Чюдо 5-е. Ниже се молчанию предати достойно есть. Бысть убо в Двинской области, иже Колмогоры наричются, в началном месте тоя Двинския области воевода именем Иван Милюков,[4491] прислан с Москвы от царя и великаго князя Василия Ивановича всеа Росии правления ради страны тоя. Егда же, грех ради наших, бысть тогда великое нестроение в царьствующем граде Москве и, яко овцы не имуще пастыря, везде бо бяше велие смятение, от началствующих даже и до последних, везде бо и повсюду мятежи велики бяху и междоусобие. Такоже и в сей Двинстей области на началствующих крамолы воздвигоша тогда, на епарха и на архиграфоса.[4492] И всадиша их в темницу, и стражи к ним приставиша. По мале же архиграфоса того именем Илию Уварова осудивше на смерть и в воду утопиша.[4493] Такоже и епарха того Ивана Милюкова хотяху осудити на смерть, глаголюще, яко: «Неправедно судиши». И ина зла многа износяще нань, яко уже и скончати хотяху, яже о нем. Вельми же ужасеся он о сем, неведый что сотворити, не имея бо ни от кого помощи себе, понеже бо вси уклонишася вкупе, и непотребни быша, и не бысть творящаго благо ему. Сице же ему ожидающю смерти, и прииде к нему отец его духовный, иерей именем Феодор, имея веру в монастырь Пресвятыя Богородицы, в Черную гору. Поведает же воеводе тому о чюдесех, бывающих от честныя иконы Пресвятыя Богородицы, иже тамо. Глагола ему: «Аще начнеши веру имети к Пресвятей Богородицы в Черную гору, веде, яко избавити тя имать Бог от напасти сея». Он же с радостию обещася неотложно веру имети ко святому месту тому. И абие на утрий день многомятежный он народ в тихость преложися милостию и молитвами Пречистыя Богородицы; иже прежде яко львы рыкающе, ныне же кротцы яко овцы приидоша, моляще его, глаголюще, яко да идет по обычаю своему в судилище и да управляет их, якоже и преже. Видев же воевода он скорое пременение народа и Пречистыя Богородицы быстрое заступление, абие прослави Бога и Пречистую Богородицу и многия слезы от радости испущаше о избавлении своем. Таже вопрошает, аще есть кто от инок честныя обители тоя ту. Обрете же ся на Колмогорах прежереченный старец Иона. Он же призвав его к себе и поведа ему милость и заступление Пречистыя Богородицы, бывшую к нему. И посылает со старцем тем потребная монастырю тому книги, и воск, и паволоки же, и сребро на строение церьковное. Обеща же ся и до смерти своея имети веру монастырю Пресвятыя Богородицы в Черную гору.
ПОВЕСТЬ О ПРИШЕСТВИИ ОБРАЗА ПРЕСВЯТЫЯ ВЛАДЫЧИЦЫ НАШЕЯ БОГОРОДИЦЫ И ПРИСНОДЕВЫ МАРИИ И ОТЧАСТИ ЧЮДЕС И ИСПОВДАНИЕ, ИЖЕ ГРУЗИНСКАЯ НАРИЦАЕТСЯ, В ТОЙ ЖЕ ОБИТЕЛИ В ЧЕРНОЙ ГОРЕ
Прочести благослови, отче.
