Артыкул 61
Чого прокуратор без стороны своее справовати не можеть.
Теж уставуем, иж прокуратор за моцю жадных записов новых и никоторого вызнанья ни от кого не маеть у суду чинити и пенезей за записами брати, и з них квитовати, не маючы при собе стороны своее. А вед же естли бы хто, не могучы або не поспеючы до вряду ехати по пенези, хотел через кого иного пенези тые брати и квитовати, тогды иначей не маеть, ани можеть брати, только через такового прокуратора або слугу своего, кому бы особливую на то моц и порученье листом своим, подписаным рукою своею и под печатью своею дал, албо перед врядом близшим судовым поручил и выписом того вряду моцным его на то меновите учинил; таковый моцный можеть пенези брати и квитовати моц мети будеть.
Артыкул 62
Хто бы на кого перед правом словом або рукою сягнул, пхнул, або ранил, або забил.
Теж уставуем: коли бы хто, якого колвек достоенства и стану будучы, а стоячы перед судом, отступившы речи своее, один на другого словом ся неучстивым торгнул, тогды за то маеть з сказанья того суду место вины седети на замку ближшом шесть недель. А если бы пхнул або рукою ударил, хотя бы не ранил, тогды маеть заплатити стороне место навезки кгвалту дванадцать рублей грошей, и за вину маеть седети шесть недель. А если якую справу у того суду мети будеть тот, кто таковое везенье заслужить, тогды маеть то везенье подняти по росправе своей речи. Пакли бы корда, меча албо шабли и якое колвек брони в обычай звады добыл, а хотя бы и не ранил, руку тратить. А кгды бы ранил, тогды ничим иншим, одно горлом маеть быти коран и о такий учинок кождый вряд, будь кгродский або земский, перед которым се то станеть, такового можеть на горло сказати. А если бы хто кого перед судом забил, тот честь и горло тратить, а головщина з ыменья або маетности его совито маеть быти детем або близским плачоно. А такового явного выступцу пры горачом учинку не толко вряд тот повинне имати казати маеть, але и всим там будучым для завстегненья такового своволеньства, яко против взрушителя покою посполитого повставшы, против таковому помоч чынити волно будеть. А где бы таковый, змоцнившися, имати себе не дал и от вряду зышол, тогды против таковому вряды наши заховатися мають водлуг артыкулу трыдцать второго сего ж розделу. Вед же хто бы своволне дал прычину словы и рукою и початок учинил, а тот бы, ув обороне прымушоный, початком его брони добыл, ранил або забил, таковый за выводом слушным иман быти не маеть и таковое покуты и каранья не винен терпети. А хто бы теж кольве, ранившы албо забившы кого перед судом, проч утек, по такового за даньем нам о том знати через тот вряд наш, перед которым бы ся то стало, маем казати мандат наш дати, и станет ли за мандатом, карати его водлуг сего артыкулу. А естли за мандатом нс станеть, тогды его маем казати со всих паньств наших выволати вечным выволаньем, яко бы ся николи в границы паньства нашого не ворочал, а ранному навезка, або забитого головщина з ыменья его маеть быти плачона. Где бы теж хто так упорный был, жебы, не росправившисе в такой речи, проч уехал албо за сказаньем врядовым везенья подняти и кгвалту верху менованого стороне обельжоной заплатити не хотел, а вряд бы его не мог до того везенья примусити, а он бы проч от вряду отехал, досыть тому, во што попал, не вделавшы, тогды тот уряд, перед которым ся то станеть, за такое его непослушеньство маеть стороне ображоной кгвалт тот совито, а собе вряду вины сорок коп грошей на именью его заразом, без жадных роков, отправити, поступуючи далей около тое отправы водлуг артыкулов, о отправах речей сужоных описаных.
Артыкул 63
О том, где бы воевода, староста або судья, подсудок и писар, так замковый, яко и земский вряд або подкоморий, комисар, седечы на суде, кого соромотил, або ся на кого рукою торгнул.
Теж уставуем, иж кгды бы хто с тых вышей мененых врядников наших, седячы на суде, кого словы неучстивыми соромотил, тогды тот такий врядник за доводом явным слушным маеть на замку шесть недель седети. А если ж бы который воевода, староста або который з их врядняков судовых кгродских, албо теж судья, подсудок, писар земский, або подкоморый, альбо комисар сам кгвалт местцу нашому, господарскому, и суду учинил, а кого на суде ранил, таковый врядник горло тратить. А пакли бы забил, таковый горло и честь тратить, а навезка або головщина з именья его совито маеть быти плачона. А о то укрывжоной стороне такого врядника волно будеть позвати на рок завитый до нас, господара. Вед же хто бы свовольне дал вряду причину, словы и рукою торгнулся и початок учинил, а тот врядник, в обороне прымушоный, початком его брони добыл, ранил або забил, таковый за слушным выводом от тое вины и каранья волен будеть.
Артыкул 64
Естли бы хто, на роки земские або рочки кгродские том повете, где ест оселым, прыехавшы, а часу отправованья роков кого зранил, кгвалт або шкоду якую учинил.
Варуючы кождому волный беспечный прыступ до справедливости, уставуем то, иж если бы хто ж кольвек, будь оселый албо неоселый, на роки земские або на рочки кгродские в тот повет, где суды будуть, прыехавшы, и часу того, поки роки водле замеренья сего статуту трвати будуть, то ест личачы тот час перед зачатьем роков за три дни, а по выволанью роков через три дни, кого, будь на дорозе едучого на роки або в месте том, где ся суды отправують, на улицы и где кольвек поткавшы и перенявшы, албо на господу и якое становище кгвалтом нашедшы, самого або слугу его и кого кольвек с таковых ранил або забил, будь теж только шкоду якую учинил, або пофалку на здорове або пожогу вделал, а укрывжоный того ж часу утек бы ся до суду и то ожаловал, тогды тот вряд, под которого отправованьем справ судовых то ся станеть, маеть обжалованого возным обослати, абы он, не зеждчаючы з оных роков проч, перед оным судом стал и в том ся жалобной стороне усправедливил, который без позвов винен будеть стати и того ж часу на тых же рокох усправедливитися.