув осень на день светого Михала рымского свята, и так же се назавтрее почнуть; третие — на день и свято трех кролей зиме и так же ся назавтрее почнуть. А потом в другом году, также на день светое тройцы рымского свята назавтрее се почнуть. А судья, подсудок и писар мають суды справовати и на суде седети кождого дня, кром недели, от поранку до нешпорное годины. А позвы судити порадне з рейстру, не глядечи на особы а не фолькгуючи в том никому, але который первей уписался в рейстр, тот наперед сужон быти маеть. А ведь же под тым часом роки сужены быти не мають, першое: если бы послуга наша, господарская, земская, военная з сойму валного посполитым рушеньем была уфалена и листы бы наши военные зашли, ино для готованья на войну за шесть недель не мають быти роки сужоны, то ест перед часом збиранья войска зложоным, а где бы час певный и местце збиранья войска в листех наших не было ознаймено, толко о готовость на войну листы высланы были, тогды предся роки мают быть сужоны. А кгды бы так с тое причины за войною роки сужоны не были, тогды по войне, на первших рокох, водле статуту припалых, мають ся стороны, знову припозвавшы, росправовать. Другое: естли бы, чого боже уховай, в котором повете поветрее моровое было, а то бы се значне показало, под таким часом в оном повете также роки не мають быти сужоны; а по том часе, яко поветрее оминеть, мает вряд судовый земский в оном повете другие роки судовые, в статуте описаные, близко припадаючие, судовне, отправовати. А на тых рокох мають стороны, знову припозвавшися, росправовати. То ж ся маеть розумети и о таких рокох, которые бы не были сужоны за зейшстем з сего света которого врядника судового. А также где бы ся то трафило, жебы в том часе межы роков хто с которое стороны, будь жалобное або позваное, умер, тогды с тое причины позов маеть быти отновлен водлуг потребы, албо естли бы сторона жалобная сама хотела и при животе позваного позов отменити и на ним ся поправити, то ей волно будеть.
Артыкул 47
О суженье роков земских и рочков кгродских под часом соймов вальных и о обранью врядника судового в посельстве.
Забегаючи продлуженью непотребному справедливости людской, уставуем, иж под часом соймов вальных роки земские и рочки кгродские и иные всякие суды отправованы и сужоны быти мають, одно вынемшы тых особ панов рад нашых, которые бы на сем вальный ехали, так теж которые бы справы судовые, соймови належачие, перед нами, господарем, на сойме мели, будь за мандаты або позвы нашими дворными. И теж послы с кождого воеводства и повету и земли Жомоитское, будучы на сем вальны от обывателей с поветов на соймиках обраные и посланые от судов всяких, под соймом волни будут, аж поки ся з сойму звернуть. Однак же кождый такий маеть ся суду и стороне листом своим отвороным с печатью своею и с подписом руки своее, а хто писати не умееть, за печатью своею и з двема печатьми людей сторонных шляхты через приятеля або слугу своего обмовити. А потом предся тот, хто на сойме валном при нас, господари, яко их милость панове рада и послове або и иншые станы, которые справы свои на дворе нашом за мандаты або за позвы маючие будуть, естли бы на первшых рокох земских або рочкох кгродских, водлуг порадку статутового по оном сойме припалых и судовне отправуючих, о бытности своей на сойме або о справах своих, которие на сойме валном мели и судовне отправованы были, сведецства на писме с канцляреи нашое не показали, тогды за другими позвы на других рокох нестанное платити, а на реч самую з стороною росправу прыняти повинни будуть. А где бы шло о речи, завитому року подлеглые, в сем статуте в особливых артыкулех описаные, тогды вряд сказанье за тыми ж позвы на других рокох, по сойме напервей судовне отправуючих, стороне поводовой кром доводу учинити и отправу через возного, яко на непослушного, вделати маеть. Пакли ж бы которого з урядников земских на соймику послом на сем великий валный обрано, тогды на местце такого врядника, в посельстве обраного, мають зараз на том же соймику або на рокох земских шляхта, рицерство поспол з урядниками, там на соймик або на роки прибылыми, иншого кого шляхтича оселого, спросталого, ку отправованью тых роков, под соймом прыпадаючых, до зверненья того врядника обрати. Который обраный шляхтич, присягнувшы на справедливый суд, будет мети моц з иншими позосталыми врядники тые роки судити и отправовати. А где бы не хотел присягнути, тогды роки сужоны быти не мають. Где бы теж обран был послом которий врядник судовый кгродский, на того местце воевода або староста маеть иншого шляхтича оселого засадити и того листом своим шляхте на рочкох ознаймити. А тот обраный такеж винен будет на справедливый суд присягнути.