Обычай убо человеческому естеству, не точию простым, но и светло- стию рода почтенным и над делы царьскими учиненым, не токмо самех царствующих почитати, но и образы тех подобия честно имети, не яко вещию от прочих разно суще, но яко подобием тех почтени суть. Колми же паче достоит множае зело не точию почитати, но и поклонятися божественным вещем, еще и не одушевлени суть, иже божественныя именем и воображением почтени суть. Покланяем же ся не вещи и зданию тех, но почитаем, иже своим воображением освятивших сия, и о обретении тех весело торжествуем. Тако бо и божественный Давыд святыни киот, возвращаем от пленения, видев, радостию скакаше, играя. Кольми же паче иже нам, образом збытие видящим, подобает веселитися духовне о божественнем сем празднице Богоматере, о пришествии честнаго ея образа в гору святую сию.[4494] «Прииде бо днесь, — по реченному, — гора Божия в гору чювственную». «Прииде гора Божия, гора усыренная Духом Святым», о нейже Давыд изрече.[4495] Прииде гора, от неяже камень отсечеся без руку и соблазны вся потреби. Прииде гора, юже древле Аввакум провозглашаше, глаголя: «Бог от юга приидет, и святый из горы присенныя часты».[4496] Прииде в гору, о нейже Исайя прорече, глаголя: «Будут в последняя дни яве гора Господня и дом Божий верху ея».[4497] Днесь бо збыстся пророчество блаженнаго Давыда, глаголющее: «Велий Господь и хвален зело во граде Бога нашего, в горе святей его, благокоренным радованием всея земли».[4498] Сия бо воистинну зде радость всея земли, прославися бо сия, якоже Синайская. Тамо бо, егда глаголаше Бог с Моисеом, куряшеся огнем и мраком.[4499] Ныне же сия посещением Божия Матере паче светится и украшается место святое и Богом просвященное. Днесь бо видим дом Божия Матере верху ея и, духовне веселящеся, поклоняемся в горе сей святей иконе ея, исцеления приемлюще душам и телесем. Аще бо и прообразование тоя видев Моисей, купину во пламени горящу огнем и неопаляему,[4500] и толикия святости сподоблен бысть, яко и место, на немже таковая быша, свято показася. «Изуй бо, — рече, — сапог ногу твоею, место бо, на немже ты стоиши, свято есть».[4501] Колико паче ныне, не по прообразованию, но самый образ Богоматере, иже от далних стран изволением ея доиде, воистину сугубыя благодати сподобися и освятися место сие. Прекратим же слово о сем, возвратимся на предлежащее нам слово.
4491
...воевода именем Иван Милюков... — Иван Васильевич Милюков-Гусь был воеводой в Двинской области с 1608 г. по 6 апреля 1609 г.
4492
...на епарха и на архиграфоса. — Епарх (έπαρχος) — начальник, наместник, здесь — воевода; архиграфос (ὁ ἀρχιγραφευς) — старший писец, секретарь, здесь — дьяк.
4493
...архиграфоса того именем Илию Уварова осудивше на смерть и в воду утопиша. — Дьяк Илья Иванович Уваров, ельчанин, был «казнен утоплением в Двине» 10 января 1609 г.
4494
Обычай убо человеческому естеству... в гору святую сию. — Вступление заимствовано из Слова похвального на Положение Честного Пояса Богородицы (31 августа), в тексте заменено лишь наименование Пояса Богородицы на икону Богородицы. Тако бо и божественный Давыд святыни киот, возвращаем от плнения, видев, радостию скакаше, играя. — Киот — ковчег Завета — ящик из драгоценного дерева ситтим (акации), украшенный золотой, важнейшая святыня Израиля. В нем хранились скрижали Завета и чаша с манной. При возвращении киота из пленения в город Давида был устроен великий праздник. Сам царь Давид скакал и плясал от радости, за что был осуждаем некоторыми из присутствующих при этом (см.: 2 Цар. 6).
4495
«Прииде гора Божия, гора усыренная Духом Святым», о нейже Давыд изрече. —
4498
«Велий Господь и хвален зело во граде Бога нашего, в горе святей его, благокоренным радованием всея земли». —
4499
...якоже Синайская. Там бо, егда глаголаше Бог с Моисеом, курящеся огнем и мраком. —
4500
...видев Моисей, купину во пламени горящу огнем и неопаляему... —
4501
«Изуй бо, — рече, — сапог ногу твоею, место бо, на немже ты стоиши, свято есть». —