Чюдо 2. Месяца августа в 25 день некто человек именем Семен, зовомый Молчанов, с Малой Пинешки прииде в Верколу, поведа. Бысть он в недузе, не имея у себе ума цела месяц пять. И обет положи ко святым чюдотворцем Николе и Артемию в Верколу молебен петь. И бысть здрав во уме молитвами святых, и хвалу воздав Богу и святым его.
Чюдо 3. Той же прежереченный человек Семен с товарыщи своими в то же время, егда пловяху они от Верколы в Кевролу по реке Пинеги в дву лотках с рожью. И в нощное время внезапу нанесло их на ез,[4433] и абие начаша утопати. Они же помолишася с верою Господу Богу и святому чюдотворцу Артемию и молитвами святаго в той час избавишася от потопления того. Мы же слышавше сие чюдо и писанию предавше.
Чюдо 4. В лето 7148-го (1639) месяца октября в 5 день поведа нам человек некто именем Козма Иванов сын с Малой Пинежки. Бе одержим трясавицею месяц шесть, и помолися Господу Богу и святому Артемию с верою велиею, и молением здравие получи от святаго Артемия чюдотворца.
Чюдо 5. Бысть некая жена именем Мария, бе в недузе одержима чревною болезнию месяца три. И помолися с верою святому Артемию чюдотворцу Верколскому. И абие здрава бысть от тоя болезни и благодаря Бога и святаго праведнаго Артемия.
Чюдо 6. Месяца ноября в 16 день человек некий именем Кир Иосифов сын поведа. Бысть он огневою болезнию одержим велми. И помолися с верою Господу Богу и святому Артемию чюдотворцу. И молитвами святаго от тоя болезни здрав бысть и хваля Бога и святаго Артемия.
Чюдо 7. Ин человек именем Семен, прозванием же Козаринов с Карповы Горы прииде же в Верколу месяца декабря в 10 день, поведа сице. Во 147-м (1639) году после Ильина дни[4434] осенью идущим им со иными людми, с подруги своими из Монгазеи[4435] на судне морем. Бысть же в мори от бури ветреныя велие волнение. Они же о напрасней беде ужасшеся отчаянно. Много же тружающимся им на мори, и друг со другом прощалися, яко уже и погрязнути хотящим. Прииде же им во ум, и начаша молитися Господу Богу и святаго праведнаго Артемия Верколскаго чюдотворца со слезами на помощь призывати. И обещашася молебная совершити и милостыню подати по силе своей. И Божиим изволением, молитв ради святаго Артемия, в той час преста в мори буря. И лютыя тоя беды и от потопныя смерти избавишася, и море преидоша здраво. И благодарение воздающе Всемилостивому Господу Богу и его угоднику святому чюдотворцу Артемию.
Чюдо 8. Человек же бе некий именем Иван, веси, нарицаемые Сурские, поведа нам. Грех ради его огнем ожегл руку свою болно. И помолися Господу Богу и угоднику его святому Артемию. И абие от тоя болезни здрав бысть, благодарив Бога и святаго Артемия.
Чюдо 9. Ин человек бе именем Андрей Федосеев сьн с Кучкаса. Бе одержим огневою болезнию многое время. И помолися с верою святому чюдотворцу Артемию. Святый же Артемий избавляет человека того от болезни тоя. Человек же той благодарение воздав Богу и святому Артемию.
Чюдо 10. В то же время жена некая именем Евдокия Пинежского волока, веси, нарицаемые Валдокурские. Бысть же она болна велми утробною болезнию лета три. И врачев призываше, и никоеяже пользы обретши, но паче в горшее пришедши. И уже ей близ смерти сущи, и воспомянуша ей чюдеса святаго Артемия Верколскаго чюдотворца. Она же начат молитися с верою святому Артемию и обет положи молебная совершити. И повеле своим ея довести себе тамо. Егда же приведоша ея в Верколу, и молебная совершивше, и приложиша ко гробу блаженнаго Артемия. И в той час та жена здрава бысть от тоя болезни Божиею благодатию и молитвами святаго, дивнаго в чюдесех, Артемия.
Чюдо 11. В та же времена человек некий именем Ларион Иванов сын, кевролец, бысть одержим в великой болезни, не владея собою многое время. И жена некая именем Анастасия ис Кевролы, у неяже болеша уши. А иная жена именем Парасковия из Шардонемы бе в недузе, не владея ничем, в разслаблении лежа многое время. И сии моляшеся с верою святому Артемию и быша здравы от болезней своих. И приходят ко гробу его, обеты своя исполняюще, и благодарение воздая Христу Богу и святому Артемию, отхожаше с радостию.
Чюдо 12. Того же лета генваря в 22 день приезжал в Верколу некоего воеводы именем Стефана, зовомаго Чирикова,[4436] человек его именем Никита Чадуев, а с ним некая девица именем Парасковия, Азова города полонянка новокрещеная. Бысть же она болна велми черною болезнию[4437] некое время. И повеле молебная совершити, и моляшеся та девица святому Артемию с верою. И приложися ко гробу его, и ту абие здрава бысть от тоя болезни, и отъиде, радуяся и благодаря Бога и святаго Артемия чюдотворца.
4433
...нанесло их на ез... — Ез (или яз) — частокол или плетень поперек всей реки, устанавливаемый, чтобы не дать рыбе хода вверх и выловить ее на месте. Езами называют также поставленные вполовину или в треть реки наискось рыболовные плетни.
4434
...после Ильина дни... — День памяти св. пророка Ильи празднуется 20 июля (2 августа).
4435
...из Монгазеи... — Мангазея — местность в Туруханском крае, между Обской губой и низовьями Енисея по р. Таз. С XVI в. освоена промышленными людьми Севера. В 1601 г. по указу Бориса Годунова здесь, на правой берегу р. Таз, было основано одно из первых в Сибири городских поселений с таким же названием.
4436
...воеводы именем Стефана зовомаго Чирикова... — Стефан Михайлович Чириков был воеводой в Кевроле и на Мезени в 1637–1640 гг.