Чюдо 19 о некоем юноши Василии, како даровася прозрение очию от иконы Богоматере. Но како возмогу недостоин сый, недостойне имея устне, поведати таковая, но обаче надеяся на неизреченныя щедроты Сына Божия и того рождьшия молитвы, и милость, и заступление о бывающих предивных чюдесех Богоматере, от честныя ея и чюдотворныя иконы.
Некий чернец тоя же Черногорския обители именем Дионисий поведа сице, яко еше житие имуще в мире з женою своею и с чады, и домовная строявшу, якоже обычай человеком в селех тружатися земледелия, и прочая домашняя потребы, иже суть в суете мира сего. И имея у себе сына именем Василия. Сему отроку случися болезнь люта на очи его, и не виде света сего за два лета никакоже. Житие же свое имяше предреченный старец близ обители тоя, яко пять поприщ, в веси, нарицаемой Валдокурьи. И обещахся с верою ко образу чюдотворному Пресвятей Богородицы, честнаго и славнаго ея Одигитрия, и поведох его во обитель сию. «И бывшим нам близ обители тоя, внезапу узре отрок яко мало света. И егда достигши обители тоя и ко Пресвятей Богородицы молебная совершивши, и абие совершенно прозре, яко николиже имея в себе болезни. Видев же аз, отец его, сие преславное чюдо, и слышах и иныя безчисленныя чюдеса, бывающия от иконы Пречистыя Богоматере, и оставив мир, и пострижеся в том монастыре». Такоже и исцеленный сын его пребысть со отцем своим во обители той, тружаяся на братию, славяще Бога вкупе и Пречистую Бгоматерь о исцелении своем. Содея же ся сие преславное чюдо в лето 7144-е (1636).
Чюдо 20 о исцелении больнаго. Понеже убо Божия Матере повсюду преславныя восияша чюдеса от Пречистыя и многоцелебныя иконы Богородичны, честнаго ея Одигитрия. И яко великий светь, и яко солнце пресветлое сияющи и нигдеже утаитися могущу. Понеже бо везде Пренебесная Царица, не точию в ближних странах, но и в далних, милостивно назирающи, якоже бо сице содеяся преславное чюдо.
Человек некий именем Василий Феодотов сын тое же Двинския области сожитие имея по реце велицей Двине, на острову, пореклом Марилов. Сему Василию случися люта болезнь зело, иже наричется шепота. И от тоя болезни опухло лице его и все тело. И от очию его зрак отъятся, и ниоткуду надейся помощи. И продолжися болезнь его яко на два месяцы. И поведаша ему нецыи тоя веси соседи его о бывающих преславных чюдесех Пречистыя Владычицы нашея Богородицы, от чюдотворныя иконы ея Одигитрия, иже наричется Грузинская, на Пенеге в Черной горе. И егда приспе Светлый день Благовещения ея марта в 25 день в лето 7154-е (1646), о дивное чюдо и преславное! Егда он больный изрече со слезами ко Пресвятей Богородицы: «О Пресвятая Мати Божия, помилуй мя и исцели мя от лютыя сея болезни на пресветлый свой праздник честнаго Благовещения, яко да шед ко иконе Пречистаго образа твоего, честнаго Одигитрия, якоже поведаша мне, в Черной горе, и обещание свое елико по силе исполню!» И в том часе абие едином оком прозре. И нача паки велми из глубины сердца своего со слезами вопити, да подаст ему Пренепорочная Владычица совершенное исцеление. И внезапу бысть здрав, яко николиже в себе болезни имый. И по исцелении своем никакоже умедли, но вскоре пришед во обитель Пречистыя Богородицы на Черную гору и поведая всей братии совершенное свое здравие от чюдотворныя иконы Богородичны. И молебная совершив, и отъиде в дом свой, славя Бога и Пречистую его Богоматерь.