Чюдо 26. В то же время бысть жена некая именем Дария Марьегорския веси, прозванием Чюркиных, поведа сице. Бе у них сын Борис осми лет да дщи Татияна, бысть в велице недузе и не могии ногами ходити и руками двигнути многое время. И о семь бывшу в велицей скорби, и видя их ту скорбь, и бысть в печали велицей. Богу моляшеся о здравии детей своих, и обет положиша ити им в Верколу пешим и чюдотворцу Артемию служить молебен. И вскоре дарова Бог молитвами святаго здравие, и начаша ходити. И приидоша в Верколу, обещание свое исполниша, и прославиша Бога и угодника его Артемия, и поидоша восвояси, радуяся.
Чюдо 27. В лета 7204-го (1696) февраля в 14 день приехав в Верколу в монастырь кевролец, Киглохоцкой веси житель, Софрон Никифоров, зовомый Ветреников, з женою своею и с сыном своим, малчиком. И поведа дивное и преславное чюдо, яже сотворшеся ныне святым, и праведным, и богомудрым Артемием. Бывшу убо сыну его именем Иван в малых летех, и сверсники своими игры деюще[4451]. И не сказався, поидоша кататися з горы, рекомыя гледеня[4452], и начаша прямо на ту гору попадати. И велми круто учинишася от снега перевал великой. И внезапу той снег зинуся[4453] и под гору покатися, и сего детища тем снегом засыпало, и не бысть ни гласа и ни послушания. И товарыщи ево, сверстницы, бывше в великом страсе, и побеги в дом к отцу его, и поведаше ему со слезами. Он же, услышав сие, быв слезен и побеже тамо с нимиже вскоре. А ростояние до места того близ полупоприща.[4454] И прибегши, начаша искати, и виде ту велию громаду снегу окатившуся, начаша розгребати. И братия ево вскоре ту же приспевши, и трудившимся многое время, и ничтоже успеша. И помышляюще в себе, что бысть у него обещанно с сим детищем бысть в Верколе у чюдотворца Артемия, и в том замедлившу ему. И паки нача со слезами Бога молити и святаго Артемия на помощь призывати, дабы сыскать сына своего. И начата по снегу ходити и шестами искати. И уведев под шестом, и розгребше, видевше мертва. И в то время приложи к слезам слезы и к воплю вопль. И положи обещание паки к чюдотворцу быть безо всякие мешкоты и молебная исправить, аще будет жив сын его. И Божиею милостию и молитвами святаго Артемия в той час детищь нача дрожати, и по дрожании возре. И увидеша оне, яко жив есть, и зело возрадовашеся о преславном и неначаемом чюдеси, понеже бо вси видеша его мертва, и внезапу оживе. И прославиша Бога и угодника его праведнаго Артемия. Тойже человек обещание свое исправи вскоре. Мы же слышав- ше сие и писанию предаша.
Чюдо 28. Иже и сие несть умолчати. Бысть убо Кеврольские Воскресенские церкви священника Петра Игнатьева, жена его, именем Феврония одержима очною болезнию два месяца и не виде очима ничтоже. И много врачевания искаше, а ползы не обрете, но паче в горшее пришедши. И от тое зелныя скорби уже чая лишитися очнаго зрения. И бысть убо некогда донесено к ней из Верколы бересца, иже сыскано по пожаре во срубце, идеже обретены были исперва чюдотворца Артемия мощи. Она же вземши того бересца с верою, и в самую нощь положи на уголие, и дым испусти, и сама надклонися. И помолися святому Артемию со усердием и со слезами, и успе[4455]. И поутру восташе, и бысть у нея правое око здраво, потом же и левое, и возревше ясно. И от того здрава бысть, яко николиже боле. И возрадовашеся радостию великою и благодарение воздаша Господу Богу и угоднику его святому Артемию. Быв в Верколе, и молебная совершив, и нам сие поведа, и отъиде в дом свой, радуяся.
Чюдо 29. В та же времена приидоша в Верколу с Выи именем Стефан, рекомый Синаевых, з женою своею и с сыном и поведа нам чюдо святаго Артемия. Бысть убо он ногою болен 15 недель, и не могий ея двигнути, и скорчися. И от тое великие скорби молитвами святаго чюдотворца Артемия вскоре здрав бысть ногою. А жена его именем Наталия, а сын Евтихей, бысть они очми болны четыре седмицы и свету не видеша. И той же Стефан, видев к себе милость, и получив исцеление, такожде им чюдотворцу молитися повеле с верою. Они же начаша молитися со слезами и обещание положиша быти к чюдотворцу в Верколу и молебная совершити. И в той час свет увидеша, и здравы быша у них очи по-прежнему. И о семь зело возрадовашеся, и хвалу воздаше Господу Богу и угоднику его святому и праведному Артемию Верколскому чюдотворцу, и обещание свое исполниша вскоре.
4454
...близ полу поприща... — Поприще — мера длины, восходящая к римской миле. Русское поприще примерно равно 1066 м.