ПРИКЛАД, ЧТОБЫ МЫ ПАМЯТОВАЛИ ДОБРОДЕЙСТВА, НАМ УЧИНЕНЫЯ. <ГЛАВА> 31
Был некоторой славной рыцарь, которой охочь был на лов ездить. И в некоторой день выехал на лов, и тамо ему забежал[3133] лев, припадая и показуя ему ногу свою. Тогды он рыцарь сседши с коня и вынял ему терн[3134] из ноги его и мастию приложил. И тако лев был здрав. Потом же король был на лове в том же лесе и уловил оного лва и ховал его многия лета.
Потом он рыцарь согрешил пред королем тем. Тогды король, разгневавшися, велел его поймать и дал на него сказание[3135], чтобы был дан лву тому на снедение. И велел, чтобы тому лву ничего не давали есть, чтобы он того рыцаря, немилостивно разторгши, пожерл. Тогда тот рыцарь, как будет пущен до лва, велми убоялся, ждучи годины[3136], как будет розорван от лва. Лев же, хотя и гладен, смотрил прилежно на него и, как его познал, начал, около его ходя, радоватися. И был там без яди седмь дней.
Услышавши то, король дивился тому и велел того рыцаря вытянуть из рова[3137], вопросивши: «Повеждь ми, для чего тебя лев не могл повредить?» Отповедал ему рыцарь: «Ездил есми в некоторое время на лов и по прилучаю стретил есми сего лва хрома. И аз сседши с коня, вынял есми ему терн из ноги его и рану ему уздоровил. И мню, что для того не повредил мене лев, помнячи добродейство мое». Рек ему король: «Коли уже тебе лев не повредил, и аз тебе оставляю грех твой, а отныне буди добр». Тогды он, челом ударя королю, полепшил живота[3138] и жил хвалебне.
Выклад того обычайный
Намилейшая братия, тот рыцарь, которой на лов ездил, человек есть мирской, которой всегды тружается, чтобы добыть досытку[3139] временного. Лев храмляй есть род человеческий, которой храмлет[3140] грехом перваго отца нашего Адама преже того, дондеже терн есть сиречь[3141] грех первородный, крещением святым был вынят и мастию добрых дел был уздоровлен.
А еже рыцарь преступил пред королем, сиречь пред Господем Богом Вседержителем, — елижды согрешает, толижды ту благодать погубляет, которую принял на святом крещении. А еже лев, сиречь род человеческий, пойман бывает (елижды обвязуется к Божию приказанию[3142]), — и бывает вкинут в дол покуты[3143]. А будет ли грешный человек вкинут в тот дол покуты, тогды может имети тяжкость[3144] плоти и мзду[3145] вечну духовную.
ПРИКЛАД НАПОЛНЯЮЩИЙ[3146], ЧТОБЫ МЫ ОБЕТЫ ИНЫМ ВЫПОЛНЯЛИ. <ГЛАВА> 32
Был некоторой король, а в его королевстве были два лотры[3147], которые присягою связалися меж собою, чтобы един другаго не оставил в потребе, але чтобы един за другаго умерл.
Тогда те два лотрове много зла чинили, крадучи, розбиваючи. И прилучилось в некое время, что един был без другаго, и так его на злодействе поймали и всадили в темницу. Услышавши то, товарыщь его, другий лотр, пришел к нему и рекл: «Товарыщю милый, прошу тя, повеждь ми, чего чаеши над собою?» Отповедал ему ятой: «Так ми ся видит, что быть мне казнену, потому что на воровстве пойман есмь. Але прошу тя велми, чтобы ты побил челом о том судии, чтобы я шол в дом свой, зане имам жену, и дети, и челядь, да разделю им мой нажиток. И как то учиню, возвращуся паки и тебе из темницы выпущу». И рекл ему товарыщь его: «Учинити то рад».
И шедши к судии, рекл ему: «Пане судие, друг мой пойман и седит в темнице. И яко мню, что быть ему казнену, прошу твоей милости, чтобы ты выслушал прошение мое: чтобы он преже смерти своей был выпущен к дому своему, чтобы жену, и дети, и челядь росправил[3148]. И чтобы еси об нем известен был, сяду я за него в темнице». Рекл ему Судиа: «В предгрядущий[3149] день осужден будет на смерть, и не приидет ли в сей день — что к тому отвещаеши?» Отповедал товарыщь его: «Пане, все то, что велиши, хочю[3150] терпети, а не приидет ли паки[3151], тогда за него на смерть пойду». Рекл ему Судиа: «Прошение твое выслушал[3152] тым обычаем[3153]: чтобы еси сидел за него в темнице, дондеже возвратится». И велел его Судиа посадить в темницу, а оного доброволно[3154] выпустить.
Тогды он шедши в дом свой, росправил жену и челядь и премешкал[3155] там аж до третияго дня, в которой день вси злодеи приведени были пред судию, а меж теми и тот, которой дал ся доброволно всадить в темницу для друга своего. И рекл ему Судиа: «Где есть друг твой, иже хотел возвратитися и тебе выбавить[3156]?» Отповедал ему друг: «Пане, имам надею, что слова своего не пременит». Тогды Судиа долго ждав, чтобы пришел; але как не пришел, дал сказание[3157], чтобы на шибалицу[3158] веден был.
3142
польск.: ilekroć się obwięzuje ku Bozeinu przikazaniu — всякий раз, когда обязуется жить по заповедям Божиим;